ဇြပ်ဗု၊ သေပ်တေမ်ဗာ ၁၇
တွဵုရးဍုၚ်မန် ပွိုၚ်ဍုၚ်ဇြပ်ဗု လ္တူဂၠံၚ် ကွာန်ဘာ−(လင်မသာ)−ဝါခမိတံဂှ် လွဟ်ဇၞော် ဒတုံဗ္တိုဟ်ထ္ကးအာလဝ်တုဲ မၞိဟ်တြုံမွဲတၠကဵု မၞိဟ်ဗြဴမွဲတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် ဇရေၚ်ညးဒေသတံရ။
တုဲကၠုၚ် ပ္ဍဲဂိတုသေပ်တမ်ဗာ ၁၅ အခိၚ်လဒေါဝ်တ္ၚဲ ၜိုတ် ၁၂ နာဍဳ ပေါဲဗ္တိုက်က္တဵုဒှ်ဟွံမွဲမွဲသာ် လွဟ်ဇၞော်မွဲမ ဒတုံဗ္တိုဟ်ထ္ကးအာလဝ် လ္တူဂၠံၚ်ကွာန်တံဏံရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးအာလဝ်တုဲ ကောန်ကွာန်ဝါခမိ နာၚ်ၚါထူထူလေန် ကေုာံ မဇြေန်မာထိုဲ အာယုက် ၁၉ သၞာံ စဴကၠုၚ်နူဝေၚ်ဍာ် ပ္ဍဲကြုၚ် ဗ္ဒါဲကွာန်ဘာဂှ် ဒးကဝေက်မကမ် ကလိဂွံအာလဝ်ဝပ်ရ။
ဟိုတ်နူဒးအာကဝေက်မကမ်လွဟ်ဇၞော်တုဲ နာၚ်ၚါထူထူလေန်ဝွံ ကလိဂွံအာဝပ် ပ္ဍဲဇိုၚ်လ္ပာ်ပုၚ်၊ တဲလ္ပာ်ပါဲတုဲ မဇြေန်မာထိုဲဂှ်တှ်ေ ကလိဂွံအာဝပ် ပ္ဍဲတဲလ္ပာ်ပါဲတုဲ နကဵုအရီုဗၚ်ဂကောံဟံၚ်ပြာ်မှာဇန်တံဂှ် တိုန်စိုပ်လွဳဒၟံၚ် ပ္ဍဲရုၚ်ဂဥုဲဇြပ်ဗုရောၚ် ဂွံတီကေတ်ရ။
ပ္ဍဲကဵုဂၠံၚ် လွဟ်ဇၞော်ဒတုံဗ္တိုဟ်ထ္ကးအာလဝ်ဂှ် က္တဵုဒှ်လဝ်ပေါဲဗ္တိုက်ဟွံမွဲတုဲ စပ်ကဵုလၟေၚ်ဒဒှ်ဏံတုဲ ကံၚ်ဇြဳပၞာန်ကီု လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံကီု လလောၚ်ပ္တိတ်လဝ်ပရိုၚ်ဟွံမွဲဏီရ။
တုဲကၠုၚ် ပ္ဍဲဂိတုသေပ်တေမ်ဗာ ၁၂ တေံ ဥူညာန်ထောန် အာယုက် ၃၇ သၞာံ ဒၟံၚ်ကွာန်ဗဒိုပ်ဇၞော်မ္ၚး ပွိုၚ်ဍုၚ်ဇြပ်ဗုဂှ်ဝွံ ပ္ဍဲကၠအ်ထၜိုတ်ညး မာၚ်တိုပ်တိဗ္တိုဟ်ထ္ကးတုဲ ကလိဂွံအာလဝ်ဝပ် သ္ကာတ်မြဟ်ရ။
ပ္ဍဲပွိုၚ်ဍုၚ်ဇြပ်ဗု အပ္ဍဲကာလသီအဝဵုဏံ ညးဍုၚ်ကွာန်ဒေသဂမၠိုၚ်ဝွံ ဟိုတ်နူလွဟ်ဇၞော် ကေုာံ မာၚ်တိုပ်တိတုဲ မွဲဏှမွဲဏှဟီုဂွံ ဒးဇီုကပိုက်ချိုတ်အာတံ နွံဒၟံၚ်တုဲ ပရေၚ်ဝးပ္ကဝ်အခေါၚ်အရာမၞိဟ်တံလေဝ် သၠုၚ်တိုန်ကၠုၚ်ရ။
အတိုၚ်တၚ်နၚ် နူကဵုလိက်လၟေၚ်လ္ဂန်အိန် ကံက်ကပှ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် အပ္ဍဲဂိတုအဝ်ဂါတ်တုဲကၠုၚ်တေံ ဟိုတ်နူလွဟ်ဇၞော် ကေုာံ မာၚ်တိုပ်တိတုဲ ကောန်အရာပ် ၁၂ တၠ ချိုတ်တုဲ ၂၂ တၠ ဇီုကပိုက်ကလိဂွံလဝ်ဝပ်ရ။
ပရိုၚ်−သြၚ်လောန်တိုၚ်(မ်)
ဗီု−SBM