နျူဒေလဳ၊ သေပ်တေမ်ဗာ ၁၈
ဂလာန်က္ဍိုပ်သ္ကိုပ်ကဆံၚ်လ္တူ အဳရာန် အယာတိုဝ်လာ အလဳခါမေနဳ စပ်ကဵုအိန္ဒိယ ဆက်ဆောံလ္တူမူသလေမ်တံဂှ်ဝွံ ဗၠေတ်ဒၟံၚ်တုဲ ဒုၚ်တဲဟွံမာန်ပုဟ်ဂှ် အလဵုအသဳနျူဒေလဳ ဟီုလဝ်တုဲ ပ္တိုန်ဒုဟ် ဟီုဗျိလဝ်ရ။
မူသလေမ်တံ ဒးဒုၚ်စသိုၚ်ဒၟံၚ် ပ္ဍဲကဵုဍုၚ်ဗၟာ၊ ဂါဇြာ၊ အိန္ဒိယ ကေုာံ ပ္ဍဲကဵုဒၞါဲဒေသတၞဟ်ဟ်တံဂှ် နကဵုညးတံ ဟွံစွံသတိ ဟွံဂွိၚ်ပုဟ်ဟီုမ္ဂး ဇကုဇကု စၟတ်ကေတ် မူသလေမ်ဟွံဂွံပုဟ်ဂှ် က္ဍိုပ်သ္ကိုပ်ဇၞော် အဳရာန် ခါမေနဳ ချူပ္တိုန်လဝ် လ္တူမဳဒဳယျာပရေၚ်မၞိဟ်ရ။
ဌာနဝန်ဇၞော်ကာဍုၚ်သ္အာၚ် အိန္ဒိယဂှ် စပ်ကဵုတၚ်စၟတ်ဏံတုဲ ဒးဒုၚ်စသိုၚ်အာ တၟာဂလိုၚ်ဂှ် ကလေၚ်ဟီုလဝ်ရ။
စပ်ကဵုဂကောံမၞိဟ်အောန်တံတုဲ ဍုၚ်သ္အာၚ်တံ ပ္ဍဲအရာဟီုဂးမွဲမွဲသာ် ကၠာဟွံဂွံဟီုပရူညးသ္အာၚ် ဒးကလေၚ်ရံၚ် စၟတ်သမ္တီအလဵုဇကုတံဏောၚ်ဂှ် ဌာနဝန်ဇၞော်ကာဍုၚ်သ္အာၚ် အိန္ဒိယ ဟီုရ။
ၜါဍုၚ်ဏံဝွံ ဗွဲမဂၠိုၚ် ပရေၚ်ဆက်ဆောံမခိုၚ်ဗိုန်မွဲ နွံတုဲ ပရေၚ်သိုၚ်ခၞံ သၞေဟ်ယှာဘာဟာ အဳရာန်ဂှ် တုဲကၠုၚ်ပ္ဍဲဂိတုမေတေံ ၜါဍုၚ် ထ္ပက်လဝ်စၟတ်တဲ တုပ်စိုတ်ရ။
ဝေၚ်ပါဲကၠေံ သၞေဟ်ပါကေဿတာန် ကရာချဳကဵု ဂျဳဝါဒါတံဂှ်တုဲ နဒဒှ်ဂၠံၚ်တရဴပလံၚ်ဗစိုပ်ဗၞိက် သွက်အဳရာန်၊ အာဖဂါန်နေဿတာန် ကေုာံ အာယှသ္ကုတ်လဒေါဝ်တံဂှ်တုဲ ပ္ဍဲကဵုပရၚ်ၜဳ အဳရာန်ပိုၚ် နွံမွဲဒမြိပ်ပ္ၚံက်ၜဳအိုဝ်မာန်ဂှ် အိန္ဒိယ သိုၚ်ခၞံဒၟံၚ် သၞေဟ်ဏံ မဒှ်ရ။
ပရေၚ်ဆက်ဆောံ ခိုဟ်ဒၟံၚ်သာ်ဏံကီုလေဝ် က္ဍိုပ်သ္ကိုပ်ဇၞော် ခါမေနဳဝွံ ပ္ဍဲကဵုပရေၚ်ဒဒှ် ဒေသကက်ယှမဳယာ မူသလေမ်ဗွဲမဂၠိုၚ် မံၚ်တန်တဴဒၟံၚ်ဂှ်ကဵု ပ္ဍဲကဵုပရေၚ်ဒဒှ် မူသလေမ်အိန္ဒိယတံ ပါလုပ်တံဂှ် မွဲဏှမွဲဏှ လေပ်ဟီုဂးပါ်ပါဲတဴ အိန္ဒိယရ။
Ref: Reuters