ဆက်ဝေၚ်အာပေါဲဗ္တိုက်ဂါဇြာမာန်ဒၟံၚ်ဖိုဟ်ရောၚ် ဂကောံဟာမာသ် ဟီုကြီု

အေဿတာန်ပူ၊ သေပ်တေမ်ဗာ ၁၇

အခိၚ်ပေါဲပၞာန်ဂါဇြာ လအ်ကၠုၚ်ပွိုၚ် ၁၁ ဂိတုဏံ နကဵုညးတံ ပရေၚ်ဆောံလေၚ် ဂၠိုၚ်ကီုလေဝ် ဂွံဆက်ဝေၚ်အာပေါဲပၞာန် ပ္ကောံပ္ကေဝ်လဝ်တမ်ရိုဟ် ဗွဲမဂၠိုၚ်ဂၠေၚ်တုဲယျဂှ် သၞာဲဒဴဇၞော်ကဆံၚ်လ္တူ ဂကောံဟာမာသ် ဂကောံရပ်လွဟ်ပါလက်သတိုၚ်မွဲတၠ ဟီုလဝ် ပ္ဍဲဂိတုသေပ်တေမ်ဗာ ၁၅ တေံရ။

နကဵုဂကောံပၠန်ဂတးဒစဵုဒစးဂမၠိုၚ် ဂွံဆက်အာတရဴ ဇြဟတ်နွံဒၟံၚ်ဖိုဟ်ဂှ် သၞာဲဒဴကဆံၚ်လ္တူ ဂကောံဟာမာသ် အိုဝ်သမာ ဟာန်ဒါန် ဟီုလဝ် ပ္ဍဲကဵုအေန်တာဗျူ မကၠောန်ဗဒှ်လဝ် ပ္ဍဲဍုၚ်အေန်သတာန်ပူရ။

အာဇာနဲ သၠးပွးကၠုၚ် မၞိဟ်ဒးဒုၚ်ဂိလဝ်တံ နွံဒၟံၚ်တုဲ သွက်ပၠန်ဂတးညးတံဂှ် ပကောံလဝ်ဇြဟတ် နူကဵုတၞောဝ်ဒတောဝ်တၟိတံတုဲယျဂှ် ညး ဟီုရ။

ဂကောံဟာမာသ်ဝွံ ပ္ဍဲဂါဇြာဂှ် နဒဒှ်ဂကောံပရေၚ်ပၞာန်မွဲ ဟွံမွဲရပုဟ်ဂှ် ကြဴနူအေဿရေ ဟီုလဝ်သာ်ဏံတုဲ ဂလာန်ဟီုပ္တိတ် နူကဵုဂကောံဟာမာသ်သာ်ဏံ မံက်တိတ်ကၠုၚ်လဝ်ရ။

ကောန်ဍုၚ်ပါလက်သတိုၚ် အေဿရေ ရပ်ဒက်လဝ်ဂှ်ကဵု ကောန်ဍုၚ်အေဿရေ ဒးဒုၚ်ရပ်လဝ် နဒဒှ်ညးဒးဒုၚ်သ္ပဒၞန်တံ သွက်ဂွံလှာဲဂတးအာဂှ် နကဵုသ္ကိုပ်ဝန်ဇၞော် နေတာန်ယာဟု ဒးဆေၚ်ဒၟံၚ်မုက်ကဵု ဇြဟတ်ဂရိုဟ် ဗွဲမဂၠိုၚ်ရ။

အမေရိကာန်၊ အဳဂျေတ် ကေုာံ ကာတာတံ လုပ်ပ္ညဳပ္ညပ်အကြာတုဲ သွက်ဂွံဂွံတၚ်တုပ်စိုတ် ပရေၚ်ဒေါအ်ပန်ပှော်ဂှ် ပ္တိတ်ဒၟံၚ်ဇြဟတ်ကီုလေဝ် ဂွံဂွံတၚ်တုပ်စိုတ်ဒတုဲဂှ် ဝါတ်ဂါတ်ဒၟံၚ်ရ။

အခိၚ်ပရေၚ်သဳကၠဳသာ်ဏံ နွံဒၟံၚ်ဂှ် နကဵုအမေရိကာန် ကဵုဒၟံၚ်ဇြဟတ်ဂရိုဟ် လ္တူအလဵုအသဳအေဿရေ ဗွဲမရုမ်ဂပ်ဟွံမွဲပုဟ်ဂှ် သၞာဲဒဴကဆံၚ်လ္တူ ဟာမာသ်ဂှ် ဟီုလဝ်ရ။

စပ်ကဵုပရေၚ်ဗ္တိုက်အေဿရေ ပ္ဍဲဂါဇြာ မၞိဟ်ဒးချိုတ်အာလဝ် နကဵုဂအုံဗွဝ်ဂှ်တုဲ ပရေၚ်ပါ်ပါဲတံ သ္ကာတ်မြဟ်ကီုလေဝ် အမေရိကာန်ဂှ်တှ်ေ ထံက်ပၚ်ကဵုဒၟံၚ် လွဟ်လက်နက်ဖိုဟ်ရ။

သွက်ဂွံရီုဗၚ် ညးဒးဒုၚ်ရပ်လဝ်တံဂှ် ကဵုလဝ်ကတိ ဂၠိုၚ်ၚ်ကဵုဝါကီုလေဝ် ဒပ်ပၞာန်ညးတံ ဂစိုတ်ထောံလဝ် ကောန်ဂကောံဟာမာသ် ၁၇၀၀၀ ဟီုလဝ်တုဲ စပ်ကဵုပရေၚ်ညးဒးဒုၚ်ရပ်လဝ်တံဂှ်တုဲ သ္ကိုပ်ဝန်ဇၞော် နေတာန်ညာဟု ဟီုလဝ်ဂှ် ဟွံဂွံဆဵုကေတ်ရ။

ဂကောံဟာမာသ် အဳရာန်ထံက်ပၚ်ကဵုလဝ်ဂှ် လုပ်စိုပ်ဗ္တိုက် သ္ကုတ်သၠုၚ်ကျာအေဿရေတုဲ ရပ်ဒက်ကော်ဏာလဝ် ညးဒးဒုၚ်သ္ပဒၞန်တံတုဲ ဟိုတ်နူအေဿရေ ကလေၚ်ပလန်တဲ ဗ္တိုက်ကၠုၚ်တံဂှ်တုဲ ကောန်ဍုၚ်ပါလက်သတိုၚ် ဂၠိုၚ်ကဵုပြကောဋိကိုဋ် ဒးဒှ်အာသ္ၚိဌာန်ဟွံမွဲတုဲ ပရေၚ်ချိုတ် နွံဒၟံၚ်တၟာဂလိုၚ်ရ။

ဂကောံရပ်လွဟ်အပ္ဍဲဒေသ အဳရာန်ထံက်ပၚ်ကဵုလဝ်ဂှ် စပ်ကဵုပေါဲပၞာန်ဂါဇြာတုဲ အခိၚ်ကၠောန်သ္ပဒၟံၚ် ပရေၚ်ပလန်တဲဂှ် အပ္ဍဲဒေသ ပရေၚ်ကြံၚ်မ္ၚိုဟ် သၠုၚ်တိုန်ဒၟံၚ်တုဲ ပေါဲပၞာန်ဇၞော်ဇၞော်မွဲ ဒှ်ကၠုၚ်ဏောၚ် ပရေၚ်ဒှ်ဓဝိၚ်သာ်ဏံတံ မံက်တိတ်ဒၟံၚ်ရ။

Ref: AFP