မတ်မလီု၊ အံက်တဝ်ဗာ ၅
အလုံဍုၚ်မွဲ သၞာံဏံ အပ္ဍဲပွိုၚ်ပန်ဂိတု ဟိုတ်နူလၟေၚ်ဒဒှ် ဒးဒုၚ်ပြိုက်ဂစိုတ် ကဵုဂအုံဗွဝ်တံဂှ်တုဲ ကောန်အရာပ် ၇၀၀ ပြၚ် ချိုတ်အာလဝ်ရောၚ် ဂကောံသုတေသနညာန်လေန်တေတ် လလောၚ်ပ္တိတ်လဝ် ပ္ဍဲဂိတုအံက်တဝ်ဗာ ၁ တေံရ။
နူဂိတုမေ စဵုကဵုဂိတုအဝ်ဂါတ် ပ္ဍဲကဵုပရေၚ်ပြိုက်ဂစိုတ် နကဵုဂအုံဗွဝ် မက္တဵုဒှ်လဝ် ပ္ဍဲကဵု ၃၅ ပွိုၚ်ဍုၚ်ဂှ် ဂကောံပၞာန်တံ ကလိလောန်လဝ် ၉၁ တၟံကၠံ ဂၠိုၚ်အိုတ်တုဲ လၟေၚ်ဒဒှ် ၅၆ ပါလုပ်တုဲ ကောန်အရာပ် ၆၄၀ ပြၚ် ဒးချိုတ်အာလဝ်ရ။
သ္အာၚ်နူဂှ်ပၠန် လၟေၚ်ဒဒှ်ဒးချိုတ်အာလဝ်ဂအုံဗွဝ် ဟွံဂွံတီကေတ် ဂကောံကလိလောန်ဂှ်လေဝ် ပါလုပ်ဒၟံၚ် ၄ တုဲ မၞိဟ်ဒးချိုတ်အာ ၆၂ တၠ နွံလဝ်ရောၚ် တၚ်နၚ်ဂကောံသုတေသနညာန်လေန်တေတ်တံ ထ္မံက်ထ္ၜးလဝ်ရ။
ဗီုပြၚ်ဂစိုတ်လဝ်တံဂှ်တှ်ေ ပေါဲဗ္တိုက်က္တဵုဒှ်လဝ်ဟွံမွဲမွဲသာ် စွံပွန်ကဵုကောန်အရာပ်တံတုဲ ဂကောံပၞာန်တံ ဗ္တိုက်ကဵုပၞာန်ကျာ ပန်ကဵုလွဟ်ဇၞော် ထ္ပက်ကရောၚ်ပၞာန်တုဲပြိုက်ဂစိုတ်လဝ်တံ ဂၠိုၚ်အိုတ်တုဲ ဗ္တိုက်ကဵုဒရုၚ်ကီု နကဵုဗီုပြၚ်တၞဟ်ဟ်တံလေဝ် ကလိလောန်လဝ်နွံရောၚ် သ္ဂးရ။
မွဲလ္ပာ်ဂှ်ပၠန် အပ္ဍဲလၟေၚ်ဒဒှ်ပေါဲဗ္တိုက်ၜါလ္ပာ် အကြာဂကောံပၞာန်ကဵု ဂကောံဇြဟတ်ပၠန်ဂတးရပ်လွဟ်တံဂှ် ကောန်အရာပ် ချိုတ်အာလဝ် နကဵုဂအုံဗွဝ်တံလေဝ် နွံလဝ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ်တှ်ေ ပ္ဍဲကဵုဍုၚ်ကွာန် ဂကောံပၠန်ဂတးတံ သီဂွံလဝ်တံဂှ် ညံၚ်ပရေၚ်အုပ်ဓုပ်ဟွံဂွံညိၚ်ဝတ် နကဵုတၚ်ရန်တၟံနွံနွံ ရပ်စပ်စကာကၠုၚ် ကောန်အရာပ်တံ နဒဒှ်ပွန်ပရေၚ်ပၞာန် ဂၠိုၚ်ကၠုၚ်ဂှ် သ္ၚဳဂၠိပ်လဝ်ရ။
“ညးဍုၚ်ကွာန်တံ ကြေပ်အကြာတုဲဒးအာဟွံသေၚ် ဗွဲကြဴဏံ နဒဒှ်ပွန်ပၞာန်ဂှ် တၚ်ရန်တၟံနွံနွံ ရပ်စပ်စကာကၠုၚ်ဂှ် ဂၠိုၚ်ကၠုၚ်ကွေံကွေံ။ ဗွဲတၟေၚ် ဒၞါဲဂကောံတမ်ဒပ်တံ ထောံလသာအာတံ ဒၞါဲဍုၚ်ကွာန် ဒၞါဲဗ္ဒိုပ် ဒးဗလးအာတဲတံဂှ် ဟီုမွဲနဲပၠန်မ္ဂး ဒၞါဲဂကောံပၠန်ဂတးတံ သီဂွံလဝ်တံဂှ် နကဵုပၞာန်တိုက် ကလေၚ်သီကေတ်ဟွံမာန်တုဲ ညံၚ်ပရေၚ်အုပ်ဓုပ်ဒေသတံဏံ ဟွံဂွံညိၚ်ဝတ် ဂွံလီုလာ် နကဵုဟိုတ်သာ်ဏံဂှ် စောဲစပ်စုတ် ဂကောံဇြဟတ်ပၠန်ဂတးတံတုဲ ဇၟာပ်ပ်ဒၞါဲ ဟွံချိၚ်ဆ ပန်ပှော်ဒၟံၚ်တံ ဗွဲတၟေၚ် ထောံမခတိုဟ် နကဵုပၞာန်ကျာတံဂှ် အကြာဏံ ဂၠိုၚ်ကၠုၚ်ကွေံကွေံရ“ သာ်ဝွံ သ္ဂးရ။
အတိုၚ်တၚ်နၚ် ဂကောံသုတေသန ညာန်လေန်တေတ် လလောၚ်ပ္တိတ်လဝ်ဂှ်မ္ဂး ဟိုတ်နူဂကောံပၞာန် ရပ်စပ်ပၞာန်ကျာတုဲ ဗ္တိုက်ဒၟံၚ်တံဂှ်တုဲ လၟေၚ်ဒဒှ်ကောန်အရာပ်ဒးချိုတ်အာလဝ် ကဵုဂအုံဗွဝ်ကဵု လၟိဟ်ဒးချိုတ်အာလဝ်တံဂှ်ဝွံ ဒှ်လဝ် ဂၠိုၚ်အိုတ်ရ။
အပ္ဍဲပွိုၚ်ပန်ဂိတု လၟေၚ်ဒဒှ်ပရေၚ်ဗ္တိုက်ပၞာန်ကျာ နကဵုဂအုံဗွဝ် အလုံဍုၚ်မွဲဂှ်ဝွံ ပ္ဍဲမာန္တလေဝ်ဂှ် ၆ ဝါ၊ ပ္ဍဲရခေၚ်ကဵု ရးသေံသၟဝ်ကျာဂှ် ၅ ဝါ၊ ပ္ဍဲသက်ကိုၚ်ကဵု မဂွဵုဂှ် မွဲမွဲရးဒေသ ၃ ဝါ၊ ပ္ဍဲမန် ကဵု ချေၚ်ဂှ် ၁ ဝါ၊ အပံၚ်ဖအိုတ် ၂၄ ဝါ နွံလဝ်တုဲ မၞိဟ်ဒးချိုတ်အာ ၂၇၁ တၠ နွံလဝ်ရ။
နူအခိၚ်သီအဝဵုတုဲ သၞာံဏံ စဵုကဵုဂိတုအဝ်ဂါတ်ဂှ် အလုံဍုၚ်မွဲ လၟေၚ်ဒဒှ်ပြိုက်ဂစိုတ်လဝ် နကဵုဂအုံဗွဝ် လ္တူ ၅ တၠတံဂှ် ကလိလောန်လဝ် ၃၂၀ တုဲ ညးဍုၚ်ကွာန်ကောန်အရာပ် စဵုကဵု ၃၁၉၅ တၠ ဒးဒုၚ်ဂစိုတ်လဝ်ရ။
သ္အာၚ်နူဂှ်ပၠန် လၟေၚ်ဒဒှ်ဒးဒုၚ်ဂစိုတ်လဝ် နကဵုဂအုံဗွဝ်ဂှ်ကဵု ပရေၚ်ဒးချိုတ်အာတံ ကဝက်ပြၚ်ဂှ်ဝွံ က္တဵုဒှ်လဝ် ပ္ဍဲသ္ကုတ်လဒေါဝ်ဍုၚ်ဗၟာ ဒေသအညာ ရးသက်ကိုၚ်ဂှ် တၚ်နၚ်ဂမၠိုၚ် ထ္မံက်ထ္ၜးဒၟံၚ်ရ။
ဥူဖေတာန်ဂှ်တှ်ေ နကဵုဂကောံဍုၚ်သ္အာၚ်ဂမၠိုၚ် နဒဒှ်စဵုဒၞါကောန်ဂကူမၞိဟ်တံတုဲ ကုညးမကလိလောန်ဒုဟ်ဒဏ်တံ ဂွံနွံကဵု တၚ်ကေတ်လျိုၚ် တၚ်ဒုၚ်လျိုၚ်တံဂှ် ဒးရေၚ်တၠုၚ်ကေတ်အရေဝ်ထေက်ဂှ် ထံက်ထ္ၜးလဝ်ရ။
“ညးတာလျိုၚ်တံ စၟဳတ်ကေတ် တၚ်နၚ်ပ္ကောံပ္ကေဝ်လဝ်တံဂှ်တုဲ ဂကောံလ္ပာ်လဵုဟွံဟီု မကလိလောန်လဝ် သၟဝ်က္ဍိုပ်လိက် ဂဗုတ်စဵုဒၞါကောန်ဂကူမၞိဟ်တံဂှ် ထေက်ကဵုဒးကေတ်အရေဝ်ရ။ ပရေၚ်ကေတ်လျိုၚ် ပရေၚ်ဒုၚ်လျိုၚ် ဒးဟီုထေက်ရ။ သာ်ဏံဟွံသေၚ်ပုဟ်ဟီုမ္ဂး လုကဴပေါဲဗ္တိုက်ဏံ ဟွံတုဲမ္ဂး ညးဍုၚ်ကွာန်တံဂှ် ကဵုကၠံ ကဵုလ္ၚီ ဒးချိုတ်ဒၟံၚ်ဏီဏောၚ်ဂှ် အဲချိၚ်ကေတ်ရ။ ဟိုတ်ဂှ်ရ နကဵုဂကောံဍုၚ်သ္အာၚ်ဂမၠိုၚ် ဒးဇြိုဟ်နက် လ္တူကိစ္စဏံထေက်ရ။ မိက်ဂွံဟီု သာ်ဏံရဏောၚ်“ သာ်ဝွံ သ္ဂးရ။
နကဵုဂကောံသုတေသနညာန်လေန်တေတ် ဒုၚ်သ္ဇိုၚ်ကဵုတၚ်နၚ် နူကဵုမဳဒဳယျာပရိုၚ်ဗၠးၜးတံကဵု တၚ်လလောၚ်ပ္တိတ်ပရိုၚ် ဂကောံပၠန်ဂတးတံဂှ်တုဲ ကံက်ကပှ်ပ္ကောံပ္ကေဝ်လဝ်တၚ်နၚ်တံရောၚ် ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)
ဗီု−MNDAA