မတ်မလီု၊ သေပ်တေမ်ဗာ ၂၇
အလုံဍုၚ်မွဲ ဟိုတ်နူဘဲဒဏ်လဗိုတ်ကျာ တိုၚ်ဝှောန်ယာဂဳတုဲ တိဨကတဵုသြောံ ဗၞတ်ထပှ်ကိုဋ်ဘာ် လီုလာ်အာတုဲ ပ္ဍဲရာသဳသြောံသ္ၚုဂတဏံ ၚုဟ်သ္ၚုက္ဍၚ်ကၠုၚ်မာန်တုဲ ဇီုကပိုက်ကၠုၚ် သီုကဵုကဏ္ဍဗၞိက်ပလံၚ်ပ္တိုန်တံမာန်ဂှ် တၠကမၠောန်သ္ၚုတံ သ္ၚဳဂၠိပ်လဝ်ရ။
ဟိုတ်နူဍာ်ဇၞော်ဍာ်ကလိုပ်တုဲ ပ္ဍဲကဵုတွဵုရး ကေုာံ ရးဒေသတံဂှ် အပံၚ်ဖအိုတ် ပ္ဍဲကဵု ၅၄ ပွိုၚ်ဍုၚ်ဂှ် တိဨကတဵုလွဳသြောံ ဗၞတ်ထပှ်ကိုဋ်ဘာ် လီုလာ်အာလဝ်ရောၚ် ဒုက္ဍိုပ်သ္ကိုပ်ဒပ်ပၞာန်သီအဝဵုလေဝ်ဒှ် ဒုသ္ကိုပ်ဗိုလ်ဇၞော် သဵုဝေန်ဂှ် ဟီုပ္တိတ်ကၠုၚ် ပ္ဍဲဂိတုသေပ်တေမ်ဗာ ၂၄ တေံရ။
ဍုၚ်ဗၟာ တိဨကတဵုသြောံ ၁၄ ပြကောဋိကိုဋ်ပြၚ်နွံဂှ်ဝွံ ပ္ဍဲကဵုဘဲဍာ်ဏံဂှ် ဗ္ဒါဲထပှ်ကိုဋ်ဘာ်ပြၚ် လီုလာ်အာလဝ်တုဲ တော်ကဵုတၟံကၠံမ္ဂး ဟွံအောန်နူကဵု ၅ တၟံကၠံ ဒးလီုလာ်ဆောံလေၚ်အာလဝ်ရ။
တၠကမၠောန်သြောံမွဲတၠဂှ်တှ်ေ ဟိုတ်နူဍာ်ဇၞော်ဍာ်ကလိုပ်တုဲ ဒမြိပ်သြောံတိတ် စှ်ေကၠုၚ် ဟွံအောန်နူကဵု ပန်တၟံကၠံမာန်တုဲ လၟိဟ်သြောံသ္ၚု ပလံၚ်ပ္တိုန်ဍုၚ်သ္အာၚ်တံ စှ်ေကၠုၚ်မာန်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဘဲဍာ်ဏံဂှ် ဒမြိပ်သြောံတိတ် ၜိုတ်ပန်တၟံကၠံ ဒးအာမာန်ဏောၚ်။ ဗၞိက်ပလံၚ်ပ္တိုန်ပိုယ်တံဂှ် ၂၀ တၟံကၠံနွံတှ်ေ ၚုဟ်မးဗၞိက်ပလံၚ်ပ္တိုန် စှ်ေအာလေဝ် ဒှ်မာန်ရ။ လၟိဟ်ဗၞိက်ပလံၚ် ယအ်အာဏောၚ်။ ဥပမာ ကၠာတေံ ပလံၚ်ပ္တိုန် ၂၀ တၟံကၠံမာန်တှ်ေ သၞာံဏံ ၜိုတ် ၁၇ တၟံကၠံရ ပလံၚ်မာန်။ ၜိုတ် ၁၆ တၟံကၠံရ ပလံၚ်မာန် ဒှ်အာသာ်ဏံမာန်ရ’ သာ်ဝွံ သ္ဂးရ။
သ္အာၚ်နူဂှ်ပၠန် ယဝ်ရၜတ်ကၞာတ် ပရေၚ်လီုလာ်ကဵု တဵုလွဳလဝ်တံဂှ်မ္ဂး အပ္ဍဲပရေၚ်စသုၚ်အပ္ဍဲဍုၚ်ဂှ် ဇီုကပိုက်ဟွံမာန်ကီုလေဝ် တန်တဴကဵုလ္တူသြောံသ္ၚုတိတ်ဂှ်တုဲ ၚုဟ်သ္ၚု နူ ၅ တၟံကၠံဂှ် သၠုၚ်တိုန်ကၠုၚ် စဵုကဵု ၁၀ တၟံကၠံမာန်ရောၚ် ညးသ္ၚဳဂၠိပ်လဝ်ရ။
သၟာဗ္ၚမွဲတၠဂှ်တှ်ေ ဟိုတ်နူဍာ်ဇၞော်တုဲ ဒမြိပ်သြောံတိတ် မွဲဨကဂှ် ဒးဆောံလေၚ်အာ ၜိုတ် ၄၀ နတုဲ အခိၚ်လၟုဟ် ကဵုကၠုၚ်မပတမ်မ္ဂးလေဝ် ဂွံတဵုလွဳ ဒှ်ဟွံမာန်ရပုဟ်ဂှ် ဟီုရ။
“ ဒးတော်တှ်ေ မွဲဨက ပိုယ်တံဆောံလေၚ်ဂှ် ၚုဟ်ပတမ်မ၊ ၚုဟ်ပါ်မ၊ ၚုဟ်ဝါဲတံဂှ်တှ်ေ ၜိုတ်ပိကိုဋ်နွံဏောၚ်။ သြောံတိတ်ဂှ်တှ်ေ ဆောံသရောပ်ကေတ်မ္ဂး ၜိုတ် ၄၀/၅၀ န နွံဏောၚ်။ ပိုယ်တံတှ်ေ ပ္ဍဲကဵုကၠောန်လဝ် ၜိုတ် ၂၀ ဨကဂှ် ၜိုတ် ၁၀ ဨကဂှ်တှ်ေ ဒးဆောံလေၚ် လီုအာရ။ အခိၚ်လၟုဟ်မှ ကဵုမပတမ်တံဂှ်တှ်ေ ဟွံဂတာပ်ရပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် သြောံတံဂှ်တှ်ေ ပါဲနူကဵုဍာ်ဇၞော်တုဲ ဒးဆောံလေၚ်ဂှ် ဟိုတ်နူဒးစၟပလီုသြောံတုဲ ဒးဆောံလေၚ်အာတံ နွံကီုလေဝ် ဌာနပရေၚ်တဵုလွဳ သၟဝ်တဲကံၚ်ဇြဳပၞာန်ဂှ်တှ်ေ ဒဵုကဵုအခိၚ်လၟုဟ် ထံက်ပၚ်ရီုဗၚ်ကဵု နတဲဟွံမွဲဏီပုဟ်ဂှ် ညးဆက်ဟီုရ။
က္ဍိုပ်သ္ကိုပ်ပၞာန်သီအဝဵုဂှ်တှ်ေ ဒၟါနူခံက်သြောံတံ၊ ခံက်တဵုလွဳသၞေဝ်ကေဝ်တၞဟ်ဟ်တံ လီုလာ်အာလဝ်ဂှ်ရ ထံက်ပၚ်ရီုဗၚ်ကဵုအာဏောၚ်ဂှ် ပ္ဍဲဂိတုသေပ်တေမ်ဗာ ၁၈ တုဲကၠုၚ်တေံ အခိၚ်ဆဵုဂဗကဵု ညးဍုၚ်ကွာန်ဒးဘဲဍာ် ပွိုၚ်ဍုၚ်ပျေန်မနာဂှ် ဟီုလဝ်ရ။
ပ္ဍဲဍုၚ်ဗၟာဂှ်တှ်ေ လၟေၚ်သၞာံ လျိုၚ်တာန်သြောံ တိတ်ဒၟံၚ် ဗ္ဒါဲ ၁၄ ပြကောဋိကိုဋ်တုဲ ပ္ဍဲကဵုဏံ ၁၀ ပြကောဋိကိုဋ်ဂှ် စသုၚ်အပ္ဍဲဒေသတုဲ သှ်ေလျိုၚ်တာန်သြောံ ဗ္ဒါဲ ၂ ပြကောဋိကိုဋ်ဂှ်တှ်ေ ပလံၚ်ပ္တိုန်သွံတြးဒၟံၚ် ဍုၚ်သ္အာၚ်တံရောၚ် ဂွံတီကေတ် အတိုၚ်တၚ်နၚ် ဌာနပရေၚ်တဵုလွဳတံဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ