သဵု(လ်) ၊ အံက်တဝ်ဗာ ၂
ကိုဝ်ရဳယျာသၠုၚ်ကျာ ပၠပၞာန်တုဲ အခိၚ်ပ္တိတ်ထ္ၜး ဇြဟတ်ပၞာန်ညးတံဂှ် သမ္မတယောန်သက်ယိုဝ်ဂှ် နကဵုကိုဝ်ရဳယျာသၟဝ်ကျာ ယဝ်ရဗ္တိုက်ရပ်စပ်အာ လွဟ်လက်နက်နျူကလဳယျာ ကုညးတံမ္ဂး ဒှ်အာနိဂီု အလဵုအသဳပျုၚ်ယာန်ဏောၚ် ပ္ဍဲဂိတုအံက်တဝ်ဗာ ၁ တေံ ဟီုလဝ်ရ။
ပ္ဍဲကဵုပေါဲပၠပၞာန် ကိုဝ်ရဳယျာသၠုၚ်ကျာ ထ္ၜးပျးလဝ် ကွဳစၚ်ခြပ်ပသဲ လ္တူဂၠံၚ်ဇၞော်ဍုၚ်သဵုလ် က္ၜၚ်ကျာဗ္တိုက်တံ ပဝ်ယာန်ဒၟံၚ်ဂှ် သီုကဵုထ္ၜးပျးကၠုၚ်လဝ် ကမ်လှောဝ် Hyunmoo-5 ဇၞော်အိုတ် မပလီုကၠေံ ဒၞါဲပါဲဗုမ် သၟဝ်တိတံမာန်ဂှ်ကီုရ။
အခိၚ်ပရေၚ်ဆက်ဆောံ အကြာကိုဝ်ရဳယျာၜါဍုၚ် ဒှ်ဒၟံၚ်သဝ်အိုတ်သာ်ဏံဂှ် ကၠောန်ဗဒှ်လဝ် ပေါဲပၠပၞာန် နဒဒှ်တ္ၚဲကၠောံသၞာံ ဒပ်ပၞာန်ကိုဝ်ရဳယျာသၠုၚ်ကျာရ။
ကိုဝ်ရဳယျာသၠုၚ်ကျာဂှ်ဝွံ ဒှ်သၞညးတံ အဓိကရောၚ် ကိုဝ်ရဳယျာသၟဝ်ကျာ လလောၚ်တြးလဝ်တုဲ ပြံၚ်ဆုဲလဝ် လွဟ်လက်နက်နျူကလဳယျာညးတံ ပ္ဍဲပယျဵုရ။
ကိုဝ်ရဳယျာသၟဝ်ကျာ ယဝ်ရပ္တိတ်ကၠုၚ်ဇြဟတ် သွက်ဂွံရပ်စပ်လွဟ်လက်နက်နျူကလဳယျာတံဂှ်မ္ဂး ဒးဆေၚ်အာမုက် ကုပရေၚ်ခၠေဝ်ပလန် နူကဵုဒပ်ပၞာန်ကိုဝ်ရဳယျာသၠုၚ်ကျာ၊ အမေရိကာန် ကေုာံ မဟာမိတ်တံဏောၚ်ဂှ် သမ္မတယောန်သက်ယိုဝ် ဟီုလဝ်ရ။
တ္ၚဲဂှ်တှ်ေ ဒှ်ကၠုၚ်တ္ၚဲနိဂီု အလဵုအသဳကိုဝ်ရဳယျာသၟဝ်ကျာဏောၚ်ဂှ် သမ္မတကိုဝ်ရဳယျာသၠုၚ်ကျာ ဟီုလဝ် ပ္ဍဲအခန်ကၞာ မကၠောန်ဗဒှ်လဝ် ပ္ဍဲဗ္ဒိုပ်ဖျေံသ္ဇိုၚ် ဒပ်ကျာ လ္တူဍုၚ်သဵု(လ်) ရ။
အမေရိကာန် သွက်ဂွံရီုဗၚ်ကဵု ကိုဝ်ရဳယျာသၠုၚ်ကျာ နူကဵုဘဲအန္တရာယ် ကိုဝ်ရဳယျာသၟဝ်ကျာဂှ် ဖျေံလဝ်ကောန်ဒပ် ဂၠိုၚ်ကဵုလ္ၚီတုဲ စဵုဒၞါကဵုလဝ် ကိုဝ်ရဳယျာသၠုၚ်ကျာ လွဟ်နျူကလဳယျာအပိုၚ်ညးတံ ဟွံမွဲဂှ်ရ။
နကဵုလွဟ်နျူကလဳယျာဂှ် ညးတံ စဵုဒၞါအာ ညးတံမာန်ဏောၚ် လညာတ်ဗၠေတ်မှာသာ်ဏံ သွက်ဂွံသၠးကၠေံဂှ် သမ္မတကိုဝ်ရဳယျာသၠုၚ်ကျာ ဖ္တိုက်ဖ္အောဝ်လဝ် ကိုဝ်ရဳယျာသၟဝ်ကျာရ။
ကိုဝ်ရဳယျာသၟဝ်ကျာဝွံ ဗလးလဝ်ဂီု မစုတ်လဝ်ခၟိက်ခၟံက်တံ ပ္ဍဲဍုၚ်ကိုဝ်ရဳယျာသၠုၚ်ကျာဂှ်ရ ဒှ်အာပလာပ်ပထုဲ သွက်ဂၠံၚ်တရဴကျာတံ အာကၠုၚ်တံဂှ်တုဲ ပၟတ်တူအာလဝ်ညိည က္တဵုဒှ်လဝ်ရ။
ကိုဝ်ရဳယျာသၟဝ်ကျာဂှ်တှ်ေ နကဵုဒပ်ပၞာန်ညးတံ သွက်ဂွံစဵုဒၞါတၟံကၠံပေၚ်ၚ်ဂှ် ဒစးဒုၚ်ပလေဝ်ပလေတ်လဝ်တုဲယျဂှ် ခၠေဝ်ပလန်လဝ်ရ။
Ref: AFP