ၜၚ်ကံက်၊ သေပ်တေမ်ဗာ ၂၀
နကဵုဍုၚ်ကြုက် ဍုၚ်ဇိုၚ်ဝုတ်ဒိုဟ်ဇြဟတ်ဇၞော်မွဲ ဘပဠဒၟံၚ် လ္တူဂကောံရပ်လွဟ်ကောန်ဍုၚ်အရၚ်တံဂှ် သွက်ဂွံဒေါအ်ဒေၚ်ကဵုလွာဲဂှ်ဂှ် ဂကောံအခေါၚ်အရာမၞိဟ်ဍုၚ်ဗၟာ ဗ္ဒါဲ ၃၀၀ တံ အာတ်မိက်လဝ်ရ။
သွက်ဂွံဒေါအ်ပန်ပှော် ကဵုဒၟံၚ်ဇြဟတ်ဂရိုဟ် ကုဂကောံရပ်လွဟ်ကောန်ဍုၚ်အရၚ်တံဂှ် သွက်ဂွံဒေါအ်ဒေၚ်ကဵုလွာဲဂှ်ကီု၊ ကဵုဒၟံၚ်ဇြဟတ်ဂရိုဟ် ညံၚ်ဂွံကဵုကၠုၚ်အခေါၚ် ဖ္ဍိုက်ဗပေၚ် လ္တူကံၚ်ဇြဳပၞာန်တံဂှ် သွက်ဂွံဒေါအ်ဒေၚ်ကဵုဂှ်ကီု ထ္မံက်ထ္ၜးလဝ် ပ္ဍဲတၚ်လလောၚ်တြး ဂကောံအခေါၚ်အရာမၞိဟ်ဍုၚ်ဗၟာရ။
ဟိုတ်နူပရေၚ်လၞိန်ဗပိန်ဗ္တိုက်သ္အး ပကီုပရာပ် ကုပေါဲထ္ၜးဆန္ဒ ဒစဵုဒစးဒပ်ပၞာန်တံဂှ်တုဲ ဂကောံညးချဳဒရာၚ်ကတိုၚ်ကၟဟ် ဒးပါဲဒလေတ်အာလဝ် ဍုၚ်သ္အာၚ်တံဂှ် ဒပ်ပၞာန်ဗၟာဝွံ သွက်ဂွံကလိလောန် ပွဓဇန်ကြမ်ကြ မဇၞော်တဴလောန်အာကဵုသၞောတ်တံဂှ် ဒစးဒုၚ်ပလေဝ်ပလေတ်ဒၟံၚ်တုဲ မၞိဟ်ကလိလောန်လဝ်ဒုဟ်အဓိက ညံၚ်ကၟိန်ဍုၚ်ဟွံညိၚ်ဝတ် ကေုာံ ညံၚ်ဂီုကၠီုစပ်ကဵုဒေသ ဟွံမွဲဂှ်ဝွံ ဒှ်ဒပ်ပၞာန်ရဏောၚ်ဂှ် ဟီုလဝ်ရ။
ပါဲတး ကံၚ်ဇြဳပၞာန်တုဲ သွက်အမှုရာဇဝတ်ဍုၚ်သ္အာၚ် ညးတံ မကလိလောန်လဝ်တံဂှ် ကဵုဒုၚ်တာလျိုၚ်မှဟေၚ် ကလိဂွံအာ ပရေၚ်ၜိုဟ်လလမ် တန်တဴအာဍာ်ဇမၠိၚ်ဂှ်ဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဂကောံသ္ပစၞးကၟိန်ဍုၚ်ဗၟာ ၂၇၀ ပြၚ်ဂှ်ရ။
ဟိုတ်နူကြုက် ထံက်ပၚ်ရီုဗၚ်ဒၟံၚ် ကံၚ်ဇြဳပၞာန် ကေုာံ ဟိုတ်နူပေါဲရုဲမာဲ ကံၚ်ဇြဳပၞာန် စဳဇန်လဝ်တံဂှ်တုဲ ဖန်ဗဒှ်ဒၟံၚ် ညံၚ်ဆန္ဒညးဍုၚ်ကွာန်ဍုၚ်ဗၟာတံ ဇြဟတ်ဂွံဍိုန်လျအာဂှ်လေဝ် ဂကောံပါလုပ် ပ္ဍဲတၚ်လလောၚ်တြးလၟုဟ်ဏံ ဟီုရ။
ဂကောံရပ်လွဟ်ကောန်ဍုၚ်အရၚ်တံဝွံ ပ္ဍဲကဵုပၠန်ဂတးဍုၚ်ဗၟာဂှ် ဒှ်ဂကောံပါလုပ်ဒၟံၚ် ဂတအိုတ်တံတုဲ ပ္ဍဲဒေသညးတံတှ်ေ ဒှ်ဂကောံမၞုံကဵုအဝဵုတုဲ သွက်သၞောတ်ဖေဝ်ဒရာဒဳမဝ်ကရေဇြဳအနာဂတ်ဂှ် ဒှ်ဂကောံအဓိကတံရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ကံၚ်ဇြဳပၞာန်ဝွံ ဒှ်ဂကောံဟွံလုပ်သၞောဝ်တုဲ ပ္ဍဲဍုၚ်ဗၟာ ညံၚ်ပြသၞာဂွံက္တဵုဒှ်ဂှ်လေဝ် ဒှ်တမ်ရိုဟ်အဓိကဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သွက်ဂွံဒေါအ်ဒေၚ်ကဵု ပရေၚ်ဗ္တိုက်တံ လွာဲဂှ်ဂှ် ကြုက်ကဵုလဝ်ဇြဟတ်ဂရိုဟ်တုဲ ဂကောံရပ်လွဟ်တအာၚ်ဂှ်တှ်ေ ပံၚ်တောဲအာကဵု NUG ဟွံသေၚ်တုဲ ပေါဲဗ္တိုက်တံလေဝ် ဝေၚ်အာဟွံသေၚ်ရပုဟ်ဂှ် လလောၚ်တြးလဝ်ရ။
ပ္ဍဲကဵုဂကောံအာတ်မိက်လဝ် ကြုက်တံ သာ်ဏံဂှ် ဂကောံမှာဇန်ဂမၠိုၚ်၊ ဂကောံပၠန်ဂတးဂမၠိုၚ်၊ ဂကောံရိုဝ်ဟေန်ဂျာ ကေုာံ ဂကောံကောန်ဍုၚ်အရၚ်တံ ပါလုပ်ဂှ် ဂွံတီကေတ်ရ။
နကဵုညးတံ ဒက်ဝဲက္ဍုဟ်ဒၟံၚ် ကုကြုက်ဟွံသေၚ်ကီုလေဝ် လုပ်စိုပ်ပလာပ်ပထုဲဒၟံၚ် ပ္ဍဲကာအပ္ဍဲဍုၚ် မွဲမွဲဍုၚ်ဂှ်ဝွံ ဒှ်ကိစ္စသ္ဇက်ဂွံဒုၚ်တဲမာန်ဟွံသေၚ်ပုဟ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဂကောံဂှ်ရ။
ကြုက်ဂှ်တှ်ေ နကဵုညးတံ ဒဒှ်ရဂကောံဇြဟတ်ဍုၚ်သ္အာၚ်တံ လုပ်စိုပ်ပလာပ်ပထုဲဒၟံၚ် ကာအပ္ဍဲဍုၚ် ဍုၚ်ဗၟာဂှ် ဒဒှ်ရဒစဵုဒစးဂှ် လလောၚ်တြးလဝ်ကီုလေဝ် အလဵုညးတံ လုပ်စိုပ်ကောပ်ကာဲအုပ်ဓလီုဒၟံၚ်ရ။
Ref: ANI