ယှာန်ဟိုၚ်၊ သေပ်တေမ်ဗာ ၃၀
ပ္ဍဲဖဳလေတ်ဖေန် ဟိုတ်နူအမေရိကာန် ဖျေံလဝ်ကမ်လှောဝ်တုဲ ဒဒှ်ရဇီုကပိုက်ကဵု ပရေၚ်ၜိုဟ်လလမ် ကေုာံ ပရေၚ်ညိၚ်ဝတ် အပ္ဍဲဒေသဂှ် ဝန်ဇၞော်ကာဍုၚ်သ္အာၚ် ဝါန်ယိ ဟီုလဝ်ဂှ် ဌာနဝန်ဇၞော်ကာဍုၚ်သ္အာၚ်ကြုက် ထ္မံက်ထ္ၜးလဝ် ပ္ဍဲဂိတုသေပ်တေမ်ဗာ ၂၉ တေံရ။
တုဲကၠုၚ် ဂိတုသေပ်တေမ်ဗာ ၂၈ တေံ ပ္ဍဲဍုၚ်နျူယျံက် အခိၚ်သဳကၠဳဒၟံၚ်ကဵု ဝန်ဇၞော်ကာဍုၚ်သ္အာၚ် ကိုဝ်ရဳယျာသၠုၚ်ကျာ ချိုဝ်တေယူဂှ် ပ္ဍဲတ္ကအ်ကိုဝ်ရဳယျာ ညံၚ်ပေါဲပၞာန် ကေုာံ အကာဲအရာရုသံၚ်တံ ဟွံဂွံဒှ် သွက်ဂွံဝေၚ်ပါဲအိုတ်ဂှ် ဝန်ဇၞော်ဝါန်ယိ ဖ္တိုက်ဖ္အောဝ်ဟီုလဝ်ရ။
သၞောဝ်ကမ်လှောဝ် Typhon မဗ္ဂပ်စုတ်လဝ် ကမ်လှောဝ်ခရုသ် ဗ္တိုက်အာပွန် နွံပ္ဍဲဍုၚ်ကြုက်ဂွံတံဂှ် အပ္ဍဲသၞာံဏံ အမေရိကာန် သ္ဂောံဖျေံအာ ပ္ဍဲဍုၚ်ဖဳလေတ်ဖေန် နွံဒၟံၚ်ရ။
သွက်ဂွံတးပါဲကၠေံ သၞောတ်ကမ်လှောဝ်ဏံဂှ် ကြုက် အာတ်မိက်လဝ်တုဲ ပ္ဍဲဒေသ အေန်ဒိုဝ်−ပသိဝှေခ် စပ်ကဵုဖျေံလဝ် သၞောတ်ကမ်လှောဝ် အလန်ပထမကၠာအိုတ်ဂှ်တုဲ ပ္ဍဲအရာဟီုပ္တိုန်ဒုဟ်ဂှ် ရုယှာလေဝ် ပါလုပ်ကၠုၚ်တုဲ ဟိုတ်နူပြဝဝါယှေန်တာန်တုဲ ပရေၚ်ပြိုၚ်ပ္ကာန်လွဟ်လက်နက်တံ က္တဵုဒှ်ကၠုၚ်မာန်ရောၚ် စောဲစပ်လဝ်ရ။
ပွမဖျေံလဝ်သၞောတ်ကမ်လှောဝ်အမေရိကာန် ဂှ်ဝွံ သွက်ဒတုဲဖဵု ကၟိန်ဍုၚ်အပ္ဍဲဒေသတံ ဟွံသေၚ်ပုဟ်ဂှ် ဝန်ဇၞော်ဝါန်ယိ ဟီုရ။
ဍုၚ်ဖဳလေတ်ဖေန် မဒှ်သ္ၚိဇိုၚ်ဝုတ်ဒိုဟ်ထိုၚ်ဝါန် ကြုက်ဟီုကြီုလဝ် ဒှ်အပိုၚ်ညးတံဂှ်ဝွံ ပ္ဍဲအာယှဏံ သွက်မဟာဗျူဟာ အမေရိကာန်ဂှ် ဒှ်ကၠုၚ်အရာပၟိက်ဇၞော် မွဲဒကုတ်မွဲဒကဴရ။
ယဝ်ရကြုက် ဗ္တိုက်ကၠုၚ် ထိုၚ်ဝါန်မ္ဂး ဖဳလေတ်ဖေန်ဝွံ သွက်ဒပ်ပၞာန်အမေရိကာန် ဂွံခၠေဝ်ပလန် တာဒၞါအာဂှ် ဒှ်ကၠုၚ်ဒၞါဲဖျေံသ္ဇိုၚ်မွဲမာန်ရ။
ကြုက် ကေုာံ ဖဳလေတ်ဖေန်တံဝွံ အခိၚ်ဆေၚ်မုက်ဒိဓဗတ်ကၠုၚ် ပ္ဍဲၜဳကြုက်သၠုၚ်ကျာဂၠိုၚ်ကၠုၚ်ဂှ် အမေရိကာန် ဖျေံလဝ်သၞောတ်ကမ်လှောဝ် ပ္ဍဲဍုၚ်ဖဳလေတ်ဖေန် သွက်ပရေၚ်ပ္ကတ်ပ္ကေၚ်ပရေၚ်ပၞာန်ၜါဍုၚ်တုဲ ဂွံကလေၚ်သီကေတ်ဂှ် လဇုဲလဇလဝ်ရ။
ကြပ်အလုံၜဳကြုက်သၠုၚ်ကျာမွဲဂှ် ညးတံပိုၚ်လဝ်ရောၚ် ကြုက် ဟီုလဝ်တုဲ ပွမဟီုဂးကၠုၚ်သာ်ဏံဂှ်ဝွံ ဟွံလုပ်သၞောဝ်ပုဟ်ဂှ် ရုၚ်သၞောဝ်ဓဝ် သောၚ်ကလးပရေၚ်ကယျာန်ဓဝါန် သ္ဂုတ်သွာတ်လဝ်ကီုလေဝ် ကြုက် တးပါဲလဝ်ရ။
Ref: Reuters