သဓီု၊ သေပ်တေမ်ဗာ ၂၁
ဒၟါနူဇြဟတ်ဒပ်လေၚ်ဒိုက်တုဲ ကံၚ်ဇြဳပၞာန် ကော်ကၠုၚ်ဒၟံၚ် တန်ဗ္တောန်ကွတ်ပၞာန် လၟေၚ်အဆက်က်ဂှ်ဝွံ ပ္ဍဲတွဵုရးဍုၚ်မန် ပွိုၚ်ဍုၚ်သဓီုဂှ် ရဲဒးဒုၚ်ကော်လဝ် သွက်ဂွံလုပ်ပၞာန်တံ ယဝ်ရဂြိပ်တိတ်မ္ဂး ရပ်ဒက်အာ ဂြောဝ်ဂတာတံဏောၚ် ဒဒှ်ရဘပဠမံၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန် ကေုာံ ကောန်ဂကောံသ္ကိုပ်အုပ်ဓုပ်တံဂမၠိုၚ်ဝွံ စနူဂိတုသေပ်တေမ်ဗာလၟုဟ်တုဲ လ္တူဍုၚ်သဓီုကီု ပ္ဍဲကဵုကွာန်အရာပ်လ္ၚဵုတံဂှ် ဗက်ပလံၚ်ဗစိုပ်ဒၟံၚ် လိက်ကော်ဘိက် ပ္ဍဲကဵုသ္ၚိဒၟံၚ် ညးစရၚ်မပါလဝ် သွက်ဂွံလုပ်ပၞာန်တံဂှ်ရ။
ပ္ဍဲအရာပလံၚ်ဗစိုပ် လိက်ကော်ဘိက် သွက်ဂွံလုပ်ပၞာန်တံဂှ် နကဵုညးမပါလုပ်လဝ် ပ္ဍဲကဵုစရၚ်သွက်ဂွံလုပ်ပၞာန်တံ လ္ပဂြိပ်အိုတ်ဂှ်ကီု ယဝ်ရဂြိပ်မ္ဂး ရပ်ဒက်အာဂြောဝ်ဂတာညးတံဏောၚ်ဂှ် ဘပဠကၠုၚ်ရ။
ပ္ဍဲအရာကော်ရဲလုပ်ပၞာန်တံဂှ် ကောန်ဒပ်ကံၚ်ဇြဳပၞာန်တံ စွံပွန် ကုညးကဵုလှုဲဟွံမာန်တံ၊ ရဲဟွံထံက်ဂလာန် ကုညးတံ၊ ကဆံၚ်မၞိဟ်သ္ဇိုၚ်တံကဵု ဂြောဝ်ဂတာကၠောန်မွဲတ္ၚဲစမွဲတ္ၚဲတံ အဓိကတုဲ ကော်ကေတ်ဒၟံၚ်ရောၚ် ဂွံတီကေတ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ကုညးမပါလုပ် ပ္ဍဲစရၚ်သ္ဂောံလုပ်ပၞာန်တံဂှ် ဗက်ရပ်ဒက်ကော် ပ္ဍဲသ္ၚိဒၟံၚ်တံကီု၊ အခိၚ်လုပ်စၟဳတ် စရၚ်ကၟုဲအခိၚ်ဗ္တံဂှ် ရပ်ဒက်ဏာတံ ကၠောန်သ္ပဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။
အတိုၚ်ဂလာန် ညးဒေသတံဂှ်မ္ဂး အပ္ဍဲဂိတုဏံ ပ္ဍဲပွိုၚ်ဍုၚ်သဓီု ညးဒးဒုၚ်ရပ် စပ်ကဵုပရေၚ်လုပ်ပၞာန်ဂှ် ဟွံအောန်နူကဵု ၃၀ တၠ နွံမာန်ရောၚ် ဟီုဂးဒၟံၚ်အိုတ်ကီုလေဝ် နကဵုသြၚ်လောန်တိုၚ်(မ်) စပ်ကဵုတၚ်နၚ်ဏံတုဲ သ္ပဒတန်ဟွံမာန်ဏီရ။
လ္ပာ်ကံၚ်ဇြဳပၞာန် ကော်စိုပ်သ္ဂောံလုပ်ပၞာန်ကီု၊ နကဵုဟိုတ်ဂီုကၠီုအခိၚ်ဗ္တံဂှ် ကၟာတ်လဒဵုစၟဳတ်တံ ဂၠိုၚ်ကၠုၚ်တုဲ လ္တူဍုၚ်သဓီု အခိၚ်ဗ္တံ ၈ နာဍဳတုဲ မၞိဟ်တိတ်မ္ၚးအာကၠုၚ် စဵုကဵုဟွံမွဲ အောန်ဒၟံၚ်တုဲ အကြာညးဒေသတံ ပရေၚ်ဒှ်ဓဝိၚ်တံ သၠုၚ်တိုန်ဒၟံၚ်ရ။
ဇၟာပ်ပေါဲဗ္တိုက်တဝ်စၞေဟ်ပၠန်ဂတး အလုံဍုၚ်မွဲ ကံၚ်ဇြဳပၞာန် မကျဗြံဒၟံၚ်ဂှ်ဝွံ ပ္ဍဲကဵုတွဵုရးဍုၚ်မန် မထိၚ်ဒက်လဝ်ဂှ် ကော်ကေတ်ဒၟံၚ် တန်ဗ္တောန်ကွတ်ပၞာန်တံ စဵုကဵုလၟေၚ် ၅ ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲတွဵုရးဍုၚ်မန် တန်ဗ္တောန်ကွတ်ပၞာန် နူလၟေၚ် (၁) စဵုကဵု လၟေၚ် (၅) ညးဒးဒုၚ်ပကောံပကောန်ပၞာန် နွံကၠုၚ် စဵုကဵု ၁၂၀၀ ပြၚ်ရ။
ညးဒးဒုၚ်ပကောံပကောန်ပၞာန်တံဂှ် ကဵုဒၟံၚ်တန်ဗ္တောန် ပ္ဍဲကဵုဘာတန်ဗ္တောန်ပ္ကတ်ပ္ကေၚ်သ္ဇိုၚ်ပၞာန် စၟတ် (၉) ဖျေံသ္ဇိုၚ်ပွိုၚ်ဍုၚ်သဓီုကဵု ဘာတန်ဗ္တောန်တန်သၠုၚ် ဒပ်ပၞာန် တကက−၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗုတံရ။
ပရိုၚ်−သြၚ်လောန်တိုၚ်(မ်)
ဗီု−MOI