နေဗျဳဒဝ်၊ သေပ်တေမ်ဗာ ၂၈
ဂွံကံက်စရၚ်လၟိဟ်မၞိဟ်သ္ဂာဗ္တံ အလုံဍုၚ်မွဲ တ္ၚဲကြပ်ကၠုၚ်မံၚ်ဂှ် ကံၚ်ဇြဳပၞာန် ကော်ဘိက်ကၠုၚ် ဂကောံရပ်လွဟ်ကောန်ဍုၚ်အရၚ် ပါလုပ်ဒၟံၚ် ပ္ဍဲပၠန်ဂတးတံကဵု PDF တံ သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်ရ။
ကံၚ်ဇြဳပၞာန် ကျဗြံကၠုၚ်ဒၟံၚ် ပ္ဍဲကဵုပရေၚ်ပၞာန်၊ ပရေၚ်ကလုတ်၊ ပရေၚ်ပိုန်ဒြပ်တံဂှ် ပ္ဍဲဂိတုသေပ်တေမ်ဗာ ၂၆ တေံ ကော်ဘိက်လလောၚ်တြးကၠုၚ် သွက်ဂွံသောၚ်ကလးပြသၞာပရေၚ်ဍုၚ်ကွာန် နကဵုနဲကဲပရေၚ်ဍုၚ်ကွာန်ရ။
တၚ်လလောၚ်တြး ကံၚ်ဇြဳပၞာန်ဝွံ ကဵုဂကောံရပ်လွဟ်ပၠန်ဂတးတံ ဖျေံလွဟ်တုဲ ဒက်ပ္တန်နဒဒှ်ဗော်ပရေၚ်ဍုၚ်ကွာန်တုဲ သွက်ဂွံလုပ်ပြိုၚ် ပ္ဍဲပေါဲရုဲမာဲဍေံတံကၠောန်ဗဒှ်ဂှ် ဒှ်သဘဴသ္ဒးသဳကၠဳအာဏောၚ် မဒှ်ရ။
ပဒိုဝ်သဝ်တဝ်နဳ ညးမၞုံအခေါၚ်ဟီုဂး ဗော်သွးကောန်ဂကူကရေၚ် KNU ဂှ် ဟီုဒၟံၚ်သွက်ဂွံသဳကၠဳ နကဵုနဲကဲပရေၚ်ဍုၚ်ကွာန် သီုဖအိုတ်ဂှ်ဝွံ ကၠောန်ဒၟံၚ်သၟဝ်သၞောဝ်သ္ဇိုၚ် ၂၀၀၈ ဏောၚ်ဂှ်ရ ဟွံကိတ်ညဳကဵု အကာဲအရာလၟုဟ်ရပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“’သဳကၠဳအာ နကဵုနဲကဲပရေၚ်ဍုၚ်ကွာန်လၟုဟ်ဏောၚ်။ ပေါဲရုဲမာဲတံ မုတံ ဗက်ဟီုဒၟံၚ်ပြး သီုဖအိုတ်ဂှ် ကၠောန်အာသၟဝ်သၞောဝ်သ္ဇိုၚ် ၂၀၀၈ ဖအိုတ်ရဏောၚ်။ ဟွံကိတ်ညဳကဵု အကာဲအရာအခိၚ်ကာလတ္ၚဲဏံရပုဟ်။ ဟွံဒးဟီု ဟဂှ်ရလေဝ်။ ဟိုတ်ဂှ်ရ ဒးဒှ်ဂှ်တှ်ေ ဒပ်ပၞာန် သၠးကၠေံပရေၚ်ဍုၚ်ကွာန်တုဲ ပရေၚ်ပြုပြေၚ်ပြံၚ်လှာဲ မနွံပၟိက် သွက်ဒပ်ပၞာန်ဂှ် မွဲတ္ၚဲ နဒဒှ် Professional Army မွဲ ဒးနွံသၟဝ်အုပ်ဓုပ်ကောန်အရာပ်ဏောၚ်ဟီုဂှ် ပိုယ်တံ သ္ဒးဒုၚ်တဲဏောၚ်။ လၟေၚ်ကမၠောန်ဏံဂှ် ပိုယ်တံ ကၠောန်အာရဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ ပ္ဍဲဂိတုအံက်တဝ်ဗာ ၁ ဏံ ကံက်အာစရၚ်လၟိဟ်မၞိဟ်သ္ဂာဗ္တံ သ္ဂောံဒှ်အထံက်အပၚ် သွက်စရၚ်မာဲတံဂှ်ရဏောၚ်တုဲ လၟေၚ်ကမၠောန် ဒစးဒုၚ်ပလေဝ်ပလေတ် သွက်ပေါဲရုဲမာဲတံဂှ် ရေၚ်တၠုၚ်ပ္တိတ်ဒၟံၚ်ဇြဟတ် ဗွဲမသၟဟ်အစောံဂှ် သ္ဂးရ။
ဟိုတ်ဂှ်ရ ဒၟါနူဂၠံၚ်တရဴရပ်လွဟ်တုဲ ရံၚ်ကဵုပရေၚ်ဆောံလေၚ်ဒးဂိ မက္တဵုဒှ်လဝ် ပ္ဍဲဍုၚ်တံဂှ်တုဲ ထ္ၜးလဝ်ဟိုတ် သွက်ဂွံပံၚ်တောဲကဵု ညးဍုၚ်ကွာန်တံတုဲ သ္ဂောံထ္မံက်အာ ပရေၚ်ၜိုဟ်လလမ်ထာဝရ ကေုာံ ပရေၚ်ဖောအ်ဗြေဝ်တောတက်တံ မဒှ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် နကဵုကံၚ်ဇြဳပၞာန် ဗီုကြိုက်စိုတ် ပြိုက်ဂစိုတ်ပျဲပျာံ ဖျေံထံၚ် ကုညးဍုၚ်ကွာန်တံတုဲမှ ကော်ဘိက်ဟီုပ္တိတ်ကၠုၚ် အရေဝ်ပရေၚ်ၜိုဟ်လလမ်ဂှ်ဝွံ ဖျုၚ်ဒၟံၚ်ဂဥုဲဟဒယဂွံသၠောၚ်ဏောၚ်ဂှ် ပါ်ပါဲလဝ်ရ။
“ပြသၞာပရေၚ်ဍုၚ်ကွာန်ဂှ် သောၚ်ကလးအာ နကဵုနဲကဲပရေၚ်ဍုၚ်ကွာန်ဟီုဂှ် ဂကောံဗွိုၚ်မၞိဟ်ယေန်သၞာၚ်တံ ဒုၚ်လဝ်တဲတုဲတုဲရ။ ဆ္ဂး ကံၚ်ဇြဳပၞာန်ပကီုပရာပ်ဂှ်တှ်ေ ဗီုပၟိက်စိုတ် ပြိုက်ဂစိုတ်ပျဲပျာံ စုတ်ထံၚ် ကုညးဍုၚ်ကွာန်တံတုဲမှ သ္ပကောန်သၟိၚ် က္ဍိုပ်လကိုဟ်တုဲ ကော်ဘိက်ကၠုၚ် အရေဝ်ပရေၚ်ၜိုဟ်လလမ် ဗီုဏံဂှ် ဒှ်သဘဴထပ်ဖျုၚ်ဏာ ညးဍုၚ်ကွာန်တံကဵု ဍုၚ်သ္အာၚ်တံ ဂဥုဲဟဒယဂွံသၠောၚ်ပၠန်ရဂှ် အဲမိက်ဂွံဟီုရ” သာ်ဝွံ သ္ဂးရ။
လုကဴဒပ်ပၞာန်ဟွံတိတ်နူပရေၚ်ဍုၚ်ကွာန်၊ ကၟိန်ဍုၚ်ပံၚ်ကောံအနာဂတ် ဟွံမံက်ဂတဝ်မ္ဂး ဆက်လုပ်အာပေါဲဗ္တိုက် ကုကံၚ်ဇြဳပၞာန်တုဲ ဒစဵုဒစးဗ္တိုက်သရိုဟ်အာ ပရေၚ်ကံက်စရၚ်လၟိဟ်မၞိဟ်သ္ဂာဗ္တံဂှ်ဏောၚ်ဂှ် ညးဆက်ဟီုရ။
လ္ပာ်ကံၚ်ဇြဳပၞာန်ဂှ် နကဵုဂကောံရပ်လွဟ်ကောန်ဍုၚ်အရၚ် PDF တံ သၠးကၠေံဂၠံၚ်တရဴရပ်လွဟ်တံတုဲ သွက်ဂွံသောၚ်ကလးအာ ပြသၞာပရေၚ်ဍုၚ်ကွာန် နူကဵုဂၠံၚ်တရဴပေါဲရုဲမာဲဂှ် ကော်ဘိက်လဝ်ရ။
ဥူအံၚ်သာန်မျေတ် ညးအုပ်ကာ− ၂ ဗော်တောတက်ကောန်ဂကူကရေၚ်ဍာဲ KNPP ဂှ် ကံၚ်ဇြဳပၞာန်ဝွံ ဒှ်ဒပ်ပၞာန်သီအဝဵုဂှ်ရ ဂွံကော်ပေါဲသဳကၠဳပရေၚ်ဍုၚ်ကွာန်ဂှ် ဟွံလုပ်သၞောဝ်ပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ညးဂှ် ဒှ်ဒပ်ပၞာန်သီလဝ်အဝဵု ကၟိန်ဍုၚ် ဟွံဗဗွဲကဵုသၞောဝ်ဏောၚ်။ ဟိုတ်ဂှ်ရ ဂွံကော်ပေါဲသဳကၠဳပရေၚ်ဍုၚ်ကွာန်ဂှ် ပ္ဍဲကဵုညးတံ ပွမလုပ်သၞောဝ် Legitimacy ဟွံမွဲပုဟ်ဂှ် ပိုယ်ညာတ်ကေတ်ရ။ တုဲပၠန် ထ္မံက်ထ္ၜးလဝ်ဂှ်တှ်ေ ကဵုပိုယ်ဖျေံလွဟ်တုဲ ဒက်ပ္တန်ဗော်ပရေၚ်ဍုၚ်ကွာန် ဂွံလုပ်ပေါဲရုဲမာဲဟီုဂှ် ညးဒးတီလဝ် ဟိုတ်ပိုယ် မကၠောန်ဒၟံၚ်ပၠန်ဂတးဏံဂှ်ဏောၚ်” သာ်ဝွံ သ္ဂးရ။
ပၞာန်ပၠန်ဂတးတဝ်စၞေဟ် က္တဵုဒှ်ဒၟံၚ် အလုံဍုၚ်မွဲ အခိၚ်ဏံဂှ်ဝွံ ဒှ်ပေါဲဗ္တိုက် ဗ္တိုက်သရိုဟ်ထပိုတ်ရိုဟ်ကၞက် သၞောတ်တၠအဝဵုပၞာန်ဏောၚ်တုဲ ပ္တဝ်ဒၟံၚ်က္ဍိုပ် ကုပၠန်ဂတးပြံၚ်လှာဲသၞောတ် သွက်ကၟိန်ဍုၚ်ပံၚ်ကောံဖေဝ်ဒရာ အနာဂတ်တေံရ။
ဟိုတ်ဂှ်ရ နကဵုကံၚ်ဇြဳပၞာန် ဒးဆေၚ်ကၠုၚ်မုက် ပရေၚ်ကျဗြံ ပ္ဍဲကဵုပရေၚ်ပၞာန်တံ အဆက်က်တုဲ ဒးဆောံလေၚ်လဝ် ဗ္ဒိုပ်ဒပ်ကဵုကၠံ ပါလုပ်သီုကဵု ဂအုပ်ဌာန်ပၞာန်ရးမွဲဂှ်တုဲ ဍုၚ်အပံၚ် ဗ္ဒါဲ ၈၀ ဂှ်လေဝ် ဒးဗလးလဝ်တဲရ။
မွဲလ္ပာ်ဂှ်ပၠန် ဍုၚ်ကြုက် ဍုၚ်ဇိုၚ်ဝုတ်ဒိုဟ်ဂှ်လေဝ် စပ်ကဵုအကြေပ်အဂြတ်ဍုၚ်ဗမာတုဲ ဒေါအ်ပန်ပှော်တုဲ သွက်ဂွံသောၚ်ကလး နကဵုနဲကဲပရေၚ်ဍုၚ်ကွာန်ဂှ် ထရိုဟ်ပ္တိုန်ဒၟံၚ်တုဲ ကုဂကောံ EAO လ္ၚဵုတံဂှ်လေဝ် ကဵုဒၟံၚ်ဇြဟတ်ဂရိုဟ်ရ။
ပ္ဍဲအကာဲအရာဏံ ဂကောံရပ်လွဟ်ကောန်ဍုၚ်အရၚ်တံသၟးဟွံက PDF တံဂှ် ကၠာတေံ ကံၚ်ဇြဳပၞာန် ကဵုလုပ်ဖျေံလွဟ်တုဲ နူကဵုကဆံၚ် ကဵုသြန်ထံက်ပၚ်ဂှ် စိုပ်ကၠုၚ်ဒၟံၚ် စဵုကဵုကဆံၚ်သ္ဂောံသဳကၠဳ လ္တူခုၚ်တက်ကျာပရေၚ်ဍုၚ်ကွာန်ရ။
ကိုဝ်ဇြေယျာလွေန် ညးဒုၚ်တာလျိုၚ် 96 Soldiers PDF ဂှ် ဂွံလုပ်ပေါဲရုဲမာဲဂှ် လ္ပဟီုဏီ ဂွံသဳကၠဳ ကုကံၚ်ဇြဳပၞာန်ရဂှ် စိုတ်ဟွံလုပ်စတုဲ တၚ်ရန်တၟံသီုညးဖအိုတ်ဂှ်ဝွံ ဒှ်သွက်သၞောတ်တၠအဝဵုပၞာန် ရိုဟ်ကၞက်ဂွံပိုတ်ရဏောၚ်ဂှ် ဟီုရ။
“ ဂွံလုပ်ပေါဲရုဲမာဲဂှ် လ္ပဟီုဏီ၊ ဂွံသဳကၠဳ ကဵုဍေံတံရဂှ် ပိုယ်တံ စိုတ်ဟွံလုပ်စပုဟ်။ စိုတ်လုပ်စအာလေဝ် ဟွံသေၚ်ပုဟ်။ ပိုယ်တံသၟးဟွံသေၚ်ပုဟ် လ္ပာ်ဂကောံဇြဟတ်ပၠန်ဂတး ဂကောံလဵုဟွံဟီု ဂွံသဳကၠဳဂှ် အခိၚ်လၟုဟ် စုတ်အာပ္ဍဲက္ဍဟ် ဟွံသေၚ်ပုဟ်ဂှ် မိက်ဂွံဟီုရ။ တၚ်ရန်တၟံသီုညးဖအိုတ်ဂှ်တှ်ေ ဂွံဗ္တိုက်သရိုဟ် ထပိုတ်ရိုဟ်ကၞက် သၞောတ်တၠအဝဵုပၞာန်ရဏောၚ်။ ဟိုတ်ဂှ်ရ ဆက်ကွာ်အာ အတိုၚ်တၚ်ရန်တၟံဏံရဏောၚ်ဂှ် ပိုယ်တံ ကၠိုဟ်ကေတ်လဝ်ရ” သာ်ဝွံ သ္ဂးရ။
ပရေၚ်ဍုၚ်ကွာန် ဒပ်ပၞာန်ဟွံပါဂှ်ဟေၚ် ဂကောံဇြဟတ်ပၠန်ဂတးတံ နွံပၟိက်စှ်ေစိုတ်ဂှ်ရ ပေါဲရုဲမာဲ ဒပ်ပၞာန်ကၠောန်ဗဒှ်ကဵုဂှ်ဝွံ ဒှ်အကာဲအရာပြေပြံၚ်မံၚ် ဟွံသေၚ်ပုဟ်ဂှ် ညးထံက်ထ္ၜးရ။
ပ္ဍဲကဵုတၚ်ကော်ဘိက် ကံၚ်ဇြဳပၞာန်ဂှ် ကော်ဘိက်လဝ် ဒပ်ပၞာန်စဵုဒၞါညးဍုၚ်ကွာန် PDF တံကီုလေဝ် NUG အလဵုအသဳညဳသၟဟ်ဂကူ သ္ကိုပ်သ္က ဂကောံ PDF တံဂှ် ထ္မံက်ထ္ၜးစုတ်လဝ် ဟွံမွဲရ။
သ္အာၚ်နူဂှ်ပၠန် ဟိုတ်နူပရေၚ်ကျဗြံတံတုဲ ဟွံဗ္တိုက်ပၞာန်မွဲသာ် ကံၚ်ဇြဳပၞာန် မိက်ဂွံတက်ကျာပရေၚ်ၜိုဟ်လလမ် လ္တူဝိုၚ်တက်ကျာပရေၚ်ဍုၚ်ကွာန်ဂှ်ဝွံ ကုဂကောံရပ်လွဟ်ကောန်ဍုၚ်အရၚ်တံကဵု PDF တံဂှ် ရပ်စပ်စကာလဝ် ဝေါဟာ ပကီုပရာပ်ဖိုဟ် မဒှ်ရ။
ညးခါတ်အကာဲပရေၚ်ဍုၚ်ကွာန်တံဂှ်တှ်ေ ဟိုတ်နူကံၚ်ဇြဳပၞာန် ခၠေဝ်ဗ္တိုက်နၚ် ကုဂကောံရပ်လွဟ်ကောန်ဍုၚ်အရၚ်တံကဵု ဂကောံပရေၚ်ဍုၚ်ကွာန် NUG က္ဍိုက်ပ်တံဂှ်တုဲ ပရေၚ်သဳကၠဳ ဂွံဒှ်ကၠုၚ်မာန် ဟွံမွဲပုဟ်ဂှ် သ္ၚဳဂၠိပ်လဝ်အိုတ်ရ။
ပရိုၚ်−သြၚ်လောန်တိုၚ်(မ်)
ဗီု−CNN