တာကာ၊ သေပ်တေမ်ဗာ ၁၉
သၟာပရိုၚ်မဳဒဳယျာၜါတၠ ကေုာံ အ္စာကၞေဟ်မွဲတၠ ဒးဒုၚ်စောဲစပ် ဒဒှ်ရပါလုပ်လဝ် ပ္ဍဲပရေၚ်ပကီုပရာပ်ဗ္တိုက်လဝ် ပေါဲထ္ၜးဆန္ဒ မပလှ်ဖျေံလဝ် သ္ကိုပ်ဝန်ဇၞော် တၠအဝဵုတြေံ ယှုက်ဟာသဳနာဂှ် ဒပ်ဗၠာဲသၟိၚ်ဗေန်ဂလာန်ဒေတ်တံ ရပ်ဒက်ဏာလဝ် နကဵုရဳမိန် ပ္ဍဲဂိတုသေပ်တေမ်ဗာ ၁၇ တေံရ။
ညးမၞုံသစ္စာ လ္တူအလဵုအသဳ သ္ကိုပ်ဝန်ဇၞော်တြေံ ဟာသဳနာ ကေုာံ ဗော်ညး အဝါမဳလိဂ်တံဝွံ ပ္ဍဲကဵုဒးဆေၚ်ဒၟံၚ်မုက် နကဵုတၚ်စောဲစပ်နာနာဂှ် ဣဏံဝွံ ဒှ်တၚ်စောဲစပ် မံက်တိတ်ကၠုၚ် လက္ကရဴအိုတ်ရ။
အမာတ်ကၠတ်ထဝ်တြေံ ကေုာံ ဝန်ဇၞော် နူလက်ထက်အလဵုအသဳ ကၠာတေံဂှ်လေဝ် ဒးဒုၚ်စောဲစပ်လဝ် နကဵုဂဗုတ်ဂစိုတ်မၞိဟ် မဒှ်ရ။
နကဵုတၚ်စောဲစပ် ပကီုပရာပ် လ္တူညးထ္ၜးဆန္ဒတံဂှ် သၟာပရိုၚ်မဳဒဳယျာ ဒးဒုၚ်ရပ်လဝ် နွံကၠုၚ် ဟွံအောန်နူကဵု ၂၅ တၠတုဲ နကဵုညးတံ ဒဒှ်ရပ္တိုန်ဒုဟ်ဗျိပၠုတ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး ဂကောံအ္စာပရိုၚ်ဟွံမွဲကဵုပယျဵုဒၞက် ပရေၚ်မၚ်ရံၚ်မဳဒဳယျာတံရ။
ဂဗုတ်ဆေၚ်စပ်ကဵုပရေၚ်ဂစိုတ်မၞိဟ် စောဲစပ်လဝ် လ္တူညးဒးဒုၚ်ရပ်လၟုဟ် ပိတၠဂှ်ဝွံ ဒှ်ဂဗုတ် ကလောကောဒေံ ညးမဒးပြဟ်လလုဲအာ ပ္ဍဲပေါဲထ္ၜးဆန္ဒတုဲကၠုၚ်တေံ ပံက်လဝ်တံ မဒှ်ရ။
အေဝ်ဒဳတာ လိက်ပရိုၚ်လၟေၚ်တ္ၚဲ Bhorer Kagoj ယှယာမဝ် ဒူဟာ ဒးဒုၚ်ရပ်လဝ်ဂှ်ဝွံ ဂွံမွဲသတ္တာဟယျတုဲ သ္ဇက်ဂွံဒးဆေၚ်အာမုက် ဂဗုတ်ဂစိုတ်မၞိဟ် နွံဒၟံၚ်ရောၚ် ဒပ်ဗၠာဲသၟိၚ် ဗေန်ဂလာဒေတ် ဟီုရ။
သ္ကိုပ်အေဝ်ဒဳတာ Ekattor TV မိုဝ်သာမ်မေဝ် ဘာဘူလေဝ် ဒးဒုၚ်ရပ်လဝ်တုဲ ဌာန်ပရိုၚ်ညးတံ သီုၜါဂှ်ဝွံ ဒှ်ဌာန်ပရိုၚ် ထံက်ဂလာန် သ္ကိုပ်ဝန်ဇၞော်တြေံ ဟာသဳနာ မဒှ်ရ။
အ္စာကၞေဟ် ယှဟဳရာ ကာဘာလေဝ် ဒးဒုၚ်ရပ်ဒက်လဝ် နကဵုတၚ်စောဲစပ် လအာတုပ်သာ်ဏံရဂှ် သ္ကိုပ်ဗ္ဒိုပ် နူဗ္ဒိုပ်ဗၠာဲသၟိၚ် ရာမ်နာ လ္တူဍုၚ်တာကာဂှ် ဟီုရ။
ကာဘာဝွံ သၟာပရေၚ်ဍုၚ်ကွာန် ဒစဵုဒစး သ္ကိုပ်ဝန်ဇၞော်တြေံ ဟာသဳနာတံဂှ် ပ္တိုန်ရုၚ်သၞောဝ်ဓဝ်ပၞာန်တုဲ ဒးစၟဳတ်ထေက်ရောၚ် ဒှ်ညးဖ္တိုက်ဖ္အောဝ်လဝ်တုဲ ဒးဒုၚ်ညာတ်လဝ် နဒဒှ်ပွပ္တိတ်ဇြဟတ် သွက်ဂွံၚးတးပသောၚ် သၟာပရေၚ်ဍုၚ်ကွာန် လ္ပာ်ဒစဵုဒစးတံ မဒှ်ရ။
အလဵုအသဳ သ္ကိုပ်ဝန်ဇၞော်တြေံ ဟာသဳနာဝွံ ရပ်ဒက်မၞိဟ် ကဵုဂအုံဗွဝ်ကီု၊ ဂစိုတ်ဂယိုၚ် သၟာပရေၚ်ဍုၚ်ကွာန် လ္ပာ်ဒစဵုဒစးတံ မ္ၚးဗွိုၚ်သၞောဝ်တံ မပါလုပ် ဒးဒုၚ်စောဲစပ်လဝ် နကဵုဂဗုတ်ဖံက်ပ္ကဝ်သၞောဝ် ဗွဲမဂၠိုၚ်ဂၠေၚ်ရ။
စဵုကဵုအခိၚ်ဟာသဳနာ ဒးဂြိပ်တိတ်အာ အိန္ဒိယ အပ္ဍဲပေါဲထ္ၜးဆန္ဒ လအ်အာပွိုၚ်သတ္တာဟမဂၠိုၚ်ဂၠေၚ်ဂှ် အပံၚ်လၟိဟ်မၞိဟ် ၆၀၀ ဒးချိုတ်အာလဝ်ရ။
ကုလသမဂ္ဂဂှ်တှ်ေ လၟိဟ်မၞိဟ်ဒးချိုတ်အာလဝ် ဍာံဍာံဂှ်ဝွံ ဂၠိုၚ်နူဏံမာန်တုဲ သွက်ဂွံစောဲစပ် ကုညးမဆက်စပ်ကဵု ပရေၚ်ပကီုပရာပ်တံမာန်ဂှ် ပကောံပ္ကေဝ်ဒၟံၚ် တၚ်နၚ်တံယျဂှ် ဟီုလဝ်ရ။
Ref: AFP