လာယှိုဝ်၊ အံက်တဝ်ဗာ ၆
အလဵုအသဳကြုက် မလလောၚ်တြးလဝ် ဒဒှ်ရဒစဵုဒစး ပွမလုပ်စိုပ်ပထုဲပလာပ် ပ္ဍဲပရေၚ်ဍုၚ်ဗၟာဂှ်ဝွံ NUG ဟွံသေၚ်မ္ဂး ဗော် NLD တံ ထ္ပက်အဇာဒပ်ပၞာန် ဟွံဂွံပုဟ်ဂးတုဲ လက္ကရဴဏံ ကဵုဒၟံၚ်ဇြဟတ်ဂရိုဟ် ဟီုဂးဒၟံၚ်ရ။
ပ္ဍဲကၞောတ်ဂိတုအဝ်ဂါတ်တေံ ပ္ဍဲဍုၚ်ကြုက် တွဵုရးယူနာန်ဂှ် ဝန်ဇၞော်ကာဍုၚ်သ္အာၚ်ကြုက် ညးစၞးတၟေၚ်ကေၚ်ကာအာယှ မေဿတာ တုက်ယှဳကျွေန်ဂှ် ဆဵုဂဗသဳကၠဳလဝ်ကဵု ကုက္ဍိုပ်သ္ကိုပ်ဂကောံ “ဝ” UWSA ရ။
အပ္ဍဲပရေၚ်ဆဵုဂဗဏံ ပ္ဍဲကဵုအလဵုအသဳကြုက် ကၟာတ်လဒဵုအာ MNDAA ကဵု ဒေသကဝ်ကဂှ် ဂကောံ “ဝ” သွက်ဂွံပံၚ်တောဲကဵုပေၚ်ၚ်ဂှ် ကဵုလဝ်ဇြဟတ်ဂရိုဟ်သၟးဟွံက ဒပ်ပၞာန်ဗၟာ သရိုဟ်စှ်ေအာဂှ် ဒဒှ်ရကြုက်ဟွံမွဲပၟိက် စပ်ကဵုဟီုဂးလဝ်ဂှ်တုဲ ဌာန်ပရိုၚ် Myanmar Now ဂွံစၟတ်သမ္တီကောံဓရီုတုဲ ပ္ဍဲဂိတုအံက်တဝ်ဗာ ၄ တေံ ထ္မံက်ထ္ၜးလဝ်ရ။
အတိုၚ်တၚ်ထ္မံက်ထ္ၜးလဝ်ဂှ်မ္ဂး NUG ဟွံသေၚ်မ္ဂး ဗော် NLD ဒဝ်အံၚ်သာန်သုကျဳတံ ဒဒှ်ရထ္ပက်အဇာ ဒပ်ပၞာန်ဟွံဂွံဂှ်ကီု၊ ဒပ်ပၞာန်သရိုဟ်စှ်ေအာတုဲ NUG ကေုာံ ဂကောံ PDF မစုက်လုက်ကဵု ဍုၚ်ပလိုတ်တံ ဂွံဇၞးအာဂှ် ကြုက် ဒုၚ်အာတဲဟွံသေၚ်ဂှ်ကီု၊ ညးစၞးကြုက် ဟီုလဝ်ကဵု က္ဍိုပ်သ္ကိုပ် “ဝ” တံရ။
ဥူတာန်သဵုနာၚ် ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်ဂှ် နကဵုဍုၚ်ကြုက် ညံၚ်ဒပ်ပၞာန်ဂွံဆက်တန်တဴအာဂှ်ဝွံ သွက်ဂွံထ္မံက်ရုပ်ရဴ ပရေၚ်ပိုန်ဒြပ်ညးတံ ပ္ဍဲကဵုဍုၚ်ဗၟာဂှ် ဒှ်အကာဲအရာပၟိက်ဇၞော်ဂှ်ရ ဟီုဒၟံၚ်သာ်ဏံရောၚ်ဂှ် သ္ၚဳဂၠိပ်ကေတ်ရ။
“ တက်ကျာကဵု က္ဍိုပ်သ္ကိုပ်ပၞာန်တံတှ်ေ မဍေံတံ (ကြုက်) နွံပၟိက်ဂှ် ဂွံမံၚ်။ မနွံပၟိက်ဂှ် ကဵုဒၟံၚ်။ ကဵုအလဵုအသဳအရာပ် ညံၚ်ဒဝ်အံၚ်သာန်သုကျဳတံဂှ်တှ်ေ နကဵုညးတံ ဒးဟီုဂးကျာတ်ဏောၚ်။ ဒးဂဗအကြေပ်အဂြတ်တံရ။ အေ ဂှ်တှ်ေ ၜိုတ်သ္ပမာန်ဂှ် ညးတံ မိက်ဂွံဆက်ဆောံ ကဵုဒပ်ပၞာန်ရဏောၚ်။ ဟိုတ်ဂှ်ရ ဒပ်ပၞာန်ဆက်ဂွံတန်တဴအာဂှ်ဝွံ သွက်ဂွံထ္မံက်အာရုပ်ရဴ ဒတုဲဖဵုပရေၚ်ပိုန်ဒြပ်ညးတံ ပ္ဍဲကဵုဍုၚ်ဗၟာဂှ် ဒှ်ဒၟံၚ်အကာဲအရာပၟိက်ဇၞော်ဒၟံၚ်ဏောၚ်။ ဟိုတ်ဂှ်ရ စဵုဒၞါကဵုဒပ်ပၞာန်တုဲ ဒပ်ပၞာန်ဟွံမွဲမ္ဂး ကၟိန်ဍုၚ် ရုသံၚ်အာဏောၚ်။ ညံၚ်ဒပ်ပၞာန်ဂွံနွံ ဒးကၠောန်ဏောၚ်။ ဒပ်ပၞာန်ဂှ် ထ္ပက်အာအဇာ ကု NLD ဟွံဂွံပုဟ်ဟီုဂှ် ညးတံ ဟီုဒၟံၚ်ရ” သာ်ဝွံ သ္ဂးရ။
ဂကောံ MNDAA ဂှ်လေဝ် ကၟာတ်လဒဵုကေတ်လဝ်အရေဝ် နကဵုထပိုတ် ၅ ထပိုတ်ဂှ်တုဲ ဟွံဆုတ်အာနူ ဍုၚ်လာယှိုဝ်မ္ဂး ရုပ်သီကဵုအာဟွံသေၚ်တုဲ ပရေၚ်ကေတ်အရေဝ် သ္ကာတ်မြဟ်တံဂှ်လေဝ် ကၠောန်ၜိုတ်အာဏောၚ်ဂှ် ကြုက် ဟီုလဝ်ကဵု က္ဍိုပ်သ္ကိုပ် “ဝ” တံရ။
နကဵုဂကောံကဝ်က MNDAA ပရေင်ပၞာန်၊ ပရေၚ်ဍုၚ်ကွာန်တံဂှ် ပံင်တောဲအာကဵု NUG ဟွံသေၚ်တုဲ ဒေါအ်ပန်ပှော်တုဲ ဆဵုဂဗသဳကၠဳအာ နကဵုဂၠံၚ်တရဴပရေၚ်ဍုၚ်ကွာန်တံဏောၚ်ဂးတုဲ ပ္ဍဲဂိတုသေပ်တေမ်ဗာ တုဲကၠုၚ်တေံ လလောၚ်တြးလဝ် တၚ်ဒတူလိုၚ်ပရေၚ်ဍုၚ်ကွာန်ရ။
အတိုၚ်တၚ်လလောၚ်တြးဂှ်မ္ဂး ကုဂကောံဗွိုၚ်ဍုၚ်သ္အာၚ် ဒစဵုဒစးကဵု ကြုက် ဟွံသေၚ်မ္ဂး ဍုၚ်ဗၟာတံဂှ် ဟွံပံၚ်တောဲ ဟွံဆက်ဆောံ ဟွံဒက်မဟာမိတ်ဂှ်တှ်ေ ဒှ် Redline ပရေၚ်ဍုၚ်ကွာန် MNDAA ဏောင်ဂှ် ကဵုလဝ်သမ္တီရ။
ဣဏံဝွံ ဟိုတ်နူကြုက်ကဵုဇြဟတ်ဂရိုဟ်ရောၚ် ညးခါတ်အကာဲပရေၚ်ဍုၚ်ကွာန်တံ သ္ၚဳဂၠိပ်ဟီုဂးဒၟံၚ်တုဲ ဗွဲကြဴဏံ စၟတ်သမ္တီကောံဓရီု သဳကၠဳဆဵုဂဗလဝ် အကြာကြုက်ကဵု က္ဍိုပ်သ္ကိုပ် “ဝ” တံ မံက်တိတ်ကၠုၚ်လဝ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် ကြုက်ဝွံ ဍုၚ်ပလိုတ်တံ လုပ်စိုပ်ပထုဲပလာပ်ဂှ် ဟွံဒးဂၞပ်တုဲ NUG မစုက်လုက်ကဵု အမေရိကာန်ဂှ်လေဝ် သ္ပစၟတ်သမ္တီ ဆက်ဆောံလေဝ် ဟွံမွဲတုဲ နူလ္ပာ်ဂကောံကောဒေံမဟာမိတ်ပိဂကောံတံ ကဵုကၠုၚ်လဝ်ဇြဟတ်ဂရိုဟ်ရောၚ် သ္ၚဳဂၠိပ်လဝ်ရ။
“ ကြုက်ဂှ်တှ်ေ ဍုၚ်ပလိုတ်တံ လုပ်စိုပ်ပထုဲဂှ် ဟွံဒးစိုတ်ပုဟ်။ ကု NUG စုက်ဒၟံၚ်ကဵု အမေရိကာန်တံဂှ်လေဝ် သ္ပစၟတ်သမ္တီဆက်ဆောံလဝ်လေဝ် ဟွံမွဲပုဟ်။ ဟိုတ်ဂှ်ရ နူကဵုဂကောံကောဒေံပိဂကောံတံ ကဵုကၠုၚ်လဝ်ဇြဟတ်ဂရိုဟ်ရ။ လၟုဟ်တှ်ေ ပြာကတ်ကၠုၚ်ရ။ ကြုက်ဂှ်တှ်ေ ဒပ်ပၞာန်မွဲရ မိက်ဂွံစွံဒၞါဲဏံ နကဵုသဘဴဏံ ဟီုကဵုမံက်က်ထေၚ်ၚ်တုဲ ကိစ္စဏံဂှ်တှ်ေ ဒှ်အကာဲအရာဒုၚ်တဲဟွံဂွံတုဲ ဂေတ်မံင်သံသာ နကဵုပေါဲဗ္တိုက်တံဏီဏောၚ်ဂှ် အဲချိၚ်ခယျကေတ်ရ” သာ်ဝွံ သ္ဂးရ။
ဂကောံမဟာမိတ်ကောဒေံ MNDAA, TNLA ကေုာံ AA တံဝွံ ကရောံဂကောံပၠန်ဂတးတၞဟ်သ္အာၚ်တံဂှ် သၞာံတုဲကၠုၚ် ပ္ဍဲဂိတုအံက်တဝ်ဗာကြပ်အိုတ်တေံဂှ် လလောၚ်တြးလဝ်ပၞာန် ကုကံၚ်ဇြဳပၞာန် နကဵုယၟုပရေၚ်ပၞာန် ၁၀၂၇ ရ။
ဟိုတ်နူပရေၚ်ပၞာန်ဏံတုဲ ပ္ဍဲရးသေံသ္ကုတ်သၟဝ်ကျာဂှ် ကံၚ်ဇြဳပၞာန် ဒးဆေၚ်လဝ်မုက် ကုပရေၚ်ကျဗြံတုဲ ကြုက်လုပ်အကြာပ္ညဳပ္ညပ်ကဵုတုဲ အကြာၜါဂကောံတံဂှ် ကလိဂွံလဝ်တၚ်တုပ်စိုတ်ဟိုၚ်ဂေန်တုဲ ဒေါအ်လဝ်ပန်ပှော် ပွိုၚ် ၅ ဂိတုရ။
ဆ္ဂး ပရေၚ်ပၞာန် ၁၀၂၇ သ္ကုတ်ဒုတိယ ကလေၚ်စလဝ် ကၞောတ်ဂိတုဂျောန်ဂှ် ဒးဗလးလဝ်တဲ ဌာန်ဂအုပ်ပၞာန်ရးဨသာန် ဖျေံသ္ဇိုၚ်လာယှိုဝ်တုဲ ဂကောံကဝ်က MNDAA သီုကဵုသီဂွံလဝ်ဍုၚ်ဂှ်ရ။
ဟိုတ်နူအကာဲအရာတံဏံတုဲ ညံၚ်ဟွံဂွံသွံကဵုလွဟ်လက်နက် ကုဂကောံဒပ်မဟာမိတ် MNDAA, PDF, ကရေၚ်ဍာဲတံ သီုကဵုဂကောံရပ်လွဟ်သ္ကုတ်သၠုၚ်ကျာတံဂှ် ကြုက်ကဵုလဝ်ဇြဟတ်ဂရိုဟ် တာဒၞါလဝ် ဂကောံ “ဝ” ရ။
ကုဂကောံရပ်လွဟ်ပၠန်ဂတးဒၟံၚ် သၞောတ်တၠအဝဵုပၞာန်တံဂှ် ညံၚ်ဂကောံ “ဝ” ဟွံဂွံထံက်ပၚ် ကြုက်ကဵုဒၟံၚ်ဇြဟတ်ဂရိုဟ်ဂှ်ဝွံ ဒှ်သဘဴဒတူလိုၚ်ဒၟံၚ် လ္ပာ်ကံၚ်ဇြဳပၞာန်ရောၚ်ဂးတုဲ ပါ်ပါဲဒၟံၚ်တံလေဝ် နွံဒၟံၚ်ရ။
ဒံက်တာလှကျဝ်ဇြဝ် ညးစိုန်သ္ကီုပရေၚ်ကြုက်ဂှ်ဝွံ နကဵုကြုက် ဆက်ဆောံကဵု အလဵုအသဳဂှ်ဝွံ ဒှ်သဘဴထံက်ဂလာန်ကဵု အလဵုအသဳဂှ်ရောၚ် ဟီုဟွံဂွံတုဲ ညံၚ်ပရေၚ်ဆက်ဆောံဂွံခိုဟ် ကၠောန်ဒၟံၚ်ရောၚ် ဟီုရ။
“ လ္ပာ်ကြုက်ဂှ်တှ်ေ ၜိုတ်သ္ပမာန် ဆက်ဆောံကဵုအလဵုအသဳဂှ်တှ်ေ ထံက်ဂလာန်ကဵု အလဵုအသဳဂှ်ရောၚ် ဟီုဟွံဂွံပုဟ်။ ညံၚ်ပရေၚ်ဆက်ဆောံဂွံခိုဟ် ညးတံ ဒးဆက်ဆောံဏောၚ်။ သာ်ဏံ နွံရ။ တၚ်နၚ်လ္ၚဵုတံဂှ်တှ်ေ (စၟတ်သမ္တီကောံဓရီု Myanmar Now ကလိဂွံလဝ်) ဂှ်တှ်ေ ဒးတှ်ေဒးဏောၚ်။ တၚ်နၚ်လ္ၚဵုတံဂှ်တှ်ေ ဒးမၚ်ရံၚ်ဏီဏောၚ် ထေၚ်ကေတ်ရ။ အဲ မုမှဟွံမိက်ဟီုဏီပုဟ်” သာ်ဝွံ သ္ဂးရ။
အပ္ဍဲဂိတုအဝ်ဂါတ်တုဲကၠုၚ်တေံ အခိၚ်ဝန်ဇၞော်ကာဍုၚ်သ္အာၚ်ကြုက် ဝါန်ယိ ကၠုၚ်စိုပ်ဆဵုဂဗကဵု က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ကဵု ဥူတာန်ယှိုဲတံဂှ် နကဵုဍုၚ်ကြုက် ထံက်ဂလာန် ကုလၟေၚ်ကမၠောန်ကံၚ်ဇြဳပၞာန် ၅ သာ်ဂှ် ဟီုလဝ်ရ။
မွဲလ္ပာ်ဂှ်ပၠန် ဟိုတ်နူကံၚ်ဇြဳပၞာန် ထောံမခတိုဟ် ဗ္တိုက်လဝ် ဍုၚ်လာယှိုဝ် နကဵုပၞာန်ကျာတုဲ စပ်ကဵုကောန်အရာပ်တံ ဒးဇီုကပိုက်ချိုတ်အာဂှ်တုဲ အလဵုအသဳကြုက် သ္ၚိတ်ဒၟံၚ်တုဲ စၟတ်သမ္တီကောံဓရီု သဳကၠဳလဝ် ကုဂကောံ “ဝ” မံက်အာဂှ်လေဝ် ကလေၚ်ခၠေဝ်ပၠန်လဝ် ဟွံမွဲဏီရ။
ပရိုၚ်−သြၚ်လောန်တိုၚ်(မ်)
ဗီု−Social Media