သွက်ဂွံသွံတြးကဵုကၠေၚ်စက် နကဵုသမာတ်ကာဒ်ဂှ် ကံၚ်ဇြဳပၞာန် သ္ပဒတန်

မတ်မလီု၊ အံက်တဝ်ဗာ ၁၂

အပ္ဍဲဍုၚ်ဗမာ လ္တူဍုၚ်ဇၞော်ဇၞော်လ္ၚဵုတံဂှ် ကၠေၚ်စက်တံဂှ် ၜိုတ်နွံပၟိက် သွံတြးကဵုအာဟွံသေၚ်ရတုဲ သွက်ဂွံသွံ နကဵုသၞောတ်ဗ္ၜတ်ဂှ် ကံၚ်ဇြဳပၞာန် သ္ပဒတန်လဝ် သၞောတ်သမာတ်ကာဒ်ရောၚ် တၠကမၠောန်သွံရာန်ကၠေၚ်စက်တံ ဟီုရ။

တုဲကၠုၚ် ဂိတုအဝ်ဂါတ် သတ္တာဟပထမဂှ်တုဲ အလုံဍုၚ်မွဲ ပ္ဍဲကဵုပွိုၚ်ဍုၚ်ဗွဲမဂၠိုၚ်ဂှ် ကၠေၚ်စက်ပိုတ်အိုတ် က္တဵုဒှ်လဝ်ကီု၊ ဒးမၚ်ရာန်ဒၟံၚ် အခိၚ်ဗွဲမလအ်လကီု၊ ၜိုတ်နွံပၟိက် ရာန်ကေတ်ဟွံဂွံ ဒဵုကဵုအကာဲအရာတံဏံ က္တဵုဒှ်လဝ်ရ။

ကြဴနူက္တဵုဒှ်ကၠုၚ်သာ်ဏံတုဲဂှ် ကံၚ်ဇြဳပၞာန် ကော်သဳကၠဳ တၠကမၠောန်သွံရာန်ကၠေၚ်စက်တံဂှ်တုဲ သွက်ဂွံစရပ်စပ်အာ သၞောတ်သွံတြး နကဵုသမာတ်ကာဒ် ကဵုသၞောတ်ဗ္ၜတ်တံဂှ် သ္ပဒတန်လဝ်ရောၚ် ဂွံတီကေတ်ရ။

တၠကမၠောန်သွံရာန်ကၠေၚ်စက်မွဲတၠဂှ်တှ်ေ ကၠေၚ်စက်လၟုဟ်ဂှ် ဂွံသွံတြး နကဵုသၞောတ်သမာတ်ကာဒ်ဂှ်တှ်ေ သွက်ဂွံစထ္မံက်အာရုပ်ရဴ ပ္ဍဲလ္ဂုၚ်၊ နေဗျဳဒဝ်၊ မာန္တလေဝ်တံဂှ် သ္ဂုတ်သွာတ်လဝ်တုဲ နူဂှ်မွဲကဆံၚ် သွက်ဂွံလှဲပ္တိုန်အာ ရးဒေသကဵု တွဵုရးတၞဟ်ဟ်တံ နွံဂှ် ဟီုလဝ်ရ။

“ ရးလ္ဂုၚ်၊ နေဗျဳဒဝ်၊ မာန္တလေဝ်တံဂှ်တှ်ေ သွက်ဂွံထ္မံက်ရုပ်ရဴဂှ် ညးတံ သ္ဂုတ်သွာတ်လဝ်ရ။ ရးဒေသကဵု တွဵုရးသှ်ေတံဂှ်တှ်ေ ဟွံစိုပ်ဏီပုဟ်။ ပြဟ်ဟ်ဏံ စမ်ရံၚ်ဂှ်တှ်ေ ရးလ္ဂုၚ်၊ နေဗျဳဒဝ်၊ ရးမာန္တလေဝ်။ စမ်ရံၚ် ဒေသပိဏံ ကၠာဏောၚ်။ နူကဵုဏံ စိုပ်တရဴဟာ အရာဒးပလေဝ်နွံဟာ တုဲမှ ဆက်တုဲလှဲအာဟာ ဗီုဏံရ။ လၟုဟ်ဂှ်တှ်ေ သ္ပဒတန်လဝ်ရ။ ဆ္ဂး နတဲဏံဂှ်တှ်ေ ဟွံဂွံရပ်စပ်ဏီပုဟ်” သာ်ဝွံ သ္ဂးရ။

သ္အာၚ်နူဂှ်ပၠန် ပ္ဍဲကဵုသၞောတ်သမာတ်ကာဒ် ရပ်စပ်အာလၟုဟ်ဏံဂှ် တန်တဴကဵုဂကူကွဳစက်တုဲ မွဲတ္ၚဲတှ်ေ စၟတ်အာၚုဟ်ကၠေၚ်စက်မွဲသာ်တုဲ သွံတြးကဵုအာဏောၚ်တုဲ ဗီုကဵုကၠာတေံ အခိၚ်မိက်ဂွံဂွံဂှ် ၜိုတ်နွံပၟိက် ရာန်ဂွံအာဟွံသေၚ်ရပုဟ်ဂှ် ညးဆက်ဟီုရ။

ညးဒဳကွဳစက်မွဲတၠဂှ်တှ်ေ ယဝ်ရရပ်စပ်သၞောတ်သမာတ်ကာဒ်မ္ဂး တန်တဴကဵုဂကူကၠေၚ်စက်ဍေံတံကဵုဂှ်တုဲ ယဝ်ရကဵုကၠုၚ် ရုမ်မ်ဂပ်ပ်ဟွံသေၚ်မ္ဂး ပြေပြံၚ်ဟွံသေၚ်တုဲ ယဝ်ရရာန်မ္ၚးဏံ နကဵုၚုဟ်ဓလုက်ပၠန်မ္ဂး သာတုဲကြေပ်ဂြတ်ကၠုၚ်ဏောၚ်ဂှ် ဟီုရ။

“ကဵုသမာတ်ကာဒ်တှ်ေ တန်တဴကဵုပမာဏ ဍေံတံကဵုဂှ်ဏောၚ်။ ကဵုရုမ်မ်ဂပ်ပ်ဟွံသေၚ်တှ်ေ ဟွံပြေပြံၚ်ပုဟ်ထေၚ်ကေတ်ရ။ ၜိုတ်ဇကုတော်လဝ် မွဲမွဲသတ္တာဟဂှ်တှ်ေ ဍေံတံကဵုၜိုတ်လဵုမာန်ရော။ ယဝ်ရဇကုဂွံဒဳဂၠိုၚ်တုဲ ဍေံတံကဵုကၠုၚ်အောန်တှ်ေ ချိၚ်တုဲဒးဒဳဏောၚ်။ ဍေံတံဂှ်တှ်ေ မွဲမွဲသတ္တာဟ ကဵုအာသာ်လဵုရောဟီုဂှ် အစဳဇန်လေဝ် ဟွံမွဲပုဟ်။ ဟွံမွဲဏီတှ်ေ ဒးချပ်စကျာတ်ညိ။ အခိၚ်ကၠေၚ်ကြေပ်ဏံ မ္ၚးတေံဂှ် ဖျာဓလုက်တံဂှ်တှ်ေ ၚုဟ်တိုန်ဏောၚ်။ ၚုဟ်တိုန်တုဲ ပိုယ်တံလေဝ် ဒးဗက်ရာန်ၚုဟ်တံဏံတုဲ ဒးဒဳမ္ဂး သွက်ပိုယ်တံဂှ်တှ်ေ သာတုဲကြေပ်ဂြတ်ကၠုၚ်ဏောၚ်” သာ်ဝွံ သ္ဂးရ။

သ္အာၚ်နူဂှ်ပၠန် ကၠာဟွံဂွံရပ်စပ် သၞောတ်သမာတ်ကာဒ်ဂှ် ဒဵုကဵုအခိၚ်လၟုဟ် ပ္ဍဲကဵုဆေၚ်ကၠေၚ်စက်ဗွဲမဂၠိုၚ်ဂှ် ဂကူကၠေၚ်စက်သီုဖအိုတ်ဂှ် ရာန်ကေတ်ဟွံဂွံဏီတုဲ ၚုဟ်ကၠေၚ်စက်တံှဂ်လေဝ် ကလေၚ်တိုန်ကၠုၚ်ဒၟံၚ်ရောၚ် ညးဆက်ဟီုရ။

သၞောတ်သမာတ်ကာဒ် ကံၚ်ဇြဳပၞာန် မရပ်စပ်အာဂှ်ဝွံ ဒှ်ဗီုပြၚ်လိက်အုပ် အခေါၚ်ပ္တိတ်ကၠေၚ်စက် မရပ်စပ်ကၠုၚ်လဝ် ပ္ဍဲလက်ထက်အလဵုအသဳတၠအဝဵုပၞာန်ကၠာတေံဂှ်ရ ၜိုတ်နွံပၟိက် ဗွဲမလုပ်သၞောဝ် ရာန်ကေတ်ဟွံဂွံမ္ဂး ဗွဝ်ဖျာဓလုက်မ္ၚးဏံ ဇၞော်ပၟဝ်ကၠုၚ်မာန်ရောၚ်ဂှ်လေဝ် တၠကမၠောန်ပရေၚ်သွံရာန်ကၠေၚ်စက်တံ သ္ၚဳဂၠိပ်လဝ်ရ။

ပ္ဍဲဍုၚ်ဗၟာ ကၠာပၞာန်ဟွံဂွံသီအဝဵုတေံ လက်ထက်အလဵုအသဳ NLD တေံ ကၠေၚ်စက်မွဲလဳတာဂှ် နကဵုပွဳပွူ ၆၀၀ ဒ္ကေဝ် ၜိုတ်နွံပၟိက် ရာန်ဂွံတုဲ ကြဴနူဒပ်ပၞာန်သီအဝဵုတုဲ ၚုဟ်ကၠေၚ်စက် သၠုၚ်တိုန်ကၠုၚ် စဵုကဵု ၅ ဆတုဲ ပိုတ်အိုတ်ဒၟံၚ်မွဲဏှမွဲဏှကီု၊ ၜိုတ်နွံပၟိက် ရာန်ကေတ်ဟွံဂွံတံ သၟးဟွံက ၚုဟ်ဟွံညိၚ်ဝတ်တံလေဝ် က္တဵုဒှ်ဒၟံၚ် ကြပ်အရိုဟ်ဒဒှ်တ္ၚဲရ။

ပရိုၚ်−သြၚ်လောန်တိုၚ်(မ်)

ဗီု−CJ