သဓီု၊ အံက်တဝ်ဗာ ၁၁
အပ္ဍဲတိဍာ်အုပ်ဓုပ်ခရိုၚ်သဓီု ဒပ်မဟာ ၁ ဗော်သွးကောန်ဂကူကရေၚ် KNU ပ္ဍဲကဵုကွာန် ဗၞတ် ၄၀၀ ဂှ် လ္ပာ်ကံၚ်ဇြဳပၞာန်တံ ကံက်ကၠုၚ်စရၚ်လၟိဟ်မၞိဟ်ဟွံမာန်ပုဟ်ဂှ် ပဒိုဝ်သဝ်အေနာၚ် ညးအုပ်ကာ ခရိုၚ်သဓီု KNU ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်ဝွံ စနူဂိတုအံက်တဝ်ဗာ ၁ တုဲ ပ္ဍဲကဵုဒေသညးတံထိၚ်ဒက်လဝ်တံဂှ် ကံက်ဒၟံၚ်စရၚ်လၟိဟ်မၞိဟ် သၞာံ ၂၀၂၄ နကဵုဂီုကၠီုပေၚ်ၚ်ရ။
ဆ္ဂး ပ္ဍဲခရိုၚ်သဓီု KNU ဂှ် ယန္တယာပရေၚ်အုပ်ဓုပ်ကံၚ်ဇြဳပၞာန်တံ ဟွံမွဲရတုဲ စရၚ်လၟိဟ်မၞိဟ်ဂှ်လေဝ် ကံက်ဟွံမာန်ရောၚ် သ္ဂးရ။
အတိုၚ်ခရိုၚ်သဓီု KNU ဒက်ပ္တန်လဝ်ဂှ်မ္ဂး ပ္ဍဲကဵုတွဵုရးဍုၚ်မန်ဂှ် ကျာ်ထဝ်၊ ၜဳကလေၚ်၊ သဓီု၊ ပံၚ် ကေုာံ ပ္ဍဲတွဵုရးကရေၚ်ဂှ် ပ္ဍဲပွိုၚ်ဍုၚ်ဘာအၚ် ဒေသလ္ၚဵုတံ ပါလုပ်ရ။
ပ္ဍဲကဵုကွာန် ကံက်စရၚ်လၟိဟ်မၞိဟ်ဟွံမာန်တံဂှ် ပ္ဍဲကဵုပွိုၚ်ဍုၚ်ကျာ်ထဝ်ဂှ် ၁၁၀ ကွာန် ၊ ပ္ဍဲပွိုၚ်ဍုၚ်ၜဳကလေၚ်ဂှ် ၈၄ ကွာန်၊ ပ္ဍဲပွိုၚ်ဍုၚ်ဘာအၚ်ဂှ် ၉၈ ကွာန်၊ ပ္ဍဲပွိုၚ်ဍုၚ်သဓီုဂှ် ၈၁ ကွာန်တုဲ ပ္ဍဲပွိုၚ်ဍုၚ်ပံၚ်ဂှ်တှ်ေ ပ္ဍဲကဵုကွာန်သီုဖအိုတ်ဂှ် ဒှ်ဒၟံၚ်အကာဲအရာ ကံက်စရၚ်လၟိဟ်မၞိဟ် ဟွံဂွံရ။
ပ္ဍဲကဵုဍုၚ်ဗၟာ ပွိုၚ်ဍုၚ် နွံ ၃၃၀ ဂှ် ပွိုၚ်ဍုၚ်ဗ္ဒါဲ ၁၀၀ ဂှ်တှ်ေ ဂကောံရပ်လွဟ်ကောန်ဍုၚ်အရၚ်တံကဵု ဂကောံပၠန်ဂတး PDF တံ ထိၚ်ဒက်လဝ်တုဲ ပွိုၚ်ဍုၚ်သှ်ေကဝက်ဂှ်တှ်ေ ပရေၚ်ပန်ပှော်ဗ္တိုက်တံ နွံဒၟံၚ်ရ။
ဆ္ဂး ကံၚ်ဇြဳပၞာန်ဂှ်တှ်ေ ကံက်အာစရၚ်လၟိဟ်မၞိဟ် နူဂိတုအံက်တဝ်ဗာ ၁ စဵုကဵု ဂိတုအံက်တဝ်ဗာ ၁၅ ဏောၚ်တုဲ ဂိတုဒဳဇြေမ်ဗာအိုတ်ဏံ လလောၚ်ပ္တိတ်အာ စရၚ်လၟိဟ်မၞိဟ်ကလိဂွံလဝ်ဂှ်ဏောၚ် လလောၚ်တြးလဝ်ရ။
ပ္ဍဲကဵုကံၚ်ဇြဳပၞာန် ကံက်စရၚ်လၟိဟ်မၞိဟ်ဂှ် နကဵုညးဍုၚ်ကွာန်တံ လ္ပပံၚ်တောဲအိုတ်ဂှ်ကီု၊ လ္ပာ်သ္ပမာန် သွက်ဂွံဘိုၚ်ဒစဵုဒစးအိုတ်ဂှ် ဂကောံဇြဟတ်ပၠန်ဂတးတံ ဖ္တိုက်ဖ္အောဝ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI