ကအ်ကြိက်၊ အံက်တဝ်ဗာ ၆
ဒပ်ကံၚ်ဇြဳပၞာန် ဖျေံလဝ်ဒပ် ပ္ဍဲကွာန်ကအ်ဗိန် ပွိုၚ်ဍုၚ်ကအ်ကြိက် တွဵုရးကရေၚ် ဒးဒုၚ်ဗ္တိုက်ကဵုဒရုၚ်တုဲ ကောန်ဒပ်ကံၚ်ဇြဳပၞာန်မွဲတၠ ချိုတ်တုဲ ၜါတၠ ဇီုကပိုက်ကလိဂွံလဝ်ဝပ်ရောၚ် ညးမၞုံအခေါၚ်ဟီုဂး ဗော်ဍုၚ်မန်တၟိ AD ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုအံက်တဝ်ဗာ ၄ အခိၚ်လဒေါဝ်တ္ၚဲ ၜိုတ် ၂ နာဍဳဂှ် ဒပ်ပံၚ်ကောံ ဂကောံဇြဟတ်ပၠန်ဂတးတံ အာစိုပ်ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မဖျေံလဝ်ဒပ် ပ္ဍဲကွာန်ကအ်ဗိန် နကဵုဇြဟတ် ၂၀ ပြၚ် လ္ပာ်ကုန်(ဘဲစု) ဂှ် နကဵုဒရုၚ်ရ။
အပ္ဍဲပရေၚ်ဗ္တိုက်ဏံ ကောန်ဒပ်ကံၚ်ဇြဳပၞာန်တံ ဇီုကပိုက်ချိုတ်အာလဝ်ဂှ် သ္ပဒတန်ဂွံတီကေတ်လဝ် နူကဵုပရိုၚ်ဗလးတိတံဂှ် ညးမၞုံအခေါၚ်ဟီုဂး ဂကောံဗ္တိုက်သရိုဟ်တၠအဝဵုပၞာန် NMSP AD နာဲဗညာမန် သ္ဂးရ။
ဒပ်ကံၚ်ဇြဳပၞာန် ကြဴနူဒးဒုၚ်ဗ္တိုက်ကဵုဒရုၚ်တုဲ နူကဵုက္ၜၚ်ပၞာန်ဖျေံလဝ် ပ္ဍဲၜဳဂြာၚ်ဂှ် ပန်ပှော်နၚ်လွဟ်ဇၞော်ကြာန်န် ဟွံအောန်နူကဵု ထပှ်မတုဲ မၞိဟ်ဇီုကပိုက်ကလိဂွံဝပ်တံ ဟွံမွဲပုဟ်ဂှ် ဂွံတီကေတ် နူကဵုညးဒေသတံရ။
ဒေသၜဳဂြာၚ် ပယျဵုမန်ကဵု ကရေၚ် ပရေၚ်ပၞာန်ၜါလ္ပာ် မကလေၚ်ကြံၚ်မ္ၚိုဟ်ဒၟံၚ်ဂှ် ကံၚ်ဇြဳပၞာန်ဝွံ အကြာဏံ ပန်ပှော်ဒၟံၚ်လွဟ်ဇၞော် အခိၚ်ဗ္တံတံ ကၠောန်ၜိုတ်ဒၟံၚ်ရ။
တုဲကၠုၚ် ပ္ဍဲဂိတုသေပ်တေမ်ဗာ ၃၀ တေံဂှ်လေဝ် ဟိုတ်နူကံၚ်ဇြဳပၞာန် ပန်ပှော်လွဟ်ဇၞော် ပ္ဍဲကွာန်ခအံၚ်ကြေဟ် ဂကောံကွာန်ကအ်ဗိန်ဂှ်တုဲ မၞိဟ်ဗြဴမွဲတၠ ကလိဂွံလဝ်ဝပ်တုဲ သ္ၚိဒၟံၚ်လ္ၚဵု လီုလာ်အာလဝ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media