မတ်မလီု၊ သေပ်တေမ်ဗာ ၂၁
သွက်ဂွံဒက်ပ္တန် အလဵုအသဳဍုၚ်မန်မွဲ မသ္ပစၞး ဍုၚ်မန် ညးဍုၚ်ကွာန်မန်တံ ဗွဲမပြဟ်ဂှ် ပ္ဍဲဂိတုသေပ်တေမ်ဗာ ၂၀ တေံ လလောၚ်ပ္တိတ်ကၠုၚ် နဒဒှ်တၚ်တုပ်စိုတ် ကောံဓရီုပရေၚ်ဍုၚ်ကွာန်သၟတ်မန် ၂၀၂၄ ရ။
ဂကောံပရေၚ်ဍုၚ်ကွာန်ဂမၠိုၚ်၊ သမဂ္ဂကွးဘာ၊ ဂကောံမှာဇန် ကေုာံ ဂကောံဇြဟတ်ရပ်လွဟ်တံဒှ်တမ် ညးစၞးသၟတ်မန် နူကဵု ၁၁ ဂကောံဝွံ အပ္ဍဲဂိတုဏံ ကၠောန်သ္ပလဝ် ပေါဲသဳကၠဳဆဵုဂဗပရေၚ်ဍုၚ်ကွာန် ပ္ဍဲတိဍာ်ဗၠးၜးမွဲဒၞါဲရ။
ပ္ဍဲကဵုတၚ်တုပ်စိုတ် ပေါဲသဳကၠဳဂမၠိုၚ် တၚ်နၚ်အဓိကဂှ်တှ်ေ ဂကောံပၠန်ဂတး ပ္ဍဲဍုၚ်မန်သီုဖအိုတ် ပါလုပ်တုဲ သွက်ဂွံဒက်ပ္တန် အလဵုအသဳဍုၚ်မန်မွဲ မသ္ပစၞး ကုဍုၚ်မန် ညးဍုၚ်ကွာန်မန်တံ ဗွဲမပြဟ်ပြေဟ် မဒှ်ရ။
မေန်တာန်လွေန် ညးဒုၚ်တာလျိုၚ် ဇြဟတ်ရာမညဖေဝ်ဒရာခေတ်တၟိ NRFF မပါလုပ် ပ္ဍဲတၚ်လလောၚ်တြးဂှ် သွက်ဂွံဒက်ပ္တန်ဍုၚ်မန် မၞုံကဵုအခေါၚ်စၞောန်ပျးအပိုၚ်မာန်ဂှ် အလဵုအသဳဍုၚ်မန်မွဲ မသ္ပစၞးညးဍုၚ်ကွာန်တံ မံက်ဂတဝ်မှဟေၚ် ဂွံထ္မံက်ရုပ်ရဴကမၠောန် ပြေပြံၚ်ဏောၚ်ဂှ် ဟီုရ။
“ကာလလၟုဟ်ဝွံ ဗ္တိုက်သရိုဟ်သၞောတ်တၠအဝဵုပၞာန်တုဲ ဒှ်ကာလဒက်ပ္တန်ဒၟံၚ် ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳရ။ အေ ဂှ်တှ်ေ ပ္ဍဲပရေၚ်ဗ္တိုက်သရိုဟ်သၞောတ်တၠအဝဵုပၞာန်ဂှ်လေဝ် ဒပ်ရပ်လွဟ်တံပံၚ်တောဲတုဲ ညံၚ်ဂွံဗ္တိုက်သရိုဟ်အာ သၞောတ်တၠအဝဵုပၞာန် ဗွဲမစှ်ေကဵုသၞောတ် မစှ်ေကဵုမဟာဗျူဟာဂှ်ကီု၊ လ္ပာ်ပရေၚ်အာက္ဍိုပ်ပရေၚ်ဍုၚ်ကွာန်ဂှ်လေဝ် သွက်ဂွံဒက်ပ္တန်အာ ဍုၚ်မန် မဍိုက်ပေၚ်ကဵု အခေါၚ်စၞောန်ပျးအပိုၚ် ညးဍုၚ်ကွာန်မန်တံ မနွံဒၟံၚ်ပၟိက်တံဂှ် အလဵုအသဳဍုၚ်မန် သ္ပစၞးညးဍုၚ်ကွာန်မွဲ မံက်ဂတဝ်မှဟေၚ် ဂွံထ္မံက်ရုပ်ရဴကမၠောန် ပြေပြံၚ်ဏောၚ် မဒှ်ရ” သာ်ဝွံ သ္ဂးရ။
ပ္ဍဲတၚ်တုပ်စိုတ်ဂှ်တှ်ေ နကဵုဂကောံဇြဟတ်ပၠန်ဂတးရပ်လွဟ် အပ္ဍဲဍုၚ်မန်ဂမၠိုၚ် ညံၚ်ရဴဒပ်ပံၚ်ကောံ သွက်ဂွံပံၚ်တောဲရေၚ်တၠုၚ်အာဂှ်လေဝ် ပါလုပ်ရ။
သ္အာၚ်နူဂှ်ပၠန် ပေါဲရုဲမာဲ ညံၚ်သၞောတ်တၠအဝဵုပၞာန် ဂွံဆက်အာလမျီုဂှ် ညးဍုၚ်ကွာန်တံကီု ဂကောံဇြဟတ်သီုဖအိုတ် သွက်ဂွံဒစဵုဒစးပၠန်ဂတး ဗ္တိုက်သရိုဟ်အာ မဒှ်ရ။
မွဲလ္ပာ်ဂှ်ပၠန် အကာဲအရာပရေၚ်ဗ္စာရဏာမၞိဟ် မက္တဵုဒှ်ဒၟံၚ် ပ္ဍဲဍုၚ်မန်ကဵု ပ္ဍဲဒေသမဆက်စပ်တံဂှ် ဗွဲမစိုပ်တရဴ ဂွံရပ်စပ်သောၚ်ကလးမာန် ဂကောံဇြဟတ်ပၠန်ဂတးတံ ညံၚ်ဂွံဆက်စၠောံပံၚ်ကၠောန်အာဂှ် တုပ်လဝ်စိုတ်ရ။
ပ္ဍဲပေါဲသဳကၠဳဆဵုဂဗ ပရေၚ်ဍုၚ်ကွာန်သၟတ်မန်ဂှ် သဳကၠဳလဝ် ပရေၚ်ဍုၚ်ကွာန်၊ ပရေၚ်ပၞာန် ကေုာံ အကာဲအရာပရေၚ်ဗ္စာရဏာမၞိဟ် ဍုၚ်မန်တံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သွက်ပရေၚ်ဒစဵုဒစးသၞောတ်တၠအဝဵုပၞာန်၊ သွက်ပရေၚ်ဒက်ပ္တန်ကၟိန်ဍုၚ်ပံၚ်ကောံ ဖေဝ်ဒရာဒဳမဝ်ကရေဇြဳအနာဂတ်တေံဂှ် အကြာဂကောံဇြဟတ်ဂမၠိုၚ် ညံၚ်ပရေၚ်ဆက်စၠောံ ကေုာံ ပရေၚ်ပံၚ်တောဲ ဇြဟတ်ဂွံခိုဟ်ကၠုၚ်ဂှ်လေဝ် သဳကၠဳလဝ်ရ။
ဟိုတ်ဂှ်ရ တၚ်ရန်တၟံ သ္ဂောံဒစဵုဒစးသၞောတ်တၠအဝဵုပၞာန် ကေုာံ သ္ဂောံဒက်ပ္တန် ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳတံ ဂွံအံၚ်ဇၞးမာန် နကဵုသၟတ်မန် နူကဵုဂကောံဇြဟတ်နာနာ လလောၚ်ပ္တိတ်ကၠုၚ် တၚ်တုပ်စိုတ်ရ။
ဂကောံဇြဟတ် ပံၚ်တောဲလလောၚ်ပ္တိတ်တံဂှ်တှ်ေ ကံၚ်ဇြဳဖေဝ်ဒရာဍုၚ်မန်−ညးစၞးသၟတ်၊ ဇြဟတ်ရာမညဖေဝ်ဒရာခေတ်တၟိ NRFF ၊ သမဂ္ဂကွးဘာတက္ကသိုလ်မတ်မလီု၊ ဒပ်ပၠန်ဂတးဍုၚ်မန်၊ ဒပ်စဵုဒၞါဍုၚ်မန်၊ ဒပ်ဒမၠုက်ရေဝ်၊ ဌာန်ဒတန်အခေါၚ်အရာမၞိဟ်ဍုၚ်မန် ကေုာံ ဂကောံဟွံမိက်ထ္မံက်ယၟု ပန်ဂကောံတံ ပါလုပ်ရ။
ပရိုၚ်−သြၚ်လောန်တိုၚ်(မ်)
ဗီု−MSFC/NMSP-AD