ဇြပ်ဗု၊ သေပ်တေမ်ဗာ ၁၉
နူပွိုၚ်ဍုၚ်ဇြပ်ဗု တွဵုရးဍုၚ်မန်မွဲကဆံၚ် ကရောၚ်ပၞာန်ကံၚ်ဇြဳပၞာန် ကၠုၚ်ပလံၚ်ပၞာန်ရီု ဇရေၚ်ဗျူဟာအနာန်ကွေန်ဂှ် မွဲတ္ၚဲပိဝါ ဒးဒုၚ်ကြတ်ဗ္တိုက်ဒၟံၚ်တုဲ မသုန်တၠ ချိုတ်အာလဝ်ရောၚ် ကရောၚ်ပၞာန်ဒံၚ်ညဵု လလောၚ်ပ္တိတ်လဝ်ရ။
ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် နကဵုဇြဟတ်ဒပ် ၁၀၀ ပြၚ်ဂှ် ပ္ဍဲဂိတုသေပ်တေမ်ဗာ ၁၇ တေံ ဒပ်ပံၚ်ကောံ ဂကောံဇြဟတ်ပၠန်ဂတးတံ ကြတ်ဗ္တိုက်လဝ် ပ္ဍဲကဵုကွာန်ဗဒိုပ်ဇၞော်အပ္ဍဲ ကေုာံ ကွာန်ယျေဝ်တဂေါန်တံ စဵုကဵုပိဝါရ။
အပ္ဍဲပရေၚ်ကြတ်ဗ္တိုက်ဏံ ကောန်ဒပ်ကံၚ်ဇြဳပၞာန် မသုန်တၠ ချိုတ်အာတုဲ ပန်တၠ ဇီုကပိုက်ကလိဂွံလဝ်ဝပ်ရ။ လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံဂှ် ဇီုကပိုက်ကလိဂွံဝပ် ဟွံမွဲပုဟ်ဂှ် ညးတာလျိုၚ်မွဲတၠ နူကဵုကရောၚ်ပၞာန်ဒံၚ်ညဵု ဒပ်ပၞာန်စဵုဒၞါညးဍုၚ်ကွာန် PDF ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကြဴနူဒးဒုၚ်ကြတ်ဗ္တိုက်တုဲ ကရောၚ်ပၞာန်ကံၚ်ဇြဳပၞာန်ဝွံ ဆက်တိတ်အာ လ္ပာ်ဗျူဟာအနာန်ကွေန်တုဲ လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံလေဝ် ဆက်ကၟာတ်လဒဵုဗ္တိုက်ဒၟံၚ် ကရောၚ်ပၞာန်ဏံဂှ် ဂွံတီကေတ်ရ။
တုဲကၠုၚ် ပ္ဍဲဂိတုအဝ်ဂါတ် ၂၉ တေံလေဝ် ကရောၚ်ပၞာန်ကံၚ်ဇြဳပၞာန် ကၠုၚ်ပလံၚ်ပၞာန်ရီု ကုဗျူဟာအနာန်ကွေန်ဂှ်ဝွံ ပ္ဍဲကဵုကွာန် (ခုနှစ်ဝါ) ပွိုၚ်ဍုၚ်ဇြပ်ဗု ဗ္ဒါဲကုန်တာဝါတိုၚ် ပ္ဍဲကဵုကၠအ်ထၜိုတ်ဂှ် ဒးဒုၚ်ကြတ်ဗ္တိုက်တုဲ လ္ပာ်ကံၚ်ဇြဳပၞာန် ၉ တၠ ချိုတ်အာလဝ်ရ။
ကောန်ဒပ်ဇီုကပိုက်ချိုတ်အာ အပ္ဍဲပေါဲဗ္တိုက်တံဂှ် လ္ပာ်ကံၚ်ဇြဳပၞာန် ကလေၚ်ကပှ်ကေတ်လဝ်ဟွံမွဲတုဲ လ္ပာ်ဒပ်ပံၚ်ကောံ ဂကောံဇြဟတ်ပၠန်ဂတးတံ တိုပ်ကဵုလဝ်ဂှ် ဂွံတီကေတ်ရ။
အခိၚ်လၟုဟ် ကံၚ်ဇြဳပၞာန်ဝွံ ညံၚ်ဗျူဟာအနာန်ကွေန် နွံလ္တူဂၠံၚ်ဇြပ်ဗု−ကျာ်ပိ ဟွံဂွံစှ်ေအာဂှ် ပလံၚ်ပၞာန်ရီုကီု၊ ရပ်စပ်လွဟ်ဇၞော် ကေုာံ ပၞာန်ကျာတံတုဲ တဝ်စၞေဟ်ဒၟံၚ် ဗွဲမသ္ကာတ်မြဟ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ဒံၚ်ညဵု