မတ်မလီု၊ သေပ်တေမ်ဗာ ၂၈
ဗော်ပရေၚ်ဍုၚ်ကွာန် လုပ်စိုပ်ပြိုၚ်အာ ပေါဲရုဲမာဲတံဂှ် စၟတ်ကေတ် နဒဒှ်ဂကောံလေံဒုက် ထံက်ဂလာန်ကံၚ်ဇြဳပၞာန်တုဲ ဒစဵုဒစးဗ္တိုက်သရိုဟ်အာဏောၚ်ဂှ် ကမ္မတဳဗ္တိုက်သရိုဟ် ပေါဲရုဲမာဲအလီ ကံၚ်ဇြဳဖေဝ်ဒရာဍုၚ်မန် လလောၚ်တြးလဝ် ပ္ဍဲဂိတုသေပ်တေမ်ဗာ ၂၇ တေံရ။
ပေါဲရုဲမာဲအလီ ကံၚ်ဇြဳပၞာန် ကၠောန်ဗဒှ်ဂှ် သွက်ဂွံဒစဵုဒစးဗ္တိုက်သရိုဟ်အာ ပိုတ်တ်သ္ကုတ်တ်ဂှ် ပ္ဍဲဂိတုသေပ်တေမ်ဗာ ၁၇ တေံ ကံၚ်ဇြဳဖေဝ်ဒရာဍုၚ်မန် ဒက်ပ္တန်လဝ် ကမ္မတဳဗ္တိုက်သရိုဟ်ဒစဵုဒစး ပေါဲရုဲမာဲအလီ နကဵုကောန်ဂကောံ ၇ တၠရ။
အတိုၚ်တၚ်ဒတူလိုၚ်ကမ္မတဳဂှ်မ္ဂး လၟုဟ်ဏံပၠန်ဂတးရပ်လွဟ်ညး ဍုင်ကွာန်တအ် အံင်ဇၞးကၠုင် နကဵုအသိင်ဇၞော်ဇၞော်တုဲ ပေါဲပတိုက်သီဍုင်တအ်ဂှ်လေဝ် ဖန်ဗဒှ်ကၠုင်မာန်ဒၟံၚ်ရ။ ပ္ဍဲအကာဲအရာသာ်ဏံ ကံင်ဇြဳပၞာန်တအ် ဒးဒုင်ဒစဵုဒစး ဗ္တိုက်မံင်ကုညးဍုင်ကွာန်အလုံမွဲဍုင်တေံတုဲ ပရေင်နာနာ မပတမ်ကဵု ပရေင်ပၞာန် ပရေင်ဍုင်ကွာန် ပရေင်ပိုန်ဒြပ်တအ်လေဝ် လီုလာ်ကျဗြမ်ဒၟံင်ရောၚ် သ္ဂးရ။
ပ္ဍဲအရာကျဗြမ်ဒၟံင်နာနာသာ်တအ်ဏအ်ဂှ် သွက်ဂွံဂၠာဲဂၠံင်တိတ် ပၞော်ယီုပရေင်ဍုင်ကွာန်တုဲ ကံၚ်ဇြဳပၞာန်တံ ဖန်ဇန်ဒၟံင်သွက်ဂွံကၠောန် ပေါဲရုဲမာဲဂှ် ကမ္မတဳဗ္တိုက်သရိုဟ် ပေါဲရုဲမာဲအလီ ကံၚ်ဇြဳဖေဝ်ဒရာဍုၚ်မန် ဟီုရ။
ပေါဲရုဲမာဲကံင်ဇြဳပၞာန်တအ် ဖန်ဇန်ကၠောန်မံင်ဏအ်ဂှ် ဒှ်ပေါဲရုဲမာဲအလီ သွက်ဂွံပါဲဓလေတ် ဒုဟ်ဒန်ရာဇဝတ်ပၞာန် မကၠောန်ဗၠေတ်လဝ် လတူညးဍုင်ကွာန်တအ်ဂှ်ကီု ဂၠာဲပၞော်တိတ်ပရေင်ဍုင်ကွာန်တုဲ သွက်ရဲပၞာန်တအ် ညံင်ရဴဂွံထိင်လဝ်အဝဵုမာန်ဟေင်ရဂှ် ထံက်ထ္ၜးလဝ်ရ။
ဟိုတ်ဂှ်ရ ပေါဲရုဲမာဲအလီ ကံၚ်ဇြဳပၞာန် ကၠောန်ဗဒှ်အာဏံဂှ် နကဵုညးတံ ဒစဵုဒစးဗ္တိုက်သရိုဟ်အာ နကဵုနဲကဲနာနာသာ်ဏောၚ်တုဲ ဗော်ပရေၚ်ဍုၚ်ကွာန် လုပ်စိုပ်ပြိုၚ်အာတံဂှ် စၟတ်သမ္တီကေတ် နဒဒှ်လေံဒုက် ထံက်ဂလာန် ကံၚ်ဇြဳပၞာန်တုဲ ဒစဵုဒစးဗ္တိုက်သရိုဟ်အာဏောၚ်ဂှ် ကဵုကၠုၚ်သတိရ။
ဒံက်တာ သဳရိမန်ဆာန် က္ဍိုပ်သ္ကိုပ်ဂကောံ ကမ္မတဳဗ္တိုက်သရိုဟ်ဒစဵုဒစး ပေါဲရုဲမာဲအလီဂှ် ဒၞါဲကေတ်အရေဝ်ဂှ် နွံပၟိက်မ္ဂး ကေတ်အာအရေဝ် သီုပရေၚ်ပၞာန်ဏောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပ္ဍဲဒၞါဲကေတ်အရေဝ်တံဂှ်တှ်ေ နွံပၟိက်မ္ဂး သွက်ဂွံကေတ်အာအရေဝ် သီုပရေၚ်ပၞာန်ဏောၚ်ဂှ် မိက်ဂွံသ္ဂးရ။ ဟိုတ်ဂှ်ရ ကဆံၚ်ပထမဂှ်တှ်ေ ကဵုသတိ တာဒၞါ လ္ဂောံကဵုပရေၚ်ဍုၚ်ကွာန်၊ ပရေၚ်မၞိဟ်တံ နွံဏောၚ်။ အရာမကဵုသတိ တာဒၞါတံဏံဂှ် ဟွံဒ္ဂေတ်ဗက်မ္ဂး သွက်ဂွံကေတ်အာအရေဝ် နကဵုနဲကဲနာနာသာ် မဆေၚ်စပ်ကဵု ပရေၚ်ပၞာန်တံ ပိုတ်တ်သ္ကုတ်တ်ဂှ် မိက်ဂွံဟီုရ” သာ်ဝွံ သ္ဂးရ။
ဂကောံပရေၚ်ဍုၚ်ကွာန်ဒှ်ဒှ် ဂကောံကောန်ဍုၚ်အရၚ်ဒှ်ဒှ် မကဵုဒၟံၚ်ဇြဟတ် ပေါဲရုဲမာဲအလီ ညံၚ်အာယုက်သၞောတ်တၠအဝဵုပၞာန် ကေုာံ သၞောတ်တၠအဝဵုနာနာ ဂွံဂၠိၚ်သ္ၚောဲဂှ် ဗ္တိုက်သရိုဟ်ကေတ်အာအရေဝ် ပိုတ်တ်သ္ကုတ်တ်ဏောၚ်ဂှ် ညးဆက်ဟီုရ။
ပ္ဍဲတွဵုရးဍုၚ်မန်ဂှ်တှ်ေ ဗော်ကျခိုၚ်ယျေ ဒပ်ပၞာန်ထံက်ပၚ်ကဵုလဝ်ဂှ်ကီု ဗော်ညးဗြဴ(မန်) ကေုာံ ဗော်ညဳသၟဟ်မန်တံဝွံ နဒဒှ်ဗော်ပရေၚ်ဍုၚ်ကွာန် စန်ဒက်အာ ကဆံၚ်တွဵုရးကဵု ကဆံၚ်ကၟိန်ဍုၚ်တံဂှ် ကမ္မယှေန်ပေါဲရုဲမာဲ ကံၚ်ဇြဳပၞာန်ခါန်ကၞက်ဂှ် ကဵုလဝ်အခေါၚ်ဒက်ပ္တန်ဗော်ရ။
နကဵုသြၚ်လောန်တိုၚ်(မ်) စပ်ကဵုတၚ်လလောၚ်တြး ဗ္တိုက်သရိုဟ်အာ ဗော်လုပ်ပြိုၚ် ပ္ဍဲပေါဲရုဲမာဲတံဂှ်တုဲ ဆက်လဝ်ဖုၚ် ဇရေၚ်ညးမၞုံအခေါၚ်ဟီုဂး ဗော်ညဳသၟဟ်မန် ဖျေံသ္ဇိုၚ်တွဵုရးဂှ် ဟွံအောန်နူကဵု ပန်ဝါကီုလေဝ် ဒုၚ်တဲသှ်ကဵုလဝ်ဂှ် ဟွံမွဲရ။
ပ္ဍဲတၚ်လလောၚ်တြး ကမ္မတဳဂှ်တှ်ေ ညးဍုင်ကွာန်တအ်လေဝ် ပရေင်ပကမ်ပရာတ် ပလီုပလာ်ကံင်သီပၞာန်တအ်ဂှ် ညံင်ရဴဂွံဒေါံ ဂွံအိုတ်အာပ္ဍဲလက်ထက်ပိုဲဏအ်မွဲဓဝ်ဂှ် ဒစဵုဒစးအာကဵုပေါဲရုဲမာဲ အလီကံင်သီပၞာန်တုဲ လပကဵုပၞော်ယီုပရေင်ဍုင်ကွာန်ညိဂှ် ထ္မံက်ထ္ၜးလဝ်ရ။
နကဵုဍုၚ်သ္အာၚ်တံလေဝ် ပေါဲရုဲမာဲ ကံၚ်ဇြဳပၞာန် ကၠောန်ဗဒှ် ဂှ် လ္ပသ္ပစၟတ်သမ္တီတုဲ နဲကွတ်ပညာကီု၊ သြန်လှုဲကီု အရီုဗၚ်သာ်လဵုဟွံဟီု ညံၚ်ဟွံဂွံကၠောန်ဒးဂှ်လေဝ် ကမ္မတဳဗ္တိုက်သရိုဟ် ပေါဲရုဲမာဲ MSFC ဖ္တိုက်ဖ္အောဝ်လဝ် ဇြိုဟ်ဟ်နက်က်ရ။
ပရိုၚ်−သြၚ်လောန်တိုၚ်(မ်)
ဗီု−MSFC