ဘာအၚ်၊ အံက်တဝ်ဗာ ၁၁
ပ္ဍဲတွဵုရးကရေၚ် ပွိုၚ်ဍုၚ်ဘာအၚ် ဂကောံကွာန်သာမည ပ္ဍဲကဵုကွာန်ဝေန်ဇြုၚ် ဒပ်ကံၚ်ဇြဳပၞာန် ကေတ်ဒၟံၚ်ကဵုဂီုကၠီု ဂကောံကံက်ဒၟံၚ်စရၚ်လၟိဟ်မၞိဟ် ဒးဒုၚ်ပန်ပှော်ဗ္တိုက်တုဲ ကောန်ဒပ်ကံၚ်ဇြဳပၞာန်ပိတၠ ချိုတ်အာလဝ်ရောၚ် တမ်ရိုဟ်ပရိုၚ်ဒေသတံ ဟီုရ။
ပ္ဍဲဂိတုအံက်တဝ်ဗာ ၁၀ အခိၚ်နူဂယး ၜိုတ် ၇ နာဍဳ ဂကောံရပ်လွဟ်မွဲဂကောံ ပန်ပှော်ဗ္တိုက်လဝ် ဂကောံကံက်စရၚ်လၟိဟ်မၞိဟ် ဗ္ဒါဲပါၚ်မုဒ်ဘာလကျာ်ဝေန်ဇြုၚ်၊ ကွာန်ဝေန်ဇြုၚ်၊ သ္ကုတ်သၟဝ်ကျာကွာန်သာမည ပွိုၚ်ဍုၚ်ဘာအၚ်ဂှ်ရောၚ် တမ်ရိုဟ်ပရိုၚ်ဒေသတံ သ္ဂးရ။
ယာန်ကွဳစက် ကောန်ဒပ်ကံၚ်ဇြဳပၞာန် ကေတ်ဒၟံၚ်ကဵုဂီုကၠီု ဂကောံကံက်ဒၟံၚ်စရၚ်လၟိဟ်မၞိဟ် ပ္ဍဲကဵုကွာန်ဝေန်ဇြုၚ်တံ ဍိုက်ဗက်ကၠုၚ် မွဲဖ္ဍိုက်ဂှ် ဂကောံရပ်လွဟ်မွဲဂကောံ ပန်ပှော်ဗ္တိုက်လဝ် နကဵု RPG စုက်က်တုဲ ဒးဒုၚ်ပန်ပှော်လဝ်ဂှ်ရ ကောန်ဒပ်ကံၚ်ဇြဳပၞာန် ပိတၠ ချိုတ်တုဲ ပိတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
ဒၞါဲဒေသ ပရေၚ်ပန်ပှော်ဗ္တိုက်က္တဵုဒှ်ဒၟံၚ်ဂှ်ဝွံ ဒှ်ဒေသ ဂကောံရပ်လွဟ်ကရေၚ် BGF, KNU/KNLA PC, DKBA, KNU တံ အာကၠုၚ်ချဳဒရာၚ်ဒၟံၚ်တံ မဒှ်ရ။
အခိၚ်လၟုဟ် လ္ပာ်ကွာန်ဝေန်ဇြုၚ် ဂကောံကွာန်သာမည ပရေၚ်ပန်ပှော်က္တဵုဒှ်လဝ်ဂှ် ကောန်ဒပ်ကံၚ်ဇြဳပၞာန်တံ ကေတ်လဝ်ဒၞါဲ နကဵုဇြဟတ်လၟိဟ်ဗွဲမဂၠိုၚ်ဂၠေၚ်တုဲ ညးဍုၚ်ကွာန်ဒေသတံ ဒးဂွိၚ်လကိုတ်တ္ၚဵုဒၟံၚ်အိုတ်ရောၚ် ဂွံတီကေတ်ရ။
အတိုၚ်ရဲထံက်ဂလာန် ကံၚ်ဇြဳပၞာန်တံ ထ္မံက်ထ္ၜးလဝ်ဂှ်မ္ဂး ဂကောံဒပ် KNU/PDF တံ ပန်ပှော်စုတ်လဝ် ယာန်ကွဳစက် နူကဵုဒပ်ကံၚ်ဇြဳပၞာန် ကေတ်ဒၟံၚ်ကဵုဂီုကၠီုဂကောံကံက်ဒၟံၚ်စရၚ်လၟိဟ်မၞိဟ်တံ နကဵုလွဟ်ဇၞော် RPG ရောၚ် စောဲစပ်လဝ်ရ။
ဂကောံပန်ပှော်ဒၟံၚ်ဂှ် ကရောၚ်ပၞာန်ဒပ်ကံၚ်ဇြဳပၞာန်တံ ဗက်ပသောၚ်ဒၟံၚ်တုဲ ကရပ်ဒၞါဲပရေၚ်ပန်ပှော်က္တဵုဒှ်လဝ်ဂှ် သီဂွံလဝ် RPG မွဲဇကိုအ်ဂှ် ချူထ္မံက်ထ္ၜးလဝ် ပ္ဍဲချာန်တေဝ်ထလဳဂရာမ် ကေုာံ ဇာဇၞိက်ပရေၚ်မၞိဟ် ရဲထံက်ဂလာန်ဒပ်ပၞာန်တံရ။
ပရိုၚ်−သြၚ်လောန်တိုၚ်(မ်)
ဗီု−CJ