မတ်မလီု၊ သေပ်တေမ်ဗာ ၁၈
ပပ္တံနူဂိတုအဝ်ဂါတ်သတ္တာဟလက္ကရဴအိုတ် တုဲကၠုၚ်တေံတုဲ ပ္ဍဲတွဵုရးဍုၚ်မန် အပ္ဍဲပွိုၚ်ဍုၚ်ဗွဲမဂၠိုၚ် ပ္ဍဲကဵုဝါဗ္ၚတဵုသြောံကသီုဂှ် ဒးဒၟံၚ်စၟပလီုသြောံတံ ပရေံပရေံရောၚ် သၟာဗ္ၚဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပွိုၚ်ဍုၚ်အပ္ဍဲဒေသ မပ္တံကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်ပံၚ် ကေုာံ ပွိုၚ်ဍုၚ်မုဟ်ဍုၚ်တံဂှ် ဒးဒၟံၚ်စၟပလီုသြောံ ဇၞော်ကဵုဇြဟတ်တုဲ ပ္ဍဲကဵုပွိုၚ်ဍုၚ်သှ်ေတံဂှ်လေဝ် စၟပလီုသြောံ လုပ်စိုပ်ကၠုၚ်တံ နွံဒၟံၚ်ရ။
စၟပလီုသြောံ စှ်ေဒၟံၚ်လၟုဟ်ဂှ်ဝွံ ဒှ်ဂကူစၟမှေန် အရံၚ်ဒမျိုၚ်တုဲ ဌာနကော် ဂကူစၟ (ဖောၚ်စီး)မဒှ်တုဲ ဒးဆေၚ်ဒၟံၚ်မုက်ကဵု အကာဲအရာထိၚ်ဟွံမာန်တံရောၚ် သၟာဗ္ၚဂမၠိုၚ် ဟီုအိုတ်ရ။
သၟာဗ္ၚမွဲတၠ နူပွိုၚ်ဍုၚ်ပံၚ်ဂှ် ဒးစၟပလီုသြောံဏံ အကာဲအရာပရေံဒၟံၚ်ကွေံကွေံတုဲ ကဵုဂဥုဲဌာနပရေၚ်တဵုလွဳတံရဂှ် ဟွံမာန် ဒးဂဗဒၟံၚ်ကဵုအကာဲအရာဏံရောၚ် ဟီုရ။
“အကာဲအရာစၟသြောံဂှ်တှ်ေ ပရေံဒၟံၚ်ကွေံကွေံရ။ ကဵုဂဥုဲရဂှ် ဟွံမာန်ပုဟ်။ ညအ်ဂှ် ဂစတ်ဒၟံၚ်ဂဥုဲစၞောန်နၚ် နူကဵုဌာနတဵုလွဳတံဂှ်ရဏောၚ်။ ဂစတ်လေဝ် ဟွံမာန်ပုဟ်။ ဟီုဂှ်တှ်ေ စၟမှေန်ရဏောၚ်။ နူကဵုစၟတံဏံဂှ် တၞံသြောံတံ တၞာၚ်ဗာၚ်သဝ်ဝ်တံဂှ် စှ်ေအိုတ်ရ။ စှ်ေတုဲ ဂွံၜိုတ်မွဲသတ္တာဟ အရံၚ်ပြံၚ် ဒှ်အာအရံၚ်ဍာ်မိတ်တုဲ အုဲတုဲ ဒှ်အာဗီုကဵုချံက်၊ အကာဲအရာဆောံလေၚ်ဂှ်တှ်ေ ကေတ်ကၟေတ်ဟွံမာန် ဒှ်အာရ” သာ်ဝွံ သ္ဂးရ။
စၟပလီုသြောံ စှ်ေဒၟံၚ်လၟုဟ်ဂှ်ဝွံ ပလီုသြောံ မြက်ဇက်ဗွဲတုဲ ဗွဲမဂတာပ်အခိၚ် စုတ်ဂဥုဲဂစိုတ်စၟ ဟွံမာန်ကီု၊ ၚုဟ်ဂဥုဲဂစိုတ်စၟတံဏံ က္ဍၚ်ကီု ဟိုတ်နူကောန်ကလောန်အောန်တုဲလေဝ် ပရေၚ်ဆောံလေၚ်တံ ဂၠိုၚ်ကၠုၚ်ဒၟံၚ်ရောၚ် သၟာဗ္ၚဂမၠိုၚ် သ္ဂးအိုတ်ရ။
သၟာဗ္ၚမွဲတၠ နူပွိုၚ်ဍုၚ်ၜဳကလေၚ်ဂှ်လေဝ် ကြပ်အလုံပွိုၚ်ဍုၚ်မွဲ ဒးဆေၚ်ဒၟံၚ်မုက်ကဵု စၟပလီုသြောံဏံဂှ်တုဲ ဟိုတ်နူသြန်ဟွံမာန်တုဲ ဒးကၠဟ်လဝ်အတိုၚ်ဏံဂှ် ဟီုရ။
“ကြပ်ပွိုၚ်ဍုၚ်ၜဳကလေၚ်မွဲရဏောၚ် အကာဲအရာဂှ် ပရေံဒၟံၚ်။ ဒးဟီုသောၚ်ၚ်မ္ဂး တၞံသြောံဂှ် ဒှ်အာချံက်အုဲအုဲရ။ ပရူပရာကောန်ကလောန်အောန်တံဂှ်လေဝ် နွံဒၟံၚ်ဏီ။ တုဲပၠန် ဒးဂၠါဲဒၟံၚ်သြန်ဏီတုဲ ပိုယ်တံ မွဲဒမြိပ်အခိၚ် ကၠောန်မြက်က်ဇက်က် ဟွံဂွံဂှ် နွံဒၟံၚ်ရ။ အေ ဂှ်တှ်ေ ပိုယ်တံရဲကၠောန် ၅၀ ဨက ရဲကၠောန်တိဨက ဂၠိုၚ်ၚ်တံဂှ်တှ်ေ ကၠောန်ဟွံမာန်ရပုဟ်လေဝ်။ ကၠဟ်ထောံလဝ်တုဲ ချိုတ်အိုတ်ရ” သာ်ဝွံ သ္ဂးရ။
ဂွံဖအိုတ်ကၠေံ စၟပလီုသြောံ စှ်ေဒၟံၚ်လၟုဟ်ဏံဂှ်တှ်ေ နကဵုဂဥုဲဂစိုတ်စၟ မွဲဨက အကြာမွဲကိုဋ်ဒ္ကေဝ် စဵုကဵုမွဲကိုဋ်ဘာ်နွံဒၟံၚ်တုဲ သၟာဗ္ၚဗွဲမဂၠိုၚ် ကၠောန်ဟွံမာန်ရတုဲ ဒမြိပ်သြောံတိတ်အပ္ဍဲဒေသလေဝ် စှ်ေကၠုၚ်တီတီမာန်ဂှ် သၟာဗ္ၚဂမၠိုၚ် သ္ဂးလဝ်အိုတ်ရ။
မွဲလ္ပာ်ဂှ်ပၠန် ဌာနတဵုလွဳ သၟဝ်တဲကံၚ်ဇြဳပၞာန်ဂှ် သွက်ဂွံဖအိုတ်ကၠေံ စၟပလီုသြောံတံဂှ် ကဵုဒၟံၚ်ကသပ်ကီုလေဝ် ဟွံစိုပ်တရဴတုဲ ဂဥုဲဂစိုတ်စၟ စိုပ်တရဴတံဂှ်လေဝ် ဟွံရုမ်ဂပ်တုဲ တၞံသြောံတံ လီုလာ်ဂၠိုၚ်ဒၟံၚ်ရောၚ် ဂွံတီကေတ်ရ။
တွဵုရးဍုၚ်မန်ဝွံ ဒှ်တွဵုရးတိတဵုသြောံကသီု နွံဗ္ဒါဲ ၇ ကိုဋ်ဨကမွဲတုဲ လၟေၚ်သၞာံ သြောံတိတ်ဒၟံၚ် ၄၃၀ ကိုဋ်နပြၚ်တုဲ သၞာံဏံ ဟိုတ်နူဍာ်ဇၞော်တုဲ မ္ၚးနူလီုအာဂှ် ဒးဆေၚ်ဒၟံၚ်မုက် သီုကဵုစၟပလီုသြောံစှ်ေတံရ။
ပရိုၚ်−သြၚ်လောန်တိုၚ်(မ်)
ဗီု−CJ