မတ်မလီု၊ သေပ်တေမ်ဗာ ၁၄
အာဂတနူဏံ ညံၚ်ပေါဲသဳကၠဳပရေၚ်ဍုၚ်ကွာန် ဂွံမံက်ကၠုၚ်ဂှ် ဂၠါဲဂၠံၚ်တၟိမွဲတုဲ သွက်ဂွံစမ်ၜတ်ဂ္စါန်အာဂှ် ဂကောံမဟာမိတ် ဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော် ၇ ဂကောံတံ သ္ဂုတ်သွာတ်လဝ်ရောၚ် ညးမၞုံအခေါၚ်ဟီုဂး ဂကောံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောံဓရီု မဟာမိတ်ဂကောံရပ်လွဟ်ကောန်ဍုၚ်အရၚ် ဒေါအ်ပန်ပှော် ၇ ဂကောံ က္ဍိုက်ပ်ဂှ် နဒဒှ်အလန်ဒုတိယ ကၠောန်ဗဒှ်လဝ် နူလပှ်ကျာ ပ္ဍဲဂိတုသေပ်တေမ်ဗာ ၁၀ ကဵု ၁၁ တေံရ။
ပ္ဍဲကောံဓရီုဏံဂှ် နူကဵုဂကောံညးအုပ်ကာ ပၠောပ်ပ္တိုန်လဝ် လိက်ဒုၚ်စဳရေၚ်ကမၠောန် ပါလုပ်သီုကဵု လိက်ဒုၚ်စဳရေၚ်ပရေၚ်ဍုၚ်ကွာန်တံဂှ်တုဲ စပ်ကဵုလ္တူဏံတုဲ သဳကၠဳပ္ညဳပ္ညပ်လဝ် ညးသ္ကအ်ရ။
သ္အာၚ်နူဂှ်ပၠန် လၟေၚ်ကမၠောန်အဓာန်ဂတ ကေုာံ ပေါဲသဳကၠဳပရေၚ်ဍုၚ်ကွာန် ညးမဆေၚ်စပ်သီုဖအိုတ်ပါလုပ် ဂွံဒှ်ဂှ် သာ်လဵုဂွံဖံက်အာဂၠံၚ်ရောဟီုဂှ် သ္ဂုတ်သွာတ်ဂွံလဝ် ဂၠံၚ်တၟိမွဲရောၚ် ညးမၞုံအခေါၚ်ဟီုဂး ဂကောံမဟာမိတ် ဒေါအ်ပန်ပှော် ၇ ဂကောံ သ္ကိုပ်ဗိုလ်ဇၞော် သဝ်ကျဝ်ညောအ် ဟီုရ။
“ နူသၞာံ ၂၀၂၁ တုဲဂှ် ပရေၚ်သဳကၠဳ နကဵုဂၠံၚ် NCA တံ ဒေါအ်ဒေၚ်အာရ။ ကြဴနူဏံတုဲ နူကဵုဂကောံပိုယ် ၇ ဂကောံတံ ကေမ်ၛှာပ်ကေတ် ကြက်ရှ်သာ NCA ပိတန်တုဲ ညံၚ်ပေါဲသဳကၠဳဆဵုဂဗပရေၚ်ဍုၚ်ကွာန် ညးမဆက်စပ်သီုဖအိုတ်ပါလုပ် ဂွံဒှ်ဂှ် သာ်လဵုဂွံဖံက်ဂၠံၚ်ဂွံဂှ်ရော။ နကဵု Entry Point သာ်လဵုတှ်ေ စဂွံရောဟီုဂှ် ပ္တိတ်ကၠုၚ်လဝ်ဇြဟတ်ရ။ ဆ္ဂး အပ္ဍဲပွိုၚ် ၂ သၞာံဂှ် ဟွံစိုပ်တရဴဒှ်အာတုဲ အနာဂတ်ဂတနူဏံ နကဵုပိုယ်တံ စမ်ဂၠံၚ်တၟိမွဲတုဲ ဂွံပ္တိတ်အာဇြဟတ်ဂှ် သဳကၠဳသ္ဂုတ်သွာတ်ကၠုၚ်သာ်ဏံမာန်ဂှ် နွံရ” သာ်ဝွံ သ္ဂးရ။
ညံၚ်ပေါဲသဳကၠဳပရေၚ်ဍုၚ်ကွာန် ဂကောံမဟာမိတ်ဒေါအ်ပန်ပှော် ၇ ဂကောံ ဂွံမံက်ဂတဝ်ကၠုၚ် ဂၠံၚ်တၟိဂှ်ဝွံ ဟွံတၟေၚ်တၟဟ်မွဲသာ် ပြသၞာပရေၚ်ဍုၚ်ကွာန်ဂှ် သွက်ဂွံဂၠါဲသွဟ် ဆဵုဂဗသဳကၠဳအာ နကဵုနဲကဲပရေၚ်ဍုၚ်ကွာန်ရဏောၚ် မဒှ်ရ။
သ္အာၚ်နူဂှ်ပၠန် အခိၚ်ကာလဗွိုၚ်သဳကၠဳပရေၚ်ဍုၚ်ကွာန် ဍန်ကၠုၚ်ဒၟံၚ်ဂှ် ညံၚ်ဗွိုၚ်ပရေၚ်ဍုၚ်ကွာန် ဂွံလှဲလးကၠုၚ် သာ်လဵုဂွံပ္တိတ်အာဇြဟတ်ရောဟီုဂှ်လေဝ် ဖျေံသ္ဂုတ်သွာတ်မာန်လဝ်ရောၚ် ညးဆက်ဟီုရ။
ပေါဲသဳကၠဳညးမဆေၚ်စပ်သီုဖအိုတ်ဂွံပါလုပ် ဂွံဒှ်ဂှ် ဇၟာပ်ပ်ပေါဲဆဵုဂဗ နူကဵုဗွဲပလးဂှ် စအာ နူကဵုပရေၚ်သဳကၠဳ အခိၚ်၊ ဒၞါဲ၊ အာဂျာန်ဒါ ဂကောံၜါလ္ပာ် ပြေပြံၚ်တံဂှ်တုဲ သွက်ဂွံပ္တိတ်အာဇြဟတ်ဂှ် ချပ်ဒၟံၚ် နွံဒၟံၚ်ရ။
သ္ကိုပ်ဗိုလ်ဇၞော် သဝ်ကျဝ်ညောအ်ဂှ် အခိၚ်ကာလအခက်အခုဲနွံဏံ စအာနူကဵု မူသ္ဇိုၚ်ဖေဝ်ဒရာ ၂၄ တၚ် နူကဵုဂကောံရပ်လွဟ်ကောန်ဍုၚ်အရၚ် ၁၂ ဂကောံတံ တုပ်လဝ်စိုတ်တံတုဲဂှ်တုဲ မိက်ဂွံသဳကၠဳဂှ် ဟီုလဝ်ရ။
“အခိၚ်ကာလ အခက်အခုဲနွံဒၟံၚ်သာ်ဏံ နကဵုပိုယ်တံ မိက်ဂွံစအာ နူကဵုပရူပရာသာသာဍာဍာတံကၠာရ။ အဓိကဂှ်တှ်ေ နူကဵုတၚ်တုပ်စိုတ် ဂကောံရပ်လွဟ်ကောန်ဍုၚ်အရၚ် ၁၂ ဂကောံတံတုပ်လဝ်စိုတ်တုဲတုဲ နူကဵုမူသ္ဇိုၚ်ဖေဝ်ဒရာ ၂၄ တၚ်ဂှ်တုဲ မိက်ဂွံသဳကၠဳအာရ။ တုဲပၠန် အခိၚ်သဳကၠဳဂှ်လေဝ် ဂၠံၚ်တရဴထ္မံက်အာရုပ်ရဴ နတဲစှ်ေစှ်ေမာန်တံဂှ်လေဝ် ပိုယ်တံ မိက်ဂွံစအာရ” သာ်ဝွံ သ္ဂးရ။
ညးခါတ်အကာဲပရေၚ်ဍုၚ်ကွာန်တံဂှ်တှ်ေ ပေါဲဗ္တိုက်ရပ်လွဟ် ဗ္တိုက်သရိုဟ်သၞောတ်တၠအဝဵုပၞာန် မက္တဵုဒှ်ဒၟံၚ် အလုံဍုၚ်မွဲဂှ်ဝွံ ဟိုတ်နူပ္တဝ်ဒၟံၚ်က္ဍိုပ် ကုပၠန်ဂတးပြံၚ်လှာဲသၞောတ်တံဂှ်ရ လုကဴဒပ်ပၞာန်ဟွံတိတ်နူပရေၚ်ဍုၚ်ကွာန်မ္ဂး ပေါဲသဳကၠဳ ဒှ်ဟွံမာန်ပုဟ်ဂှ် သ္ၚဳဂၠိပ်လဝ်အိုတ်ရ။
နကဵုဂကောံမဟာမိတ်ဒေါအ်ပန်ပှော် ၇ ဂကောံတံ ပ္ဍဲအရာသောၚ်ကလး ပဋိပက္ခလၟုဟ်ဂှ် ဂကောံဇြဟတ် မိက်ဂွံဂၠါဲသွဟ်ဗွဲမၜိုဟ်လလမ်တံ သွက်ဂွံပံက်အာသြိုဟ် လစွံစိုတ်ညးတံမာန်တုဲ သွက်ဂွံထ္မံက်အာအကာဲအရာ ကေုာံ ဂၠံၚ်ဍာန်တံဂှ် ရန်တၟံလဝ်ရ။
ဟိုတ်ဂှ်ရ အပ္ဍဲဂိတုမာတ်တုဲကၠုၚ်တေံ နူကဵုကောံဓရီုဂကောံဒေါအ်ပန်ပှော် ၇ ဂကောံ မကၠောန်ဗဒှ်လဝ် ပ္ဍဲဍုၚ်သေံ ဍုၚ်ဇၚ်မာဲဂှ် နကဵုဗီုပြၚ်ဒက်ပ္တန်တၟိဂှ် ဒက်ပ္တန်လဝ် ဂကောံမဟာမိတ် ဂကောံရပ်လွဟ်ကောန်ဍုၚ်အရၚ်ဒေါအ်ပန်ပှော် ၇ ဂကောံရ။
ပ္ဍဲကဵုဂကောံဏံဂှ် ကံၚ်ဇြဳကလေၚ်ပ္တန်ရးသေံ၊ ဗော်ဍုၚ်မန်တၟိ၊ ဗော်ဗၠးၜးရခေၚ်၊ ဒပ်ပၞာန်ဒတုဲဖဵု ဒဳမဝ်ကရေဇြဳကရေၚ်၊ ကံၚ်ဇြဳၜိုဟ်လလမ်ကရေၚ်၊ ဗော်သွးဒဳမဝ်ကရေတ်တေတ်လာဟူ ကေုာံ ဂအုပ်ဂကောံဗၠးၜးကောန်ဂကူပအိုဝ်တံ ပါလုပ်ရ။
ပ္ဍဲကဵုဂကောံက္ဍိုက်ပ် ဂကောံမဟာမိတ်ဒေါအ်ပန်ပှော် ၇ ဂကောံဂှ် ဥက္ကဌ ကံၚ်ဇြဳကလေၚ်ပ္တန်ရးသေံ RCSS သ္ကိုပ်ဗိုလ်ဇၞော် ယောန်သေတ် ကေုာံ ဒုဥက္ကဌဗော်ဍုၚ်မန်တၟိ NMSP နာဲအံၚ်မေန်တံ ကေတ်လဝ်တာလျိုၚ် နဒဒှ်က္ဍိုပ်သ္ကိုပ်ဂကောံကဵု ဒုက္ဍိုပ်သ္ကိုပ် မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−7EAOs