နေဗျဳဒဝ်၊ အံက်တဝ်ဗာ ၁၁
ပရေၚ်သွံရာန်ဗၞိက်ဟွံလုပ်သၞောဝ် မက္တဵုဒှ်ဒၟံၚ် အပ္ဍဲဍုၚ်တံဝွံ ဒၟါနူညးယိုက်ဝန်တံ ဒ္ဂေတ်လီုဏောၚ် ဒုက္ဍိုပ်သ္ကိုပ်ပၞာန်သီအဝဵု ဒုသ္ကိုပ်ဗိုလ်ဇၞော် သဵုဝေန် ဟီုပ္တိတ်လဝ်ရ။
ဟီုကၠုၚ်လဝ် ပ္ဍဲကဵုကောံဓရီုပ္ညဳပ္ညပ်ကမၠောန် ကမ္မတဳဗ္တိုက်သ္အး ပရေၚ်သွံရာန်ဗၞိက်ဟွံလုပ်သၞောဝ် မကၠောန်ဗဒှ်လဝ် ပ္ဍဲၝောံခန်ကောံဓရီု ဌာနဝန်ဇၞော်ပရေၚ်သွံရာန် ကေုာံ ပရေၚ်ပိုန်ဒြပ် ပ္ဍဲနေဗျဳဒဝ်ဂှ်ရ။
ဟိုတ်ပရေၚ်သွံရာန်ဗၞိက်ဟွံလုပ်သၞောဝ်တံ ဂွံက္တဵုဒှ်ကၠုၚ် အဓိကဂှ်ဝွံ ပ္ဍဲကဵုဒေသပယျဵုလ္ၚဵုတံဂှ် ဒၟါနူပရေၚ်ဂီုကၠီုတုဲ သွက်ဂွံမၚ်ရံၚ်ထိၚ်ဒက်ဂှ် တၚ်သၞောတ်ဗ္ၜတ်နွံဒၟံၚ်ကီု၊ ပ္ဍဲပရေၚ်သၞောဝ်တံဂှ် ဇြဟတ်ဍိုန်လျဒၟံၚ်တံ နွံကီု၊ ဇြဟတ်သၞာဲဒဴ ဟွံရုမ်ဂပ်ကီု ကေုာံ ဟိုတ်နူဒ္ဂေတ်လီုဒၟံၚ်တံ နွံဒၟံၚ်ရောၚ် ဒုက္ဍိုပ်သ္ကိုပ်ပၞာန် သ္ဂးရ။
ဟိုတ်ဂှ်ရ ပရေၚ်သွံရာန်ဗၞိက်ဟွံလုပ်သၞောဝ်တံဂှ် ကၟာတ်လဒဵုစၟဳတ်အာ ပ္ဍဲကဵုဒေသပယျဵုတံကဵု ဂၠံၚ်တရဴသွံရာန်ဗၞိက်တံဂှ်ဏောၚ်တုဲ သွက်ဂွံလုပ်စိုပ်စၟဳတ် ဒဵုကဵုရုၚ်ကြိုၚ်စွံကပေါတ် အပ္ဍဲဍုၚ်တံကဵု ဗွဝ်ဖျာတံဂှ် ဒုက္ဍိုပ်သ္ကိုပ်ပၞာန် ကဵုလဝ်စၞောန်ရ။
တၠကမၠောန်ပရေၚ်ပိုန်ဒြပ်မွဲတၠဂှ် ပရေၚ်သွံရာန်ဗၞိက်ဟွံလုပ်သၞောဝ်တံ က္တဵုဒှ်ဒၟံၚ်ဂှ်ဝွံ ကဵုအကံက်ခေါန်ကဵုဒှ် ဟွံကဵုကဵုဒှ် သၞေဟ်ကၚ်စၟဳတ်မဆက်စပ်တံသီုဖအိုတ်ဂှ် ဒးကဵုဒၟံၚ်လှုဲရောၚ် ထံက်ထ္ၜးလဝ်ရ။
“အဓိကဂှ်တှ်ေ သၞေဟ်ကၚ်တံဂှ်တှ်ေ ကေတ်လှုဲတုဲ စှ်ေဂွံဒၟံၚ်ဏောၚ်။ ညအ်ဂှ် သောၚ်ၚ်ရဏောၚ်။ ပ္ဍဲပယျဵုတံဂှ်လေဝ် အကံက်အခေါန်လုပ်သၞောဝ်ဂှ် ၁၀ တၟံကၠံ ၂၀ တၟံကၠံ ဒးကဵုဒၟံၚ်ဏောၚ်။ သၞေဟ်ကၚ်နွံပ္ဍဲဂၠံၚ်တံသီုဖအိုတ်ဂှ်လေဝ် ဒးကဵုဒၟံၚ်ဏောၚ်။ ဒပ်ပၞာန်ဂှ်လေဝ် ဒးကဵု။ ဗၠာဲသၟိၚ်ဂှ်လေဝ် ဒးကဵု။ သၞေဟ်ကၚ်ၜိုတ်နွံ ၜိုတ်အာတ်ဂှ်လေဝ် ဒးကဵု။ လၟုဟ်ဂှ် သၟာဗၞိက်တံဂှ်တှ်ေ ဒးကဵုဒၟံၚ်သီုၜါလ္ပာ် ဒှ်ဒၟံၚ်ရ။ သၞေဟ်ကၚ်တံဂှ်တှ်ေ ကေတ်လှုဲတုဲ ဗလးကဵုဒၟံၚ်ဂှ်ရ ပရေၚ်သွံရာန်ဗၞိက်ဟွံလုပ်သၞောဝ်ဏံဂှ် ဒှ်ဒၟံၚ်တွဵုရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် နကဵုကံၚ်ဇြဳပၞာန် တိဍာ်ထိၚ်ဒက်လဝ် ဟွံမွဲတုဲ ဂွံတာဒၞါ ပရေၚ်သွံရာန်ဗၞိက်ဟွံလုပ်သၞောဝ်တံ ဗွဲမစိုပ်တရဴဂှ် တာဒၞါအာမာန်ဟွံသေၚ်တုဲ ပ္ဍဲကဵုပရေၚ်သွံရာန်ဗၞိက်ဟွံလုပ်သၞောဝ်တံဂှ်လေဝ် ပွမဗက်စအဂတိတံ နွံဒၟံၚ်တုဲ တာဒၞါမာန် ဟွံသေၚ်ပုဟ်ဂှ် ညးဆက်ဟီုရ။
ကပေါတ်ဗၞိက်ဗွဲမဂၠိုၚ် မလုပ်စိုပ်ကၠုၚ် နူကဵုပရေၚ်သွံရာန်ဗၞိက်ဟွံလုပ်သၞောဝ်သာ်ဏံတံဂှ်ဝွံ ဒှ်ဗၞိက်စၞစသုၚ်သ္ဇိုၚ် ညးဍုၚ်ကွာန်တံ ဒးသုၚ်စဒၟံၚ် အရိုဟ်တ္ၚဲတံတုဲ အပ္ဍဲဍုၚ် ရုမ်မ်ဂပ်ပ် ပ္တိတ်ဟွံမာန်မွဲသာ် ယဝ်ရရပ်ကၠုၚ် စဵုကဵုဗွဝ်ဖျာမ္ဂး ၚုဟ်ဗၞိက်ဖျာတံလေဝ် သၠုၚ်တိုန်ကၠုၚ်ဏောၚ်ဂှ် တၠကမၠောန်ပရေၚ်ပိုန်ဒြပ်တံ သ္ၚဳဂၠိပ်လဝ်ရ။
အတိုၚ်တၚ်နၚ် ကံၚ်ဇြဳပၞာန်ဂှ်မ္ဂး ရပ်ဂွံပရေၚ်သွံရာန်ဗၞိက်ဟွံလုပ်သၞောဝ်ဂှ်တှ်ေ ပ္ဍဲသၞာံ ၂၀၂၄ နူဂျူလာၚ် စဵုကဵုအပ္ဍဲဂိတုအဝ်ဂါတ်ဂှ် ပ္ဍဲရးမာန္တလေဝ် ရပ်ဂွံလဝ် ဂၠိုၚ်အိုတ်တုဲ ရးသက်ကိုၚ်ဂှ် ဒုတိယ၊ တွဵုရးကချေၚ်ဂှ် ရပ်ဂွံလဝ် တတိယဂၠိုၚ်အိုတ်ရောၚ် သ္ဂးရ။
ကပေါတ်ဗၞိက် ရပ်ဂွံလဝ် နူကဵုပရေၚ်သွံရာန်ဗၞိက်ဟွံလုပ်သၞောဝ်ဂှ်ဝွံ ရပ်ဂွံယာန်ကွဳစက် လာၚ်ဇြေန်ဟွံမွဲတံကဵု ယာန်ကွဳစက် ဖ္ဍိုက်ပ္တိုန်ဗၞိက်တံ ဂၠိုၚ်အိုတ်တုဲ ကပေါတ်ဗၞိက်အပြောံ သ္ဂောံရပ်စပ်ပ္ဍဲကမၠောန်တံဂှ်လေဝ် ဒှ်ဒုတိယဂၠိုၚ်အိုတ်တုဲ ကပေါတ်ဗၞိက်ဓလိုက်တမ်ရိုဟ်တံဂှ်တှ်ေ ဒှ်တတိယဂၠိုၚ်အိုတ်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−MOI