ဘာပန်၊ အံက်တဝ်ဗာ ၈
ဗ္ဒိုပ်ဒပ်ကံၚ်ဇြဳပၞာန် နွံဒၟံၚ် ပ္ဍဲခရိုၚ်ဘာပန် တွဵုရးကရေၚ်သီုဖအိုတ် ဒပ်ပၠန်ဂတး သၟဝ်သ္ကိုပ်သ္က KNLA တံ ကၟာတ်လဒဵုလဝ်တုဲ ဒပ်ကံၚ်ဇြဳပၞာန်ဝွံ ဒးသ္ပပဓာန်ဒၟံၚ် ကုပၞာန်ကျာသၟးရဂှ် ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလာဒိုဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဗ္ဒိုပ်ဒပ်ကံၚ်ဇြဳပၞာန် ဗျူဟာဘာပန်၊ ဌာန်ဂအုပ်တမ်ဒပ် ကေုာံ ဗ္ဒိုပ်ဒပ်ခဝ်ပုတ်၊ ဖာဝဝ်လိုဝ်၊ ထဳမူခဳ၊ သဝ်မူပလဝ် တံဂှ် ဂၠံၚ်လုပ်ဂၠံၚ်တိတ်သီုဖအိုတ် ဂကောံဒပ်ပံၚ်ကောံပၠန်ဂတး ဒပ်မဟာ ၅ ဒပ်ပၞာန်ဗၠးၜးကောန်ဂကူကရေၚ် KNLA တံ ကၟာတ်လဒဵုထပိုတ်လဝ်ရ။
ဟိုတ်နူဂကောံဒပ်ပံၚ်ကောံ ဒပ်မဟာ ၅ KNLA တံ ကၟာတ်လဒဵုထပိုတ်ဗ္တိုက်လဝ်ဂှ်တုဲ ဇွောံမ ကေုာံ လွဟ်လက်နက်မကမ် ဗ္ဒိုပ်ဒပ်ကံၚ်ဇြဳပၞာန် အပ္ဍဲခရိုၚ်ဘာပန်တံဂှ် ဒပ်ကံၚ်ဇြဳပၞာန် ပလံၚ်နူကဵုဗလးတိဏံ ဟွံဂွံရတုဲ နူကဵုပၞာန်ကျာမွဲကဆံၚ်ရ ကၠုၚ်စိုပ်ပလံၚ်ဂွံဂှ် သ္ကိုပ်ဗိုလ်ဇၞော်သဝ်ကလာဒိုဝ် ဟီုရ။
ပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ် အပ္ဍဲဂိတုသေပ်တေမ်ဗာ သတ္တာဟတတိယတုဲကၠုၚ်တေံ နူကဵုဒေသ ကမမံၚ်၊ ကတိုၚ်တိတံမွဲကဆံၚ် ဒပ်ကံၚ်ဇြဳပၞာန် ဒပ်ပံၚ်ကောံ BGF တံ ကၠုၚ်စိုပ်ထ္ပက်ကၠုၚ်ကရောၚ်ပၞာန်ဗလးတိ လ္ပာ်ဗ္ဒိုပ်ဒပ် ဒဵုပိမတံဂှ် ဒပ်မဟာ ၅ KNLA ဗ္တိုက်လဝ်တုဲ လ္ပာ်ကံၚ်ဇြဳပၞာန် ဒးဂိလဝ်တုဲ ကလေၚ်ဆုတ်အာလဝ်ရ။
ဒပ်ကံၚ်ဇြဳပၞာန် ဒးဂိအာလဝ် အပ္ဍဲပေါဲဗ္တိုက်ဒေသကတိုၚ်တိဂှ် ကလေၚ်ပန်ပှော်လဝ် နကဵုလွဟ်ဇၞော် အပ္ဍဲကွာန်တံဂှ်တုဲ ညးဒေသတံ ဒးဂြိပ်ဒဴပါဲဒလေတ်လဝ် လ္ပာ်ဍုၚ်ကမမံၚ်ရ။
သ္အာၚ်နူဂှ်ပၠန် တုဲကၠုၚ်ပ္ဍဲဂိတုသေပ်တေမ်ဗာ ၃၀ တေံ ပ္ဍဲကဵုဒေသလာဝါထာ အကြာပယျဵု ဒပ်မဟာ ၃ ကဵု ဒပ်မဟာ ၅ KNLA သ္ကုတ်သၟဝ်ကျာဍုၚ်ဘာပန်ဂှ် ကရောၚ်ပၞာန်ဒပ်ကံၚ်ဇြဳပၞာန် ပြံၚ်ဒပ်ကလေၚ်ဆုဲပြံၚ်ဂှ် ဒပ်မဟာ ၅ KNLA တံ ပန်ပှော်ဗ္တိုက်လဝ်တုဲ အလုံကရောၚ်ပၞာန် ဒပ်ကံၚ်ဇြဳပၞာန်မွဲ ဗ္တိုက်သရိုဟ်မာန်လဝ်ရောၚ် သ္ကိုပ်ဗိုလ်ဇၞော် သဝ်ကလာဒိုဝ် သ္ဂးရ။
ကရောၚ်ပၞာန်ဏံဝွံ နူဗ္ဒိုပ်ဒပ်ဖာဝဝ်လိုဝ်ဂှ် ဒှ်ကရောၚ်ပၞာန် ကလေၚ်ပြံၚ်အာဒပ် လ္ပာ်ဗဝ်သေဝ်ခိုဝ်ဂှ်တုဲ သီုကဵုသ္ကိုပ်တမ်ဒပ်၊ သ္ကိုပ်ဒပ်စြေက်တံ မပါလုပ် အပံၚ်မၞိဟ် ၃၀ တၠ ချိုတ်အာလဝ်တုဲ သီဂွံလဝ် လွဟ်ဇၞော်၊ လွဟ်ဍောတ် ကေုာံ ကပေါတ်အရပ်စပ်ပၞာန်တံရောၚ် ဒပ်မဟာ ၅ လလောၚ်ပ္တိတ်လဝ်ရ။
ပ္ဍဲတိဍာ်ဒပ်မဟာ ၅ ခရိုၚ်ဘာပန်ဂှ် အပ္ဍဲဂိတုသေပ်တေမ်ဗာ ပွိုၚ်မွဲဂိတုတုဲကၠုၚ်တေံ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ ဒပ်မဟာ ၅ KNLA တံ ပေါဲဗ္တိုက်အပံၚ် ၁၄၀ ပြၚ် က္တဵုဒှ်လဝ်တုဲ လ္ပာ်ကံၚ်ဇြဳပၞာန် ၇၀ ပြၚ် ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ရုၚ်ဂအုပ် ဒပ်မဟာ ၅ KNLA တံရ။
ပရိုၚ်−သြၚ်လောန်တိုၚ်(မ်)
ဗီု−KNU