လံၚ်လုၚ်၊ အံက်တဝ်ဗာ ၈
ပွိုၚ်ဍုၚ်လံၚ်လုၚ် ရးတၞၚ်သဳ ဂကောံကွာန်ဍာ်ဗု ပ္ဍဲကဵုလၟေၚ်ကမၠောန်ကံက်ကပှ်စရၚ်လၟိဟ်မၞိဟ်ဂှ် အ္စာၝောံပါလုပ်ရေၚ်တၠုၚ်ဒၟံၚ် ဒ္စါံတၠကဵု တခဳမွဲတၠ ရပ်ဂွံလဝ်ရောၚ် ဂွံတီကေတ် ဇရေၚ်ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်တံရ။
အ္စာၝောံမွဲတၠ နူဍုၚ်လံၚ်လုၚ် အာဍုၚ်ထဝါဲ သွက်ဂွံကံက်စရၚ်လၟိဟ်မၞိဟ်ဂှ် ပ္ဍဲဂိတုအံက်တဝ်ဗာ ၆ အခိၚ်နူဂယးဂှ် စရပ်ဒက်လဝ် ပ္ဍဲသ္ကုတ်ဂၠံၚ်လံၚ်လုၚ်−ထဝါဲရ။
ပ္ဍဲကဵုတ္ၚဲဂှ် အခိၚ်ဇိုၚ်သဝ်တ္ၚဲဂှ်လေဝ် အ္စာၝောံထပှ်တၠ ကံက်စရၚ်လၟိဟ်မၞိဟ်တုဲ ကလေၚ်စဴကၠုၚ်ဂှ်ကဵု တခဳရုၚ်မွဲတၠတံဂှ် လုပ်စိုပ်ရပ်ဒက်လဝ် ပ္ဍဲကဵုသ္ၚိဒၟံၚ် မၞုံပ္ဍဲဂကောံကွာန်ဍာ်ဗုဂှ်ရ။
ညးကံက်စရၚ်လၟိဟ်မၞိဟ် ရပ်ဂွံလဝ်တံဂှ် စၟဳတ်ဒၟံၚ်တံ ကၠောန်သ္ပဒၟံၚ်တုဲ ယဝ်ရစၟဳတ်တုဲမ္ဂး လှဲပြံၚ်ကဵုအာ ဇရေၚ်ဂကောံအုပ်ဓုပ်ညးဍုၚ်ကွာန် ပွိုၚ်ဍုၚ်လံၚ်လုၚ်တံဏောၚ် ညးဒုၚ်တာလျိုၚ်လလောၚ်ပရိုၚ် ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲကဵုကံက်စရၚ်လၟိဟ်မၞိဟ် ပ္ဍဲကဵုဂကောံကွာန်ဍာ်ဗု ပွိုၚ်ဍုၚ်လံၚ်လုၚ်ဂှ် အ္စာၝောံနူဂကောံကွာန်ဏံဂမၠိုၚ် အ္စာၝောံ ဒဝ်မေမဳမိုဝ်၊ ဒဝ်ဥမ္ပာထောန်၊ ဒဝ်ခေန်အေသက်၊ ဒဝ်ယျေန်န်သဵု၊ ဒဝ်မျအေ၊ အ္စာၝောံဂအုပ်ဘာ ဒဝ်ဖျူဖျူထိုဲ ကေုာံ တခဳ နူရုၚ်သ္ကိုပ်အုပ်ဓုပ် ဂကောံကွာန်ဍာ်ဗု ဒဝ်သဳတာ ၇ တၠတံ ဒးဒုၚ်ရပ်လဝ်ရောၚ် ကံၚ်ဇြဳပၞာန် လလောၚ်ပ္တိတ်လဝ် ပ္ဍဲဂိတုအံက်တဝ်ဗာ ၇ တေံရ။
စပ်ကဵုရပ်ဒက် ရဲကံက်စရၚ်လၟိဟ်မၞိဟ်တံဂှ်တုဲ အလုံညးဍုၚ်ကွာန်မွဲ သွက်ဂွံဒစဵုဒစးအိုတ်ဂှ်ကီု၊ နကဵုဂကောံဒပ်ဂီုကၠီုတံ သွက်ဂွံသၠုၚ်ပ္တိုန်ဂီုကၠီု မနွံပၟိက်တံဂှ် ကံၚ်ဇြဳပၞာန် ဖ္တိုက်ဖ္အောဝ်လဝ်ရ။
အပ္ဍဲခရိုၚ်ထဝါဲ ပ္ဍဲကဵုပိပွိုၚ်ဍုၚ်ဂှ် စနူဂိတုအံက်တဝ်ဗာ ၁ တုဲ ရေၚ်တၠုၚ်ဒၟံၚ် ကမၠောန်ကံက်စရၚ်လၟိဟ်မၞိဟ်တံဂှ်တုဲ ပ္ဍဲပွိုၚ်ဍုၚ်လံၚ်လုၚ်ဂှ်တှ်ေ ဒဵုကဵုအခိၚ်လၟုဟ် ကံက်ဒၟံၚ်စရၚ်လၟိဟ်မၞိဟ်တံ ဟွံမွဲဏီပုဟ်ဂှ် ဂွံတီကေတ်ရ။
ဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်ဂှ်တှ်ေ ညးမဆက်စပ်ပါလုပ်ဒၟံၚ် ပ္ဍဲအရာကံက်စရၚ်လၟိဟ်မၞိဟ် ကံၚ်ဇြဳပၞာန်တံဂှ် ကေတ်အာအရေဝ် ပိုတ်တ်သ္ကုတ်တ်ဏောၚ် လလောၚ်ပ္တိတ်လဝ် လိက်ကဵုသတိတံတုဲ နကဵုညးဍုၚ်ကွာန်တံ လ္ပပံၚ်တောဲအိုတ်ညိဂှ် ဖ္တိုက်ဖ္အောဝ်လဝ်ရ။
တုဲကၠုၚ် ပ္ဍဲဂိတုအံက်တဝ်ဗာ ၄ တေံဂှ်လေဝ် ဥူကာန်လျာန်ထာန် ရီုဗၚ်ရေၚ်တၠုၚ်ကဵုဒၟံၚ် ပ္ဍဲကမၠောန်ကံက်စရၚ်လၟိဟ်မၞိဟ် ဍုၚ်တဳတုၚ် တွဵုရးချေၚ်ဂှ်လေဝ် ဒးဒုၚ်ရပ်လဝ် ပ္ဍဲသ္ၚိရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−LLPDF