နေဗျဳဒဝ်၊ သေပ်တေမ်ဗာ ၂၇
ညံၚ်ပရေၚ်အပ္ဍဲဍုၚ်ဗၟာ ဟွံဂွံညိၚ်ဝတ်ဂှ် အမေရိကာန် ထံက်ပၚ်ကဵုဒၟံၚ်သြန် ကုဂကောံကဝ်က MNDAA, ဂကောံတအာၚ် TNLA ကေုာံ အလဵုအသဳညဳသၟဟ်ဂကူ NUG တံဂှ်ရောၚ် ကံၚ်ဇြဳပၞာန် စောဲစပ်ကၠုၚ်ရ။
အပ္ဍဲကာလသီအဝဵုဏံ ကံၚ်ဇြဳပၞာန် ဒးဆေၚ်ဒၟံၚ်မုက် ပၞာန်ပၠန်ဂတးအလုံဍုၚ်မွဲဂှ် ပ္ဍဲဂိတုသေပ်တေမ်ဗာ ၂၅ အခိၚ်ဇိုၚ်သဝ်တ္ၚဲဂှ် လလောၚ်ပ္တိတ်လဝ် နကဵုက္ဍိုပ်လိက် မိဿဟာဲညးဍုၚ်ကွာန်ဍုၚ်ဗမာဍာံဍာံဂှ် ဍုၚ်ကြုက် မဒှ်ရ။
MNDAA ကေုာံ TNLA တံဝွံ ဒက်မဟာမိတ်ပရေၚ်ပၞာန် ကု NUG တုဲ ဗ္တိုက်ဒၟံၚ် အလဵုအသဳဗၟာရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး ကံၚ်ဇြဳပၞာန်ရ။
ကံၚ်ဇြဳပၞာန်ဂှ်တှ်ေ NUG လၟေၚ်သၞာံ ကလိဂွံဒၟံၚ်သြန်နူအမေရိကာန် ဗၞတ် ၂၀၀ ပြကောဋိကိုဋ်ဒဝ်ဠာတုဲ ပံၚ်တောဲကဵု MNDAA TNLA တံတုဲ ဓဇက်ပ္တိုန်ဒၟံၚ်ဍုၚ်ဗၟာ လ္တူဂၠံၚ်တရဴအရာအိုဿီု ဂွံလီုလာ်ဂှ်ဏောၚ်ဂှ် စောဲစပ်လဝ်ရ။
ကုဂကောံရပ်လွဟ်ကောန်ဍုၚ်အရၚ် ဒုၚ်လဝ်ယၟု EAO ဒစဵုဒစးဒၟံၚ် အလဵုအသဳအပ္ဍဲဍုၚ်တံဂှ်လေဝ် ထံက်ပၚ်ကဵုဒၟံၚ်တုဲ ဝေၚ်လဝ်ပေါဲဗ္တိုက်တံဂှ်ရ ပ္ဍဲဒေသပယျဵုတံဂှ် ပေါဲဗ္တိုက်တံ က္တဵုဒှ်ဒၟံၚ်ရောၚ် ကံၚ်ဇြဳပၞာန် ဟီုရ။
အမေရိကာန် ဒုၚ်ဖအိုတ်ဒၟံၚ်သြန် စပ်ကဵုကာအပ္ဍဲဍုၚ်ဗၟာဂှ်ဝွံ ဟိုတ်နူပရေၚ်ပိုန်ဒြပ်ညးတံ နွံဒၟံၚ် အပ္ဍဲဍုၚ်ဟွံသေၚ်တုဲ ဒှ်သွက်ဂွံဗ္တိုက်အာ ဍုၚ်ကြုက် မဒှ်လ္ပာ်ဒစဵုဒစး အဓိကဂှ်ရဏောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သၟာပရေၚ်ဍုၚ်ကွာန် ဝှ်ကြံၚ် ဥူဖေတာန်ဂှ်တှ်ေ ဒှ်အရီုဗၚ် မွဲလ္ပာ်တေံကဵုကၠုၚ်လဝ် ဟိုတ်နူပြဝကံၚ်ဇြဳပၞာန်တံဂှ်ဏောၚ်တုဲ ဟိုတ်ဂှ်ရ ဟွံဒုၚ်လုက်ဒွံ ဒှ်ဒၟံၚ်ရောၚ် သ္ၚဳဂၠိပ်လဝ်ရ။
“ ဒၟါနူပြဝညးတံတုဲ ဒှ်အရီုဗၚ် မွဲလ္ပာ်တေံ ကဵုကၠုၚ်လဝ်ဏောၚ်ဂှ် ညာတ်ကေတ်ရ။ ဆ္ဂး လ္ပာ်ဍေံတံ (စကစ) ဟွံဒုၚ်လုက်ဒွံ ဒှ်ဒၟံၚ်။ ယဝ်ရ ဟွံဒးစိုတ်ပုဟ်မ္ဂး လ္တူနူပ္တိတ်တၚ်လလောၚ်တြးသာ်ဏံဂှ် ကော်ရုၚ်ကလုတ်အမေရိကာန်တုဲ ဒစဵုဒစးတှ်ေ သာခိုဟ်ဏောၚ်။ ညအ်တှ်ေ ဒှ်အာဗဗွဲသၞောဝ်ဏောၚ်။ တၚ်လလောၚ်တြးဏံဂှ်တှ်ေ ဒှ်အာသဘဴ ညံၚ်လိက်ပံက်ထိုၚ်ရဏောၚ်” သာ်ဝွံ သ္ဂးရ။
ဟိုတ်ဂှ်ရ ဒးဟီုလ္ပာ်ညးဍုၚ်ကွာန်တံမ္ဂး သွက်ဂွံစဵုဒၞါ နူကဵုပြဝကံၚ်ဇြဳပၞာန် ထောံမခတိုဟ် နကဵုက္ၜၚ်ကျာ အရိုဟ်တ္ၚဲတံ၊ ပွရပ်ဒက်ပြိုက်ဂစိုတ်ဒၟံၚ်တံဂှ်တှ်ေ ပ္ဍဲညးဍုၚ်ကွာန်တံလေဝ် ဒးကေတ်အရီုဗၚ်ဏောၚ်ဂှ် ဥူဖေတာန် ထံက်ထ္ၜးလဝ်ရ။
ဟိုတ်ဂှ်ရ နွံပၟိက်ကဵု အရီုဗၚ်နဲပညာ ကေုာံ ပရေၚ်စသုၚ်မံၚ်စံၚ်တံဂှ်တုဲ ဍုၚ်သ္အာၚ်တံ ကဵုအရီုဗၚ်ဂှ်ဝွံ ဒးရးတုဲ လ္ပာ်ဍုၚ်ကြုက် ကဵုကၠုၚ်အရီုဗၚ်မ္ဂးလေဝ် သာခိုဟ်ဂှ် ညးဟီုလဝ်ရ။
ကံၚ်ဇြဳပၞာန်ဂှ်တှ်ေ ဍုၚ်ကြုက်ဝွံ ဒတူလိုၚ်ရီုဗၚ်ကဵု ဍုၚ်ဗမာ နဒဒှ်ဗီုညံၚ်ရဴသ္ၚိရေၚ်ကၟေၚ်ဆက်မွဲတုဲ ကဵုဇြဟတ်ဂရိုဟ် ကု MNDAA, TNLA မွဲဒမြိပ်ပယျဵုတံဂှ်တုဲ ကၟာတ်လဒဵုသၞေဟ်ကၚ်ပယျဵုတံကီု ပွမကေတ်အရေဝ်တံကီုဂှ် သၠုၚ်ပ္တိုန်ရေၚ်တၠုၚ်လဝ်ရောၚ် သ္ဂးလဝ်ရ။
သတ္တာဟတုဲကၠုၚ်တေံ နကဵု MNDAA လ္ပာ်ပရေၚ်ပၞာန်၊ ပရေၚ်ဍုၚ်ကွာန်တံဂှ် ပံၚ်တောဲအာကဵု NUG ဟွံသေၚ်တုဲ ဒေါအ်ပန်ပှော်တုဲ ပံၚ်တောဲကဵု ဍုၚ်ကြုက်တုဲ ဆဵုဂဗသဳကၠဳအာ နကဵုဂၠံၚ်တရဴပရေၚ်ဍုၚ်ကွာန်ဏောၚ်ဂးတုဲ လလောၚ်တြးလဝ်ရ။
သ္အာၚ်နူဂှ်ပၠန် ကုဗွိုၚ်ဍုၚ်သ္အာၚ် ဒစဵုဒစး ဍုၚ်ကြုက်၊ ဍုၚ်ဗမာတံဂှ် ဟွံပံၚ်တောဲ၊ ဟွံဆက်ဆောံ၊ ဟွံဒက်မဟာမိတ်ဂှ်ဝွံ ဒှ် Redline ပရေၚ်ဍုၚ်ကွာန် MNDAA ဂှ် ပ္ဍဲဂိတုသေပ်တေမ်ဗာ ၁၈ တေံ ကဵုသမ္တီ လလောၚ်ပ္တိတ်လဝ်ရ။
အပ္ဍဲပရေၚ်ပၞာန် ၁၀၂၇ သ္ကုတ်ပထမကဵု သ္ကုတ်ဒုတိယ စပ်ကဵုပရေၚ်ပၞာန်တုဲ ကံၚ်ဇြဳပၞာန် ဒးကျဗြံဂိအာ တၟာဂလိုၚ်ဂှ် MNDAA ကဵု TNLA တံဝွံ ပ္ဍဲကဵုရးသေံသၟဝ်ကျာဂှ် သီဂွံလဝ် ဍုၚ်ဟွံအောန်နူကဵု ၁၆ ဍုၚ်ရ။
ပရိုၚ်−သြၚ်လောန်တိုၚ်(မ်)
ဗီု−MNDAA