ၜဳကလေၚ်၊ အံက်တဝ်ဗာ ၅
တွဵုရးဍုၚ်မန် ပ္ဍဲပွိုၚ်ဍုၚ်ၜဳကလေၚ် ပ္ဍဲဂိတုအံက်တဝ်ဗာ မွဲတ္ၚဲဓဝ်ဂှ် ညးဒေသ ဗ္ဒါဲ ၃၀ တၠ ပါလုပ်သီုကဵု ရဲကွာ်ဂၠံၚ်တံ ဒးဒုၚ်ရပ်ဒက်လဝ်ရောၚ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
ကံၚ်ဇြဳပၞာန် ကေုာံ ဒပ်ပံၚ်ကောံ ဒပ်မၚ်ပယျဵု BGF တံဝွံ ပ္ဍဲကဵုတ္ၚဲဂှ် ကၟာတ်လဒဵုဂၠိုက်ဂၠါဲစၟဳတ်လဝ် ပ္ဍဲကဵုသၞေဟ်ကၚ်ဂီုကၠီု သ္ကုတ်ဂၠံၚ်ၜဳကလေၚ်−နာတ်ကျဳ ဗ္ဒါဲအရာပ်ဗိုလ်တေဇ ဍုၚ်ၜဳကလေၚ်ဂှ်ရ။
အခိၚ်ဂၠိုက်ဂၠါဲစၟဳတ်ဒၟံၚ်ဂှ် နူကဵုပွိုၚ်ဍုၚ်ယှိုဲကျေန် ရးဗဂေါဂှ် ကောန်ကလောန်ကၠုၚ်ခါဲထဝ် လ္ပာ်နာတ်ကျဳ ပွိုၚ်ဍုၚ်ၜဳကလေၚ် မၞိဟ်ဗြဴ ၂ တၠကဵု မၞိဟ်တြုံ ၂၀ တၠပြၚ်ဂှ် ရပ်ဒက်လဝ်ရ။
ကြဴနူဂှ်တုဲ သၟတ်ဗၠာဲပန်တၠ ဍိုက်ကၠုၚ်ကွဳလိုန်ဓာတ်တံဂှ်လေဝ် နကဵုတၚ်စောဲစပ် ဒှ်ဒပ်စဵုဒၞါညးဍုၚ်ကွာန် PDF တံမာန်ဂှ် ထပ်ရပ်ဒက်လဝ်ရ။
ပ္ဍဲကဵုညးဒးဒုၚ်ရပ်ဒက်တံဂှ် ကောန်ကလောန်ကတိုၚ်ထဝ်တံဂှ်တှ်ေ ဂိတုအံက်တဝ်ဗာ ၄ အခိၚ်နူဂယးဂှ် ကလေၚ်ဗလးကဵုလဝ်ကီုလေဝ် ညးသၟတ်ပန်တၠဂှ်တှ်ေ ဆက်ရပ်ဒက်လဝ်ရောၚ် ဂွံတီကေတ်ရ။
ညးသၟတ်ပန်တၠ ရပ်ဒက်လဝ်တံဂှ် ပ္ဍဲကဵုတမ်ဒပ်ကံၚ်ဇြဳပၞာန် ခလရ စၟတ် ၈ ဖျေံသ္ဇိုၚ်ၜဳကလေၚ်ဂှ် စၟဳတ်သၟာန်သၟုက်ဒၟံၚ်တံ ကၠောန်ဒၟံၚ်တုဲ ဒဵုကဵုအခိၚ်လၟုဟ် ဟွံဗလးဏီပုဟ်ဂှ် ဂွံတီကေတ်ရ။
ဒပ်ကံၚ်ဇြဳပၞာန်ဝွံ တုဲကၠုၚ်ပ္ဍဲဂိတုအံက်တဝ်ဗာ ၂ တေံ ဟိုတ်နူဂကောံဇြဟတ်ပၠန်ဂတးတံ ကၠုၚ်စိုပ်ဗ္တိုက်လဝ် အချုက် (တောင်စွန်း) ဍုၚ်ၜဳကလေၚ်ဂှ်တုဲ သၠုၚ်ပ္တိုန်ပရေၚ်ဂီုကၠီု အပ္ဍဲဒေသတုဲ ကၟာတ်လဒဵုစၟဳတ်ဒၟံၚ်တံ ကၠောန်ဒၟံၚ်ရ။
အတိုၚ်လိက်ဒုၚ်စဳရေၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP မလလောၚ်ပ္တိတ်လဝ် ပ္ဍဲဂိတုအံက်တဝ်ဗာ ၄ တေံဂှ်မ္ဂး အပ္ဍဲကာလသီအဝဵုဏံ အလုံဍုၚ်မွဲ ညးဒးဒုၚ်ရပ်တံ နွံကၠုၚ်လဝ် စဵုကဵု ၂၇၅၉၉ ပြၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ