ဇြပ်ဗု၊ သေပ်တေမ်ဗာ ၂၀
ဥက္ကဌ ဂကောံရီုဗၚ်မှာဇန် (ပိုင်ရှၚ်မဲ့) ဖျေံသ္ဇိုၚ်ဍုၚ်ဇြပ်ဗု တွဵုရးဍုၚ်မန်ဂှ်မပါလုပ် ကောန်ဂကောံမသုန်တၠဂှ် ဒပ်ကံၚ်ဇြဳပၞာန် ကၠုၚ်စိုပ်ရပ်ဒက်ဏာလဝ်ရောၚ် ဂွံတီကေတ် ဇရေၚ်ညးစုက်လုက်ကဵုဂကောံတံရ။
တုဲကၠုၚ် ပ္ဍဲဂိတုသေပ်တေမ်ဗာ ၁၈ အခိၚ်ဗ္တံ ၜိုတ် ၉ နာဍဳ ဒပ်ပံၚ်ကောံ ကံၚ်ဇြဳပၞာန်ဝွံ လုပ်စိုပ်ရပ်ဒက်ဏာ ညးတံမသုန်တၠ ပ္ဍဲကဵုရုၚ်ဂကောံရီုဗၚ်မှာဇန် (ပိုင်ရှင်မဲ့) ဂှ်ရ။
ပ္ဍဲကဵုညးဒးဒုၚ်ရပ်ဂမၠိုၚ် ဥက္ကဌဂကောံ ဥူယျေဝ်မေန်ထိုက်၊ ကိုဝ်ယျေဝ်နာၚ်ဥူ၊ ကိုဝ်ဇြဝ်ဝါန် မပါလုပ် ကောန်ဂကောံၜါတၠတၞဟ်ဟ်တံ ပါလုပ်ဂှ် ဂွံတီကေတ်ရ။
ဒပ်ကံၚ်ဇြဳပၞာန် မူဟိုတ်ဂွံကၠုၚ်စိုပ်ရပ်ဒက်ဏာ ကောန်ဂကောံရီုဗၚ်မှာဇန် မသုန်တၠဏံရောဟီုဂှ် ဟွံဂွံတီကေတ်ဏီတုဲ ဆက်ဂၠိုက်ဂၠါဲဒၟံၚ်ရောၚ် ညးမစုက်လုက်ကဵု ဂကောံဂှ်မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အခိၚ်လၟုဟ် စၟဳတ်သၟာန်သၟုက်ဒၟံၚ် ညးတံမသုန်တၠ ပ္ဍဲကဵုဒၞါဲစၟဳတ် ဘာတန်ဗ္တောန်ကဆံၚ်သၠုၚ်ဒပ်ပၞာန် စၟတ် ၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗုဂှ်တုဲ ကဵုဂြောဝ်ဂတာလေဝ် ဟွံဂွံအဆက်ပုဟ်ဂှ် ဂွံတီကေတ်ရ။
ဟွံဂွံတီကေတ်ဟိုတ်ဍေံ ချိုတ်တ်ပၠိုတ်တ်မွဲသာ် ဒးဒုၚ်ရပ်လဝ် သာ်ဏံတုဲ ဒဵုကဵုအခိၚ်လၟုဟ် ဟွံကလေၚ်ဗၠးကၠုၚ်ဏီဂှ်ရ ကောန်ဂြောဝ်ဂတာဂမၠိုၚ် ဒှ်ဓဝိၚ်ဂွိၚ်ဒၟံၚ်ကဵု အန္တရာယ်လမျီုညးတံ နွံဒၟံၚ်ရ။
ဂကောံရီုဗၚ်မှာဇန် (ပိုင်ရှင်မဲ့) ဝွံ သၞာံ ၂၀၁၈ တေံ ပ္တိုန်လဝ်စရၚ်ဂကောံ ပ္ဍဲအလဵုအသဳတွဵုရးဍုၚ်မန်တုဲ ရေၚ်တၠုၚ်ကဵုဒၟံၚ် ကမၠောန်ရီုဗၚ်ဟံၚ်ပြာ် မၞိဟ်ယဲဇီုကပိုက်ဒးအပ္ဍဲဒေသတံကဵု မၞိဟ်ယဲကာမံက်တိုန်တံ မဒှ်ရ။
တုဲကၠုၚ် ပ္ဍဲဂိတုမေ ၂၉ တေံဂှ်လေဝ် ဥက္ကဌဂကောံသၟတ်ပရဟိတဍုၚ်လၟိုၚ် ဖျေံသ္ဇိုၚ်ဍုၚ်လၟိုၚ် ပွိုၚ်ဍုၚ်ရေဝ် မပါလုပ် ကောန်ဂကောံမသုန်တၠတံဂှ် ဒပ်ကံၚ်ဇြဳပၞာန် ကြဴနူရပ်ဒက်ဏာတုဲ ဂွံမွဲသတ္တာဟမှ ကလေၚ်ဗၠးကၠုၚ်လဝ်ရောၚ် ဂွံတီကေတ်ရ။
ပ္ဍဲတွဵုရးဍုၚ်မန် အပ္ဍဲကာလသီအဝဵုဏံ ကောန်ဂကောံရီုဗၚ်မှာဇန်တံ ဒးဒုၚ်ရပ်စၟဳတ်ဒၟံၚ် မွဲဏှမွဲဏှတုဲ ပ္ဍဲကဵုဏံ ကောန်ဂကောံဟံၚ်ပြာ်မှာဇန် နူပွိုၚ်ဍုၚ်ဇြပ်ဗုကဵု ပွိုၚ်ဍုၚ်မုဟ်ဍုၚ်တံ ၜါတၠဂှ် ကံၚ်ဇြဳပၞာန် ဖျေံစၟတ်လဝ် ဒဏ်ထံၚ်ရ။
ပရိုၚ်−သြၚ်လောန်တိုၚ်(မ်)
ဗီု−FB ဂကောံရီုဗၚ်မှာဇန် ပိုင်ရှင်မဲ့