ဗဳယာန်ကျေန်၊ အံက်တဝ်ဗာ ၁၀
ပ္ဍဲကဵုကောံဓရီုအာဇြဳယာန်ကဆံၚ်လ္တူ မကၠောန်ဗဒှ်အာ ပ္ဍဲဍုၚ်လာအိုဝ်ဂှ် ပရေၚ်ဒှ်ဓဝိၚ် စပ်ကဵုအကာဲအရာ ပရေၚ်ကြံၚ်မ္ၚိုဟ် အပ္ဍဲၜဳကြုက်သၠုၚ်ကျာ မသၠုၚ်တိုန်ဂှ်ကီု၊ စပ်ကဵုပၞာန်အပ္ဍဲဍုၚ်ဗၟာ မသ္ကာတ်မြဟ်ကၠုၚ်တံဂှ်တုဲ ဂကောံညးစၞးအမေရိကာန် ဝန်ဇၞော်ကာဍုၚ်သ္အာၚ် အာန်တိုဝ်နဳ ဗလေန်ကာန် သ္ကိုပ်သ္ကတုဲ သဳကၠဳအာ ကုက္ဍိုပ်သ္ကိုပ်အာဇြဳယာန်တံဏောၚ် မဒှ်ရ။
ဝန်ဇၞော်ဗလေန်ကာန် တိုန်စိုပ်အာ ကောံဓရီုအာဇြဳယာန် မကၠောန်ဗဒှ်အာ ပ္ဍဲသတ္တာဟဏံဂှ်ဝွံ ကၠာပေါဲရုဲမာဲသမ္မတအမေရိကာန် ဂိတုနဝ်ဝေမ်ဗာတေံ ဟွံဂွံစိုပ်ဏီ ဒတုဲဖဵုပရေၚ်ပိုန်ဒြပ်ဒေသ ဝါယှေန်တာန်တံဂှ် ဒှ်အခေါၚ်အရာ သ္ဂောံရေၚ်တၠုၚ်အလဵုညး လက္ကရဴအိုတ်မွဲရ။
ပ္ဍဲကဵုက္ဍိုပ်သ္ကိုပ်ဂမၠိုၚ် နူကဵုအာဇြဳယာန်ဟွံသေၚ် မတိုန်စိုပ်အာကောံဓရီုဂှ်တှ်ေ သ္ကိုပ်ဝန်ဇၞော်ကြုက် လဳကဳကျာန်၊ သ္ကိုပ်ဝန်ဇၞော်အိန္ဒိယ နာရာန်ဒရာ မိုဝ်ဒဳ ကေုာံ သ္ကိုပ်ဝန်ဇၞော်ဂျပါန်တၟိ ယှဳဂဳရူ အဳယှဳဗာတံ ပါလုပ်ရ။
ပ္ဍဲကဵုၜဳကြုက်သၠုၚ်ကျာဂှ် ဍုၚ်ကြုက်ဝွံ ကဵုဇြဟတ်ဂရိုဟ် ကုကၟိန်ဍုၚ်ဗွဲမဂၠိုၚ် ဗွဲအနိၚ်အပိုၚ်တုဲ ဆက်ကၠောန်ၜိုတ်ဒၟံၚ် ပြဝမသၠုၚ်ပ္တိုန်အသိၚ် ပရေၚ်ကြံၚ်မ္ၚိုဟ် ဟွံမွဲကဵုပွမဒုၚ်လျိုၚ်တံဂှ်ရောၚ် လစှ်ေဝန်ဇၞော် ကေၚ်ကာအာယှဗၟံက် ကေုာံ ကေၚ်ကာပသိဝှေခ် ဒါန်နဳယဴ ခရေတ်တာန်ဗရေတ် ဟီုလဝ် ကၠာလၟေၚ်တရဴဝန်ဇၞော် ဗလေန်ကာန် ဟွံဂွံစိုပ်ဏီဂှ်ရ။
ကိစ္စဏံဝွံ နကဵုဝန်ဇၞော်ဗလေန်ကာန် ပ္ဍဲကဵုပရူပရာ စွံအဓိကတုဲ သ္ဂောံသဳကၠဳအာ ပ္ဍဲကဵုကောံဓရီုအာဇြဳယာန်ဂှ် ပါလုပ်မွဲရောၚ် ညးဟီုရ။
ပ္ဍဲၜဳကြုက်သၠုၚ်ကျာဂှ် ဟိုတ်နူကြုက် တာဒၞါဗ္တိုက်ဒၟံၚ် က္ၜၚ်ဖဳလေတ်ဖေန် ကေုာံ ဗဳယေတ်နာမ်တံဂှ်တုဲ ပရေၚ်ကြံၚ်မ္ၚိုဟ်တံ သၠုၚ်တိုန်ဒၟံၚ်ရ။
သ္ကိုပ်ဝန်ဇၞော်သေံတၟိ ဗဴဓေါန်ဓာန် ယှေန်နာဝါထရာ ကေုာံ သ္ကိုပ်ဝန်ဇၞော်သေန်ကာပေါဝ်တၟိ လဝ်ရေတ်ဝံၚ်တံ ပ္ဍဲကဵုကောံဓရီုအာဇြဳယာန် တိုန်စိုပ်အာ အလန်ပထမကိုပ်ကၠာအိုတ်ဂှ် စပ်ကဵုပဋိပက္ခဍုၚ်ဗၟာတုဲ စွံအဓိက သ္ဂောံသဳကၠဳအာ နွံဒၟံၚ်ရ။
သွက်ဂွံဗလးကဵု ကောန်ထံၚ်ပရေၚ်ဍုၚ်ကွာန်၊ သွက်ဂွံဖအောန်ဖျေံ ပရေၚ်ဗ္တိုက်ပကီုပရာပ်၊ ဂွံကဵုအာဇြဟတ်ဂရိုဟ် ကုကံၚ်ဇြဳပၞာန်ဂှ် အမေရိကာန် စန်ဒက်အာ ဍုၚ်အာဇြဳယာန်တံဏောၚ် ခရေတ်တာန်ဗေတ် ဟီုလဝ်ရ။
ဂွံဂလိုၚ်ပ္တိုန် အရီုဗၚ်ပရေၚ်ဗ္စာရဏာမၞိဟ် ညံၚ်ပေါဲသဳကၠဳ ကုဂကောံဇြဟတ်ပၠန်ဂတးတံ ဂွံဒှ်ကၠုၚ်တံဂှ်လေဝ် ကဵုအာဇြဟတ်ဂရိုဟ်ဏောၚ် ညးထပ်ဟီုဗပေၚ်လဝ်ရ။
ညံၚ်ပဋိပက္ခဍုၚ်ဗၟာ ဂွံတုဲဒှ် အရာမကေတ်အရေဝ်ရေၚ်တၠုၚ် နွံပၟိက်တံဂှ် ဒဒှ်ရကံၚ်ဇြဳပၞာန် မုမှဟွံဂွံကၠောန်လဝ်ဏီဂှ်ကီု၊ ဒဵုကဵုအခိၚ်ညးတံ ကၠောန်အာဂှ် အမေရိကာန် ဆက်ကဵုအာဇြဟတ်ဂရိုဟ်ဏောၚ် အထံက်ဝန်ဇၞော် ဒါန်နဳယဴ ခရေတ်တာန်ဗရေတ် ဟီုလဝ်ရ။
Ref: Bloomberg