မတ်မလီု၊ အံက်တဝ်ဗာ ၂
ကမၠောန်ၜဵုစဲတ္ၚဲ အပ္ဍဲတွဵုရးဍုၚ်မန်တံဝွံ ဟိုတ်နူခရိတ်အိုတ်နာနာဇၞော်သၠုၚ်ကီု သီုကဵုပြသၞာ ကောန်ကလောန်အောန်တံဂှ်တုဲ ဂွံကလေၚ်စကမၠောန် ဒှ်ဒၟံၚ်အခက်အခုဲရောၚ် ညးကၠောန်ၜဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကမၠောန်ၜဵုစဲတ္ၚဲဂှ် လၟေၚ်သၞာံ စကၠောန်ဒၟံၚ် ပ္ဍဲဂိတုသေပ်တေမ်ဗာ သတ္တာဟလက္ကရဴအိုတ်ဂှ်ကီုလေဝ် သၞာံဏံဂှ်တှ်ေ ဂွံကလေၚ်စခံက်ၜဵုတံဂှ် အခက်အခုဲနွံဒၟံၚ်ရ။
ကမၠောန်ၜဵုစဲတ္ၚဲတံဝွံ အပ္ဍဲကာလသီအဝဵုပွိုၚ်ပိသၞာံပြၚ်ဏံ ၚုဟ်ကၠေၚ်စက် က္ဍၚ်ကၠုၚ်ကီု၊ ကော်ကောန်ကလောန်ဟွံဂွံကီု၊ ၚုဟ်ၜဵု စှ်ေဒၟံၚ်ကီု၊ သီုကဵုဗြဲဂူဒၟံၚ်တံဂှ်တုဲ စကမၠောန်ဟွံမာန်ဏီရ။
ညးကၠောန်ၜဵုမွဲတၠတံဂှ်တှ်ေ ဟိုတ်နူအခက်အခုဲနာနာသာ်တုဲ ပ္ဍဲရာသဳၜဵုသၞာံဏံ ညးကၠောန်ၜဵု ဟွံအောန်နူကဵု ၃၀ တၟံကၠံ ဒးဂဗဒၟံၚ်ကဵု အကာဲအရာ ဒးဒေါအ်ဇူကမၠောန်တံဂှ်ရောၚ် ဟီုရ။
“ၚုဟ်ဗၞိက် တိုန်ဒၟံၚ်ကဆံၚ်ဏံ ကောန်ကလောန်ဂှ်လေဝ်အောန်တုဲ ပိုယ်တံ ဒးကၠောန်ကလောန်တှ်ေ ဒးပတှ်ေကောန်ကလောန်တံရဏောၚ်။ ဖဴၜဵုလ္ၚဵုတံဂှ်တှ်ေ လၟုဟ်ကရောတ်ဒၟံၚ်အိုတ်ယျ။ ညံၚ်ဟွံဂွံတိတ်နူကလောန်ဂှ် ဟီုဒၟံၚ်အိုတ်ရ။ ပိုယ်တံ ဗီုလဵုဂွံဆက်အာဂတဂှ်ရော။ မၞိဟ်ကၠောန်ဟွံမာန် ဒှ်ဒၟံၚ်တၟာဂလိုၚ်ဏောၚ်။ ဟိုတ်နူအကာဲအရာတုဲ ဒးဒေါအ်ဂှ် ဒှ်အာၜိုတ် ၃၀ တၟံကၠံယျ” သာ်ဝွံ သ္ဂးရ။
သ္အာၚ်နူဂှ်ပၠန် ညးကၠောန်ၜဵုတံဝွံ သၞာံတုဲကၠုၚ်တေံလေဝ် ကရောံခရိတ်အိုတ်နာနာသၠုၚ်ဂှ် ဟိုတ်နူဗြဲပလီုခံက်ၜဵုတံတုဲ ဒးကျဗြံလဝ်ဂှ်ရ သၞာံဏံ ဂွံစကမၠောန်ဂှ် ဒးဂဗလဝ်အခက်အခုဲရ။
ညးကၠောန်ၜဵုမွဲတၠပၠန်ဂှ်လေဝ် ၚုဟ်ကောန်ကလောန်တံမပါလုပ် ဟိုတ်နူခရိတ်အိုတ်နာနာ ဇၞော်သၠုၚ်ဒၟံၚ်တုဲ မၞိဟ်ဒးဒေါအ်ဇူကမၠောန်တံ နွံဒၟံၚ်ရောၚ် ဟီုရ။
“သၞာံတုဲတေံ ကၠောန်ကလောန်ဂှ်တှ်ေ ၚုဟ်ဗၞိက်ဂှ်လေဝ် တိုန်။ သၞာံဏံတှ်ေ ပဵုတုဲတိုန်ပၠန်ရ။ ၚုဟ်ကောန်ကလောန်ဂှ်လေဝ် ထပ်တိုန်ပၠန်။ သၞာံဏံ ဖဴလ္ၚဵုတံဂှ်တှ်ေ ဟွံကၠောန်ဂှ်နွံ။ ဖဴဇူထောံဂှ်လေဝ် နွံ။ လ္ပာ်ပ္ၚပိုယ်ဏံတှ်ေ ဖဴဇူထောံလဝ်ဂှ်နွံရ။ လ္ပာ်ဝါဂၠံၚ် အံၚ်ခေဝ်တံဂှ်လေဝ် မၞိဟ်ဇူလဝ်နွံ။ သၞာံဏံ ဟွံတိတ်ပုဟ်” သာ်ဝွံ သ္ဂးရ။
မွဲလ္ပာ်ဂှ်ပၠန် ဂွံကလေၚ်စကမၠောန်ၜဵု ပ္ဍဲအရာကော်ကောန်ကလောန်တံဂှ် လ္တူနူကဵုသၞာံတုဲတေံဂှ် ၚုဟ်လိၚ်တ္ၚဲ ဂလိုၚ်ပ္တိုန်ကၠုၚ် မွဲလ္ၚီတုဲ မၞိဟ်တြုံမွဲတၠ မွဲတ္ၚဲ မွဲဠက်ဒ္ကေဝ်၊ မၞိဟ်ဗြဴမွဲတၠ မွဲတ္ၚဲ ၇၀၀၀ ဒ္ကေဝ်ကဵုတုဲ ကော်ကေတ်ဒၟံၚ်ကီုလေဝ် ဒးဆေၚ်ဒၟံၚ်မုက်ကဵု ပြသၞာကောန်ကလောန်အောန်တံရ။
ဟိုတ်နူအကာဲအရာသာ်ဏံတုဲ နကဵုညးကၠောန်ၜဵုလ္ၚဵုတံ ဂွံဖအောန်ဖျေံ ကမၠောန်ကဵု ဂွံဒေါအ်ဇူတံ နွံကၠုၚ်တုဲ ပ္ဍဲရာသဳၜဵုသၞာံဏံ ပရေၚ်ကၠောန်ပ္တိတ်ၜဵု စှ်ေကၠုၚ်တီတီမာန်ရောၚ် ညးကၠောန်ၜဵုတံ သ္ၚဳဂၠိပ်လဝ်အိုတ်ရ။
တွဵုရးဍုၚ်မန်ဝွံ ကၠောန်ဒၟံၚ်ကမၠောန်ၜဵုစဲတ္ၚဲ ပ္ဍဲကဵုပွိုၚ်ဍုၚ်ပံၚ်၊ ဇြပ်ဗု၊ ပ္ဍဲကဵုပွိုၚ်ဍုၚ်ရေဝ်တံ အဓိကတုဲ လၟေၚ်သၞာံ လျိုၚ်တာန်ၜဵု တိတ်ဒၟံၚ် ၄၀၀၀၀ ပြၚ်တုဲ ၜဵုတိတ်ကၠုၚ်တံဂှ် မာန္တလေဝ်၊ လ္ဂုၚ်တံ မပါလုပ် ပလံၚ်ပ္တိုန်သွံတြးဒၟံၚ် ပ္ဍဲကဵုရးဒေသ ကေုာံ တွဵုရးလ္ၚဵုတံရ။
ပရိုၚ်−သြၚ်လောန်တိုၚ်(မ်)
ဗီု−CJ