တိုဝ်ကျိုဝ်၊ သေပ်တေမ်ဗာ ၂၈
ဗော်ဂွံအဝဵုဍုၚ်ဂျပါန် ပရေၚ်ထုဲထံၚ်မံက်တိတ်ဒၟံၚ်ဂှ် ရုဲစှ်ပ္တိုန်လဝ် သ္ကိုပ်ဝန်ဇၞော်တြေံ ယှဳဂဳရူ အဳယှဳဗာ နဒဒှ်က္ဍိုပ်သ္ကိုပ်ဗော်တၟိတုဲ ရန်လဝ် သွက်ဒၞါဲသ္ကိုပ်ဝန်ဇၞော်ကၟိန်ဍုၚ်ရ။
ဝန်ဇၞော်တြေံ အဳယှဳဗာ အာယုက် ၇၆ သၞာံ မဟီုလဝ် ဒဒှ်ရကၠောန်အာ ညံၚ်ဗော်ဂွံအဝဵု လေတ်ဗရဴဒဳမဝ်ကရေတ်တေတ် LDP ဂွံသ္ၚးဇ္ၚးဏောၚ်ဂှ် ပ္ဍဲဂိတုသေပ်တေမ်ဗာ ၂၇ တေံ ဂွံဒုၚ်ရုဲစှ်လဝ် နဒဒှ်က္ဍိုပ်သ္ကိုပ်ဗော်တုဲ ကလေၚ်ဂယိုၚ်ပ္တိုန်လမျီု ပရေၚ်ပိုန်ဒြပ်တုဲ သောၚ်ကလးအာ အန္တရာယ်ပရေၚ်ဂီုကၠီုတံဏောၚ်ဂှ် ဟီုလဝ်ရ။
ဗော် LDP ဝွံ ပ္ဍဲကၠတ်ထဝ် ဒၞါဲဗွဲမဂၠိုၚ်ဂှ် ကလိဂွံလဝ်တုဲ ညးဂွံဒုၚ်ရုဲစှ် နဒဒှ်က္ဍိုပ်သ္ကိုပ်ဗော်ဂှ်ဝွံ ဂွံဒှ်ကၠုၚ်သ္ကိုပ်ဝန်ဇၞော် ချိုတ်ပၠိုတ်ဒၟံၚ်တုဲ ဂိတုအံက်တဝ်ဗာ ၁ တေံ ခါန်ကၞက်ပ္တိုန်အာ အဳယှဳဗာ နဒဒှ်သ္ကိုပ်ဝန်ဇၞော်ဏောၚ်ဂှ် စၟဳစလဝ်ရ။
ဗော်ဂွံအဝဵုဂျပါန်ဂှ်ဝွံ အခိၚ်ဒးဆေၚ်ဒၟံၚ်မုက် ပဋိပက္ခအပ္ဍဲဗော်၊ ကဵုပရေၚ်ထုဲထံၚ်တံဂှ် ရုဲစှ်လဝ် က္ဍိုပ်သ္ကိုပ်ဗော်တၟိရ။
သ္ကိုပ်ဝန်ဇၞော်ဂျပါန်လၟုဟ် ဖူမဳယိုဝ် ကဳယှဳဒါဂှ် ထပ်ဒုၚ်ရုဲစှ်အာ ဟွံသေၚ်ရပုဟ်ဂှ် ဂိတုတုဲကၠုၚ်တေံ လလောၚ်တြးလဝ်တုဲ သွက်ဒၞါဲက္ဍိုပ်သ္ကိုပ်ဗော်ဂှ် အလံၚ်ညးစၞး စဵုကဵု ၉ တၠ ပါလုပ်ပြိုၚ်လဝ်ရ။
အဳယှဳဗာ လုပ်စိုပ်ပြိုၚ်ပ္ကာန်လဝ် မရနုက်ကဵုပဉ္စမဂှ်ဝွံ ပ္ဍဲလိက်ကပှ်တၚ်နၚ် ဗွဲမဂၠိုၚ်ဂှ် ဂြိပ်ဒၟံၚ်ဂတအိုတ်တုဲ ပ္ဍဲကဵုခေတ်ပေါဲပၞာန်တုဲ ဗော် LDP မအုပ်ဓုပ်ကၠုၚ်လဝ်ဂျပါန် ဗွဲမဂၠိုၚ်ဂှ်တှ်ေ သွက်ဂွံအုပ်ဓုပ်ဗော်ဏံ ပ္ဍဲအရာပ္တိတ်ဇြဟတ် အလန်လက္ကရဴအိုတ်ဂှ် ညးဇၞးလဝ်ရ။
ပ္ဍဲအရာပြိုၚ်ပ္ကာန် သွက်ဒၞါဲက္ဍိုပ်သ္ကိုပ်ဗော်ဂှ် အဳယှဳဗာ ကဵု သာနာအေ တာကိုၚ်ယှဳ မပ္တိတ်ကၠုၚ်ဇြဟတ် သွက်ဂွံဒှ်ကၠုၚ် သ္ကိုပ်ဝန်ဇၞော်ညးဗြဴဂျပါန် အလန်ကိုပ်ကၠာအိုတ်တံ ဒးဆေၚ်လဝ်မုက်ညးသ္ကအ်ရ။
ဟိုတ်နူပရေၚ်စမ်ၜတ်ကမ်လှောဝ် ကိုဝ်ရဳယျာသၟဝ်ကျာကီု၊ တုဲကၠုၚ်ခြာဟွံလအ်ဏံ ဟိုတ်နူကြုက် ကေုာံ ရုယှာတံ လုပ်စိုပ်ကၠုၚ် အပ္ဍဲတွဵုဒၞက်ဂျပါန်တံဂှ်တုဲ ညံၚ်ဂီုကၠီုကၟိန်ဍုၚ် ဇြဟတ်ဂွံခိုဟ် ဒးကၠောန်ဏောၚ်ဂှ် အဳယှဳဗာ ဟီုလဝ် ပ္ဍဲပေါဲသောၚ်ကလးလိက်ပရိုၚ်ရ။
ပ္ဍဲကဵုဗျူဟာပရေၚ်ပိုန်ဒြပ်ညးဂှ် သွက်ဂွံဗ္တိုက်သရိုဟ် ၚုဟ်ဗၞိက်ဖျာ သၠုၚ်တိုန်ဒၟံၚ်ဂှ်ကဵု အစဳဇန်သၠုၚ်ပ္တိုန်အာ သြန်ဂိတုတံ ပါလုပ်ရ။
သၞာံ ၁၉၅၅ တေံ စဒက်ပ္တန်လဝ်တုဲ နကဵုဗော် LDP ဂွံကၠုၚ်လဝ်အဝဵု ကြပ်အဆက်က်ဂှ် ဒဒှ်ရကၠောန်အာပရေၚ်အပြံၚ်အလှာဲဏောၚ် နွံပၟိက် ဒးထ္ၜးပျးကဵုညးဍုၚ်ကွာန်တံဂှ်ရောၚ် အဳယှဳဗာ ဟီုရ။
စပ်ကဵုကိစ္စ သြန်ဗွဝ်ပရေၚ်ဍုၚ်ကွာန် ဟွံလလောၚ်တြးလဝ် အပ္ဍဲဗော် LDP ဂှ်တုဲ ပရေၚ်ထုဲထံၚ်တံ မံက်တိတ်ဒၟံၚ်တုဲ ပွမရုဲစှ်ပ္တိုန် က္ဍိုပ်သ္ကိုပ်တၟိလၟုဟ်ဂှ်ဝွံ ဒှ်အရာပ္တိတ်ဇြဟတ် ညံၚ်ဂွံကလေၚ်ဂွံ ဓဝ်ပတှ်ေညးဍုၚ်ကွာန်တံဏောၚ်လေဝ် မဒှ်ရ။
Ref: BBC