မတ်မလီု၊ အံက်တဝ်ဗာ ၁၀
ပ္ဍဲတွဵုရးဍုၚ်မန် တုဲကၠုၚ်အပ္ဍဲဂိတုသေပ်တေမ်ဗာတေံ ကောန်အရာပ် ၁၇ တၠ ဒးဒုၚ်ဂစိုတ်လဝ်တုဲ ၂၁ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်လိက်ဒုၚ်စဳရေၚ် လိက်လၟေၚ်လ္ဂန်အိန်ရ။
အတိုၚ်လိက်ဒုၚ်စဳရေၚ် ပရေၚ်ဒးဒုၚ်ဖံက်ပ္ကဝ်အခေါၚ်အရာမၞိဟ် ပ္ဍဲဒေသမန် နူလိက်လၟေၚ်လ္ဂန်အိန် မလလောၚ်ပ္တိတ်လဝ် ပ္ဍဲဂိတုအံက်တဝ်ဗာ ၉ ဂှ်မ္ဂး ညးဇီုကပိုက်ချိုတ်အာတံဝွံ ဒၟါနူကံၚ်ဇြဳပၞာန် ပန်ပှော်လွဟ်ဇၞော်ကြာန်န်၊ လိုန်ဒးမာၚ်တိုပ်တိ၊ ဒးဒုၚ်ကၠတ်ဂစိုတ်တံ ပါလုပ်ရ။
အတိုၚ်ဒးဒုၚ်ပြိုက်ဂစိုတ်ဂှ်မ္ဂး ပ္ဍဲပွိုၚ်ဍုၚ်ရေဝ်၊ ပွိုၚ်ဍုၚ်မုဟ်ဍုၚ် ကေုာံ ပွိုၚ်ဍုၚ်သဓီုတံဂှ် မွဲပွိုၚ်ဍုၚ် ပန်တၠ၊ ပ္ဍဲပွိုၚ်ဍုၚ်ကျာ်ထဝ်တံဂှ် ပိတၠ၊ ပ္ဍဲပွိုၚ်ဍုၚ်ပံၚ်ကဵု ပွိုၚ်ဍုၚ်ၜါသွာၚ်တံဂှ် မွဲတၠစၟအ်အ် အပံၚ်ဖအိုတ် ၁၇ တၠ ပါလုပ်ရ။
ကောန်အရာပ် ဒးဒုၚ်ဂစိုတ်ဂှ်ဝွံ ၜတ်ကၞာတ်ကဵုဂိတုအဝ်ဂါတ်တေံမ္ဂး လၟိဟ်ထပ်ဂၠိုၚ်တိုန်ကၠုၚ်တုဲ ဂိတုအဝ်ဂါတ်တေံဂှ် ကောန်အရာပ် ၁၂ တၠ ဒးဒုၚ်ဂစိုတ်လဝ်ရောၚ် ဂွံတီကေတ် အတိုၚ်တၚ်နၚ်လိက်ဒုၚ်စဳရေၚ်ဂှ်ရ။
မၞိဟ်ဇီုကပိုက်ကလိဂွံဝပ် ၂၁ တၠဝွံ ဟိုတ်နူကံၚ်ဇြဳပၞာန် ပန်ပှော်လွဟ်ဇၞော်ကဵု ဒၟါနူမာၚ်တိုပ်တိတံ မဒှ်တုဲ ပ္ဍဲကဵုဏံ ညးဗြဴဒ္စိတ်တၠကဵု ကောန်ၚာ်သၟတ်မွဲတၠ ပါလုပ်ရ။
အပ္ဍဲဂိတုသေပ်တေမ်ဗာဂှ် ဟိုတ်နူကံၚ်ဇြဳပၞာန် ထ္ၜးဟိုတ်နာနာသာ် ရပ်ဒက်တုဲ မၞိဟ်ဒးဒုၚ်ရပ် ၄၈ တၠ နွံတုဲ ဗွဲမဂၠိုၚ်ဝွံ သွက်ဂွံလုပ်ပၞာန်တုဲ ဒးဒုၚ်ရပ်လဝ်ရ။
အတိုၚ်လိက်ဒုၚ်စဳရေၚ် လိက်လၟေၚ်လ္ဂန်အိန်ဂှ်မ္ဂး အပ္ဍဲကာလသီအဝဵုဏံ ပ္ဍဲတွဵုရးဍုၚ်မန် မၞိဟ်ဒးဒုၚ်ရပ် နွံကၠုၚ် စဵုကဵု ၁၀၅၅ တၠတုဲ မၞိဟ်ဒးဒုၚ်ဂစိုတ်ဂှ် နွံကၠုၚ်လဝ် စဵုကဵု ၂၀၆ တၠရ။
ပရိုၚ်−သြၚ်လောန်တိုၚ်(မ်)
ဗီု−CJ