မတ်မလီု၊ အံက်တဝ်ဗာ
တွဵုရးဍုၚ်မန် ပ္ဍဲဍုၚ်မတ်မလီု သွက်ကံက်စရၚ်လၟိဟ်မၞိဟ်သ္ဂာဗ္တံ ကံၚ်ဇြဳပၞာန်ဂှ် ဂကောံအုပ်ဓုပ်ကွာန်အရာပ်မဆေၚ်စပ်တံ အာတ်မိက်ဒၟံၚ်လှုဲ သွက်ခရိတ်ဍာ်လက်ဖက်နွံဒၟံၚ်ဂှ် ညးလ္တူဍုၚ်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
စနူဂိတုအံက်တဝ်ဗာ ၁ တုဲ ဒပ်ပံၚ်ကောံကံၚ်ဇြဳပၞာန်တံ ဗက်ကံက်ဒၟံၚ် စရၚ်လၟိဟ်မၞိဟ်သ္ဂာဗ္တံ သၞာံ ၂၀၂၄ အရာပ်လ္တူဍုၚ်တံကဵု ပ္ဍဲကဵုကွာန်ရးတံ နကဵုဂီုကၠီုပေၚ်ၚ်ရ။
ပ္ဍဲအရာကံက်စရၚ်လၟိဟ်မၞိဟ်သ္ဂာဗ္တံ သာ်ဏံဂှ် ဂကောံအုပ်ဓုပ်မဆေၚ်စပ်တံ သွက်ခရိတ်ဗ္စဖျုၚ်ကၟုဲ ဂကောံကံက်စရၚ်တံဂှ်ဂးတုဲ အာတ်မိက်ဒၟံၚ်သြန် ပ္ဍဲကဵုသ္ၚိဒၟံၚ်တံ ၜိုတ်စေတနာနွံရ။
“ အာတ်ဂှ်တှ်ေ အ္စာ၊ အ္စာၝောံ ကံက်ဒၟံၚ်စရၚ်တံ ဟွံသေၚ်ပုဟ်။ ဒှ်က္ဍိုပ်သ္ၚိကၠံ၊ က္ဍိုပ်သ္ၚိစှ်တံရ။ ညးတံဂှ်တှ်ေ အ္စာ၊ အ္စာၝောံတံ ဂကောံဂီုကၠီုတံ တ္ၚဲကာတ်ဗြဲဂူ လုပ်မွဲသ္ၚိတိတ်မွဲသ္ၚိ ဒးကံက်ဒၟံၚ်စရၚ်ဂးတုဲ သွက်ဂွံဖျုၚ်ဍာ်လက်ဖက်ကုညးတံဂးတုဲ ထ္ၜးဟိုတ်ရ။ ၜိုတ်လဵုမှလေဝ် ဟွံသေၚ်ပုဟ်။ ၜိုတ်စေတနာနွံဂးတုဲ အာတ်ဒၟံၚ်ရ” သာ်ဝွံ ညးဒေသလ္တူဍုၚ်မတ်မလီုမွဲတၠ ဟီုရ။
ထ္ၜးဟိုတ်ကဵု ကံက်စရၚ်လၟိဟ်မၞိဟ်သ္ဂာဗ္တံဂှ်တုဲ အာတ်မိက်ဒၟံၚ်သြန် ၜိုတ်စေတနာတံကီုလေဝ် ဗွဲတွဵုမအောန် အကြာ ၅၀၀၀ ဒ္ကေဝ်ကဵု ၁၀၀၀၀ ဒ္ကေဝ် ဒးကဵုဒၟံၚ်ရောၚ် ဂွံတီကေတ် အတိုၚ်ဂလာန် ညးဒေသတံရ။
အတိုၚ်ဂလာန် ညးဒေသမွဲတၠပၠန်ဂှ်မ္ဂး ပ္ဍဲအရာအာတ်သြန် သွက်ရဲကံက်စရင်လၟိဟ်မၞိဟ်တံဂှ် အာတ်ဒၟံၚ်စၟအ်သ္ၚိဟွံသေၚ်ကီုလေဝ် သ္ၚိလှုဲမာန်တံဂှ်တှ်ေ အာတ်ဒၟံၚ်ဗွဲမဂၠိုၚ်ရ။
ပ္ဍဲတွဵုရးဍုၚ်မန်ဂှ်တှ်ေ ပ္ဍဲဍုၚ်မတ်မလီုကီု ပ္ဍဲကဵုပွိုၚ်ဍုၚ်တၞဟ်ဟ်တံကီုဂှ် သွက်ဒၞါဲကံက် ၃၆၀၀ ပြၚ်ဂှ် ရပ်စပ်အာဇြဟတ်မၞိဟ် ၁၂၀၀ ပြၚ်တုဲ ဗက်ကံက်ဒၟံၚ် စရၚ်လၟိဟ်မၞိဟ်ရ။
ပရေၚ်ကံက်စရၚ်လၟိဟ်မၞိဟ်ကံၚ်ဇြဳပၞာန်ဂှ် နကဵုညးဍုၚ်ကွာန်တံ လ္ပပံၚ်တောဲအိုတ်ဂှ်ကီု၊ ၜိုတ်လ္ပာ်သ္ပမာန် ညံၚ်ဂွံဘိုၚ်ဒစဵုဒစးအိုတ်ဂှ် ဂကောံဇြဟတ်ပၠန်ဂတး ဖျေံသ္ဇိုၚ်တွဵုရးဍုၚ်မန်တံ ဖ္တိုက်ဖ္အောဝ်လဝ်ရ။
ကံၚ်ဇြဳပၞာန်ဝွံ စနူဂိတုအံက်တဝ်ဗာ ၁ စဵုကဵု ၁၅ ဂှ် ကံက်အာ စရၚ်လၟိဟ်မၞိဟ်သ္ဂာဗ္တံဏောၚ်တုဲ ဂိတုဒဳဇြေမ်ဗာအိုတ်ဏံ လလောၚ်ပ္တိတ်အာ စရၚ်လၟိဟ်မၞိဟ်ဏောၚ် လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI