မတ်မလီု၊ အံက်တဝ်ဗာ ၄
တွဵုရးဍုၚ်မန် ပ္ဍဲဍုၚ်မတ်မလီုဂှ် ကောန်ဒပ်ဗၠာဲသၟိၚ်တံဝွံ ပံၚ်တောဲကဵု ကောန်ဒုဟ် ကလိလောန်ဒုဟ်ဒဏ်တုဲ မကလေၚ်ဗၠးကၠုၚ်တံဂှ်တုဲ ဘပဠအာတ်မိက်ဒၟံၚ်သြန် လ္တူညးဍုၚ်ကွာန်တံ နကဵုနဲကဲနာနာသာ်ရာၚ် ညးလ္တူဍုၚ်တံ ဟီုရ။
ကောန်ဒပ်ဗၠာဲသၟိၚ် သၟဝ်တဲကံၚ်ဇြဳပၞာန်တံဝွံ ရပ်စပ်စကာ ကောန်ဒုဟ် ကလေၚ်ဗၠးကၠုၚ် နကဵုဂဗုတ်ကၠတ်ဂၠံက်၊ ဂဗုတ်လီဠာန် မပါလုပ် သီုကဵုဂဗုတ်တၞဟ်ဟ်တံဂှ်တုဲ စွံပွန်ကဵုဆေၚ်ဒုၚ်ကဝံၚ်၊ ဆေၚ်သွံဖုၚ် ကေုာံ ဆေၚ်ကွဳလိုန်ဓာတ်တံဂှ်တုဲ အာတ်ဒၟံၚ်လှုဲတံ ကၠောန်ကၠုၚ်ရ။
ပ္ဍဲကဵုအာတ်မိက်ဘပဠသြန် နူကဵုသြၚ်လောန်တိုၚ်(မ်) ဂွံအခေါၚ်သၟာန်သၟုက်တံဂှ် ကောန်ဒုဟ်ကၠတ်နၚ် ကွဳလိုန်ဓာတ်၊ ကွဳစက် ကေုာံ ဖုၚ်တံဂှ်ဝွံ ကိုပ်ကၠာအိုတ် ကၠုၚ်စိုပ်သွံတြးဏာလဝ် ကပေါတ် ပ္ဍဲကဵုဆေၚ်သွံတြး မဆေၚ်စပ်တံဂှ်ရ။
ကြဴနူဂှ်တုဲ ကောန်ဒပ်ဗၠာဲသၟိၚ်တံ ကော်နၚ် ကောန်ဒုဟ်တံဏံဂှ်တုဲ နကဵုတၚ်စောဲစပ် ဒုၚ်တဲကပေါတ်ကမၠတ်တံဂှ် အာတ်မိက်ဒၟံၚ်သြန် ဂၠိုၚ်ကဵုကိုဋ်တံ နွံဒၟံၚ်တုဲ ညံၚ်ဟွံဂွံပါလုပ် ပ္ဍဲဂဗုတ်တံဏံဂှ်လေဝ် လၟေၚ်ဒဒှ်ဒးကဵုဒၟံၚ် ဂၠိုၚ်ကဵုကိုဋ်တံ နွံဒၟံၚ်ရ။
အတိုၚ်ဂလာန် ညးမဒးဂဗလဝ်ကဵု ပရေၚ်ဘပဠ အာတ်မိက်သြန်တံဂှ်မ္ဂး ဗွဲကြဴဏံ ရဲကလိလောန်ဒုဟ်တံဏံ ဂွံဒးဒုၚ်ရပ်ဒက် ဟွံမွဲတုဲ အာကၠုၚ်ဒၟံၚ်လ္တူဍုၚ် မံက်က်ထေၚ်ၚ်တုဲ ရေၚ်တၠုၚ်ဒၟံၚ် နဒဒှ်ရဲကဵုပရိုၚ် ကံၚ်ဇြဳပၞာန်တံဂှ် ဂွံဆဵုကေတ်ရောၚ် သ္ဂးရ။
စပ်ကဵုလၟေၚ်ဒဒှ်ဏံတုဲ မၞိဟ်ဂွံတီကေတ်လဝ်မွဲတၠ ဟီုထ္ၜးလဝ်ဂှ်မ္ဂး ပြဝကောန်ဒပ်ဗၠာဲသၟိၚ်တံဝွံ ပံၚ်တောဲကဵု ရဲကလိလောန်ဒုဟ်တံဂှ်တုဲ နကဵုနဲကဲနာနာသာ် ဗ္တိုက်ဒမၠဒၟံၚ် လ္တူညးဍုၚ်ကွာန်တံ ညံၚ်ကဵုလုပ်သၞောဝ်ဂှ် ပါ်ပါဲလဝ်ရ။
“နဲကဲဂှ်တှ်ေ ဒှ်ဒၟံၚ်တၟာဂလိုၚ်ရ။ ဥပမာ ယဝ်ရဍေံတံတီကေတ်ဒၞါဲ သွံလဝ်လှာလာၚ်ဇြေန် နကဵု without တံဂှ်မ္ဂး ကော်နၚ် ညးမကၠတ်လဝ်မွဲတၠတုဲ မၞိဟ်ဏံ စၞောန်ထ္ၜးတဲ။ ယဝ်ရာန်လဝ်တှ်ေ ကၠုၚ်ပသောၚ် ပ္ဍဲဗ္ဒိုပ်။ ဒုၚ်တဲကမၠတ်ဂးတုဲ ဖျေံထံၚ်ဏောၚ်ဂးတုဲ ဘပဠဒၟံၚ်ရ။ တုဲပၠန် ဟွံမိက်ဒးထံၚ်မ္ဂး အာတ်ဒၟံၚ်သြန်ဂၠိုၚ်ကဵုစှော်ကိုဋ်။ လၟုဟ်ဂှ် လီစဒၟံၚ် နကဵုနဲကဲစုၚ်ဇဳဏောၚ်။ ဗ္တိုက်ဒမၠဒၟံၚ် အပ္ဍဲဗွိုၚ်သၞောဝ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် ကောန်ဒပ်ဗၠာဲသၟိၚ်တံဝွံ ထ္ၜးဟိုတ် ရပ်ဒက်ညးဍုၚ်ကွာန်တံတုဲ အာတ်မိက်ဒၟံၚ်သြန် နကဵုနဲကဲနာနာသာ်တံ နွံဒၟံၚ်တုဲ အပ္ဍဲကောန်ဒပ်တံဂှ်လေဝ် ဗက်စအဂတိတံ က္တဵုဒှ်ဒၟံၚ် ဇၞော်ကဵုဇြဟတ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ကလိဂွံလဝ်ဂှ်မ္ဂး အပ္ဍဲကာလသီအဝဵုဏံ ဇၞော်သ္ကိုပ်နူကဵုဂကောံဒပ်ဗၠာဲသၟိၚ်တံဝွံ ပါလုပ်ဒၟံၚ် ပ္ဍဲအရာပၠောပ်ပ္တိုန်ကွဳလိုန်ဓာတ် ကေုာံ ကွဳစက် လာၚ်ဇြေန်ဟွံမွဲတံဂှ်တုဲ ကောန်ဒပ်ဗၠာဲသၟိၚ်တံလေဝ် နကဵုနဲကဲနာနာသာ် ဂၠါဲကၠုၚ်ဒၟံၚ်သြန်တံ နွံဒၟံၚ်ရ။
ပ္ဍဲဍုၚ်မတ်မလီု အပ္ဍဲကာလသီအဝဵုဏံ ဂဗုတ်ကလိလောန်ဒုဟ် မပ္တံကဵုကၠတ်ဂၠံက်၊ ပၠံၚ်ၜး၊ လီဠာန်တံ၊ ဂဗုတ်နာနာ က္တဵုဒှ်ဒၟံၚ်ကီုလေဝ် လ္ပာ်ဒပ်ဗၠာဲသၟိၚ်တံ ရပ်ဒက်ထ္မံက်ပ္တိတ်ကဵုမာန် ဟွံမွဲပုဟ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−MOI