လာယှိုဝ်၊ အံက်တဝ်ဗာ ၂
ပပ္တံနူဂိတုတုဲကၠုၚ်တေံတုဲ နဒဒှ်ပၞာန်ထ္ပက်ဂှ် ကံၚ်ဇြဳပၞာန် ဟွံသ္ပဂရုကဵု ဂီုကၠီုလမျီု၊ ပိုန်ဒြပ်အရပ်ရာ ညးဍုၚ်ကွာန်တံမွဲသာ် ကၠောန်သ္ပလဝ် ပရေၚ်ဗ္တိုက်ထောံမခတိုဟ် အလုံဍုၚ်မွဲဂှ် ဂကောံကဝ်က MNDAA ဟီုရ။
ဟိုတ်ဂှ်ရ ညးဇီုကပိုက်ဒးပြဟ်လလုဲတံ မွဲတ္ၚဲတုဲမွဲတ္ၚဲ သၠုၚ်တိုန်ကၠုၚ်တုဲ ဍုၚ်လာယှိုဝ် ပရေၚ်ဂယိုၚ်လမျီုညးဍုၚ်ကွာန်တံ ကလေၚ်ခိုဟ်ကၠုၚ်လဝ်ဂှ်လေဝ် ဒှ်ကၠုၚ်ပွန်ဗ္တိုက်ထောံမခတိုဟ်ဂှ် သ္ဂးရ။
ပ္ဍဲဂိတုသေပ်တေမ်ဗာ ၃၀ အခိၚ်နူဂယး ကၠာဟွံဂွံတက် မွဲနာဍဳဂှ် ဒပ်ပၞာန်သီအဝဵု ထောံဏာလဝ်မခတိုဟ်လျိုၚ်ပံၚ်မဂၠိုၚ် ၃ မ ပ္ဍဲအရာပ်ကောန်အရာပ် ဍုၚ်လာယှိုဝ်တံမံၚ်ဂှ် နကဵုပၞာန်ကျာရ။ ဟိုတ်ဂှ်ရ ညးဒေသမွဲတၠ ကလိဂွံလဝ်ဝပ် သ္ကာတ်မြဟ်တုဲ စမြိုၚ်ဗွဲမဂၠိုၚ်ဂၠေၚ်လေဝ် လီုလာ်အာလဝ်ရောၚ် MNDAA သ္ဂးရ။
အတိုၚ်တၚ်ဒတူလိုၚ်ပရေၚ်ဍုၚ်ကွာန် MNDAA မလလောၚ်တြးလဝ် ပ္ဍဲဂိတုသေပ်တေမ်ဗာ ၁၈ ဂှ်မ္ဂး ဒေါအ်ပန်ပှော်လွာဲဂှ်တုဲ ပံၚ်တောဲကဵုဍုၚ်ကြုက်တုဲ သောၚ်ကလးအာ နကဵုဂၠံၚ်တရဴပရေၚ်သဳကၠဳဆဵုဂဗ လ္ဂောံကဵုပရေၚ်ဍုၚ်ကွာန်တံဏောၚ် ဟီုပ္တိတ်လဝ်ရ။
ကြဴနူဂှ်တုဲ ကံၚ်ဇြဳပၞာန်လေဝ် ကုဂကောံရပ်လွဟ်ကောန်ဍုၚ်အရၚ်တံကဵု PDF တံဂှ် ကဵုဖျေံလွဟ်တုဲ သွက်ဂွံသောၚ်ကလးပြသၞာပရေၚ်ဍုၚ်ကွာန် နူကဵုဂၠံၚ်တရဴကၠတ်ထဝ် ပရေၚ်ဍုၚ်ကွာန်ဗော်တံဂှ် ပ္ဍဲဂိတုသေပ်တေမ်ဗာ ၂၆ တေံ ကော်ဘိက်ကၠုၚ်လဝ်ရ။
ဆ္ဂး ဍုင်လာယှိုဝ် ဖျေံသ္ဇိုၚ်ဌာန်ဂအုပ်ပၞာန်ရးဨသာန် ဒးဗလးလဝ်တဲဂှ် နကဵု MNDAA သီကေတ်ဏာလဝ်တုဲ ကံၚ်ဇြဳပၞာန် ဆက်ဗ္တိုက်ဂြာတ်လဝ်မခတိုဟ် နူကဵုပၞာန်ကျာရ။
ဒံက်တာလှကျဝ်ဇြဝ် ညးလ္ၚတ်သ္ၚဳဂၠိပ်ပရေၚ်ဍုၚ်ဗၟာဂှ် ဂလာန် ဂကောံၜါလ္ပာ်ဂှ်ဝွံ ဟိုတ်နူကြုက်ကဵုဇြဟတ်ဂရိုဟ်တုဲ ဒးဟီုလဝ်အိုတ်ဂှ်ရ ဂွံဒေါအ်ပန်ပှော်ကဵု ဂွံသဳကၠဳပရေၚ်ဍုၚ်ကွာန် သ္ဇက်ဂွံဒှ်ကၠုၚ်ဟွံမွဲပုဟ်ဂှ် သ္ၚဳဂၠိပ်လဝ်ရ။
“အဲရံၚ်ကေတ်ဂှ်တှ်ေ ဗီုဏံဏောၚ်။ ပရေၚ်ဒေါအ်ပန်ပှော်တံဂှ် ကဝ်ကတံဟီုကၠုၚ်ဒှ်ဒှ် ကံၚ်ဇြဳပၞာန် ဟီုကၠုၚ်ဒှ်ဒှ် ဒၟါနူကြုက် ကဵုဇြဟတ်ဂရိုဟ်တုဲ ဟီုလဝ်ညးသ္ကအ်ဏောၚ် ထေၚ်ကေတ်ရ။ ဍာံဍာံဂှ်တှ်ေ သ္ဇက်ဂွံဒှ်ကၠုၚ် ဟွံမွဲပုဟ်။ ပရေၚ်ဒေါအ်ပန်ပှော်ဂှ်လဝ် သ္ဇက်ဂွံဒှ်ကၠုၚ် ဟွံမွဲပုဟ်။ တုဲပၠန် ပေါဲရုဲမာဲဂှ်လေဝ် အဲရံၚ်ကေတ်တှ်ေ သ္ဇက်ဂွံဒှ်ကၠုၚ် ဟွံမွဲရ။ အခိၚ်ကြုက်ဟီုကၠုၚ်တှ်ေ ပိုယ်တံလေဝ် ဟီုလဝ်ရ ဆ္ဂး ဟွံဒှ်ကလောန် ညံၚ်ဂွံဒှ်ဗီုပြၚ်ဏောၚ်ရဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ် နူဂိတုအဝ်ဂါတ်အိုတ် စဵုကဵုဂိတုသေပ်တေမ်ဗာအိုတ် ပယျာံနူဂယးပြဟ်ဂှ် ကၠောန်သ္ပထောံလဝ်မခတိုဟ် ဍုၚ်လာယှိုဝ် နကဵုက္ၜၚ်ကျာဗ္တိုက်ဂျက် ၉ ဝါတုဲ ပ္ဍဲဂိတုသေပ်တေမ်ဗာကြပ်အိုတ်ဂှ် ဗ္တိုက်ကၠုၚ် မွဲဏှမွဲဏှရ။
ဒဵုကဵုအခိၚ်လၟုဟ် ဟိုတ်နူထောံလဝ်မခတိုဟ်နကဵုက္ၜၚ်ကျာ ဍုၚ်လာယှိုဝ်ဂှ်တုဲ ကောန်အရာပ် ဟွံအောန်နူကဵု ၃ တၠ ချိုတ်အာလဝ်တုဲ ၃၉ တၠ ကလိဂွံလဝ်ဝပ်ရောၚ် တၚ်နၚ် MNDAA တံ ထ္မံက်ထ္ၜးလဝ်ရ။
သ္ပကၠေံမၛ္ဇဟ် ကုလမျီုဒြပ်ရတ်ညးဍုၚ်ကွာန်တံတုဲ ပြဝလိုန်ဗပိန် အခေါၚ်အရာမၞိဟ်တံဂှ်ဝွံ သွက်ဂွံသၠုၚ်ပ္တိုန် လၟေၚ်ကမၠောန်ပရေၚ်ၜိုဟ်လလမ် ညးမပ္တိတ်ဒၟံၚ်ဇြဟတ်တံ အိုဿီုဂှ် သ္ကဵုဒှ်တဴမးမး ချိုတ်ပၠိုတ်ရောၚ် MNDAA ကဵုလဝ်သတိ ကုကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−MNDAA