ကအ်ဗိန်၊ အံက်တဝ်ဗာ ၄
အခိၚ်ကာလကံၚ်ဇြဳပၞာန် ကံၚ်ကပှ်ဒၟံၚ်စရၚ်လၟိဟ်မၞိဟ်သ္ဂာဗ္တံ သွက်ဂွံဂွံစရၚ်မာဲသ္ဇိုၚ် သွက်ပေါဲရုဲမာဲဂှ် အခိၚ်ဗ္တံ ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော် ပ္ဍဲဒေသၜဳဂြာၚ် ပယျဵုမန်ကဵု ကရေၚ်ဂှ်ရောၚ် ဂွံတီကေတ် ဇရေၚ်ညးဒေသတံရ။
စနူဂိတုအံက်တဝ်ဗာ ၁ တုဲ နကဵုဗ္ၜတ်အလုံဍုၚ်မွဲ ကံၚ်ဇြဳပၞာန် စကံက်လဝ်စရၚ်လၟိဟ်မၞိဟ်သ္ဂာဗ္တံဂှ်တုဲ ပ္ဍဲကဵုတွဵုရးကရေၚ် ပွိုၚ်ဍုၚ်ကအ်ကြိက် လ္ပာ်ကွာန်ကအ်ဗိန် ဒၞါဲပရေၚ်ချဳဒရာၚ် ဂကောံပၠန်ဂတးတံနွံလဝ်ဂှ်လေဝ် ကံက်ဒၟံၚ်စရၚ်လၟိဟ်မၞိဟ်ရ။
ညးဒေသမွဲတၠဂှ် အခိၚ်ကံက်ဒၟံၚ်စရၚ်လၟိဟ်မၞိဟ်သ္ဂာဗ္တံဂှ် ဟိုတ်နူပရိုၚ် ဂကောံပၠန်ဂတးတံ ကြပ်ကၠုၚ်ဒၟံၚ်ဂှ်ဂးတုဲ အခိၚ်ဗ္တံ ကံၚ်ဇြဳပၞာန် ပန်ခ္ဍာၚ်နၚ်ဒၟံၚ်လွဟ်ဇၞော် ဂွံပိဗ္တံယျဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အခိၚ်လၟုဟ် ပ္ဍဲကအ်ဗိန်ဂှ် ဗက်ကံက်ဒၟံၚ်စရၚ်လၟိဟ်မၞိဟ်ရ။ ဗက်ကံက်တုဲ ဂကောံမ္ၚး ( ဂကောံပၠန်ဂတး) တံ စုက်ကၠုၚ်ဒၟံၚ်ဟာဟွံတီ ဍေံတံ သွက်ဂွံစဵုဒၞါမၞိဟ်ဍေံတံဟာဂှ် အဲလေဝ် ဟွံတီပုဟ်။ ဍေံတံ ပန်ခ္ဍာၚ်နၚ် လွဟ်ဇၞော် နူကဵုမ္ၚးတေံ။ ဟွံလအ်ဟွံလအ် မွဲတဲ ၜါတဲ ဍေံတံ ပန်ဖျေံဒၟံၚ်သာ်ဏံရ။ ဗ္တံတုဲကၠုၚ်တေံမ္ဂး ပေၚ်အာပိဗ္တံယျ၊ ဍေံတံ ပန်ဖျေံဒၟံၚ်ဂှ်” သာ်ဝွံ သ္ဂးရ။
ပ္ဍဲအရာပန်ပှော်လွဟ်ဇၞော်ဂှ် နူကဵုခလရ ၈၁ ဖျေံသ္ဇိုၚ်ဟပၠၚ် ကေုာံ နူကဵုက္ၜၚ်ပၞာန် ဒပ်ဍာ်ကံၚ်ဇြဳပၞာန်တံဂှ် ပန်ဖျေံဒၟံၚ်တုဲ နူကဵုကွာန်ဓမ္မသ ကဵု ကွာန်ကအ်ဗိန် ဖျေံလဝ်ဗ္ဒိုပ်ဂှ်လေဝ် ပန်ဘဒၟံၚ် လ္ပာ်မ္ၚးကွာန်ဂှ် ညးဒေသတံ ဟီုရ။
ကၠာဟွံဂွံကံက်စရၚ်လၟိဟ်မၞိဟ်သ္ဂာဗ္တံ ဂွံမွဲတ္ၚဲ ပ္ဍဲဂိတုသေပ်တေမ်ဗာ ၃၀ အခိၚ်ဗ္တံဂှ် လ္ပာ်ကွာန်ခအံၚ်ကြေဟ် ဂကောံကွာန်ကအ်ဗိန်ဂှ် ဟိုတ်နူကံၚ်ဇြဳပၞာန် ပန်ပှော်လွဟ်ဇၞော်တုဲ မၞိဟ်ဗြဴမွဲတၠ ကလိဂွံလဝ်ဝပ်တုဲ သ္ၚိဒၟံၚ်လ္ၚဵု လီုလာ်အာလဝ်ရ။
သ္အာၚ်နူဂှ်ပၠန် ပ္ဍဲဂိတုသေပ်တေမ်ဗာ ၂ အခိၚ်ဗ္တံ ၜိုတ် ၈ နာဍဳဂှ်လေဝ် ကွာန်ဗ္ဒါဲဗ္ဒါဲကအ်ဗိန်တံဂှ် ကံၚ်ဇြဳပၞာန် ပန်ပှော်ကဵုလွဟ်ဇၞော် ဟွံပိုတ်သ္ကုတ်တုဲ အကြာညးဒေသတံ ပေါဲဗ္တိုက်ကလေၚ်ဒှ်ကၠုၚ်မွဲဝါပၠန်ဂှ် ဒှ်ဒၟံၚ်ဓဝိၚ်အိုတ်ရ။
ဟိုတ်ဂှ်ရ ညးဒေသမံၚ်ဒၟံၚ် အပ္ဍဲကွာန်ကအ်ဗိန်ကီု ဗ္ဒါဲပွဳပွူကောန်ဒပ်ကံၚ်ဇြဳပၞာန်တံ ဖျေံလဝ်ဗ္ဒိုပ်တံဂှ် ဒးပါဲဒလေတ်ဒၟံၚ် ဒၞါဲဗၠးဘဲတုဲ ညးဒေသသှ်ေတံလေဝ် ဒစးဒုၚ်ပလေဝ်ပလေတ်ဒၟံၚ်ရောၚ် ဂွံတီကေတ်ရ။
ကောန်ဒပ်ကံၚ်ဇြဳပၞာန်တံဝွံ ပ္ဍဲဒေသၜဳဂြာၚ် ပါလုပ်သီုကဵုကအ်ဗိန်၊ ပ္ဍဲကဵုကွာန်ဓမ္မသ၊ ကွာန်ကြေဝ်ဏာတံဂှ် နကဵုတၚ်ထ္ၜးဟိုတ်ပရေၚ်ဂီုကၠီုဂှ် နူစပေါဲဗ္တိုက်ဒှ်တေံရ ဖျေံလဝ်ဗ္ဒိုပ်သၞေဟ်ကၚ်ဂှ် ညးဒေသမွဲတၠ ဟီုရ။
“ဍေံတံဖျေံလဝ်ဗ္ဒိုပ် နူစဍေံတံလုပ် ဂိတုပိတေံဂှ်ရ ကေတ်လဝ်ဒၞါဲ ပ္ဍဲကွာန်ဓမ္မသ။ ဍေံတံမံၚ်ဒၟံၚ် ပ္ဍဲဘာလကျာ်။ တုဲပၠန် ရဲမၚ်ဒၟံၚ်ကၚ် လ္တူဂၠံၚ်ရမ္မာဝတဳ ဂၠံၚ်အာကအ်ဗိန်−မတ်မလီုတံဂှ်လေဝ် နွံရ” သာ်ဝွံ သ္ဂးရ။
အပ္ဍဲဂိတုမာတ်တုဲကၠုၚ်တေံ ဂကောံပၠန်ဂတးပံၚ်တောဲတံ လုပ်စိုပ်ဗ္တိုက်သီလဝ် ဗ္ဒိုပ်ဗၠာဲသၟိၚ်တိဍာ်ကအ်ဗိန်တုဲ ကံၚ်ဇြဳပၞာန် ထ္ပက်ကရောၚ်ပၞာန် နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ ပေါဲဗ္တိုက်ၜါလ္ပာ် သ္ကာတ်မြဟ်လဝ်ရ။
ဟိုတ်ဂှ်ရ နူကဵုဒေသၜဳဂြာၚ်ဂှ် ကွာန် ဟွံအောန်နူကဵု ၁၀ ကွာန် ဒးအာလဝ်ဘဲပၞာန်တုဲ ညးဒေသတံ ဒးဂြိပ်ဒဴပါဲဒလေတ်လဝ် ဒၞါဲဗၠးဘဲတုဲ လ္ပာ်ကွာန်ဓမ္မသဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ပှော်ကဵု ပၞာန်တိုက်၊ ပၞာန်ဍာ်၊ ပၞာန်ကျာတံတုဲ သ္ၚိဒၟံၚ် ၃၀၀ ပြၚ် ပၟတ်တူဒှ်အာဆောံရ။
ပရေၚ်ဒဒှ်သာ်ဏံတံ က္တဵုဒှ်လဝ်ဂှ်ရ ပ္ဍဲအခိၚ်ကာလကံက်စရၚ်လၟိဟ်မၞိဟ်ဏံ ဖေက်ဂကောံပံၚ်တောဲပၠန်ဂတးတံ လုပ်စိုပ်ဗ္တိုက်ကၠုၚ် အပ္ဍဲဒေသၜဳဂြာၚ်ဂှ်တုဲ ကံၚ်ဇြဳပၞာန် ပန်ဘဒၟံၚ် နကဵုလွဟ်ဇၞော်တံရ။
အခိၚ်လၟုဟ် ပ္ဍဲကဵုကံက်ဒၟံၚ်စရၚ်လၟိဟ်မၞိဟ်သ္ဂာဗ္တံ ပ္ဍဲဒေသၜဳဂြာၚ်ဂှ် ကောန်ဒပ်ကံၚ်ဇြဳပၞာန် ဗ္ဂပ်စုတ်လဝ်လွဟ်လက်နက်ပေၚ်ၚ်တံ ၜိုတ်ဇြဟတ် ၅၀ ပြၚ် ကေတ်ဂီုကၠီုတုဲ ရဲကံက်စရၚ်တံ ဗက်ကံက်ကပှ်ဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ပရိုၚ်−သြၚ်လောန်တိုၚ်(မ်)
ဗီု−CJ