ပါဲနူကြုက်တုဲ ညံၚ်ဟွံဂွံဆက်ဆောံကဵု ဂကောံဇြဟတ်ဍုၚ်သ္အာၚ်တံဂှ် MNDAA တာဒၞါ ကောန်ဂကောံဂမၠိုၚ်

လာယှိုဝ်၊ အံက်တဝ်ဗာ ၁၂

ဒပ်ကဝ်က ဒပ်ပၞာန်မဟာမိတ် ဒဳမဝ်ကရေတ်တေတ် ကောန်ဂကူဗၟာ MNDAA ဖျေံသ္ဇိုၚ်ပယျဵုကြုက်−ဗၟာဂှ် စပ်ကဵုပရေၚ်ဍုၚ်ဗၟာတုဲ လ္ပဆက်ဆောံကဵု ဂကောံဇြဟတ်ဍုၚ်သ္အာၚ်တံဂှ် ပ္ဍဲဂိတုအံက်တဝ်ဗာ ၁၀ တေံ လလောၚ်ပ္တိတ် တာဒၞါကၠုၚ် ကောန်ဂကောံဒပ်ညးတံကဵု ညးမဆေၚ်စပ်တံရ။

ဟိုတ်နူအကာဲအရာအပ္ဍဲဍုၚ် မထုဲထံၚ်ဒၟံၚ်လၟုဟ်ဂှ်တုဲ ညံၚ်ဂကောံဇြဟတ်ဍုၚ်သ္အာၚ်တံ ဟွံဂွံရပ်စပ်အာ MNDAA ဗွဲအနိၚ်အပိုၚ်ဂှ်ကီု၊ သွက်ဂွံစဵုဒၞါအာ နူကဵုပွမပါလုပ်ဒၟံၚ် ပ္ဍဲကဵုပရေၚ်ကယျာန်ဓဝါန် ပ္ဍဲပဋိပက္ခတံဂှ်တုဲ တာဒၞါလဝ် ကောန်ဂကောံဒပ်တံရောၚ် သ္ဂးရ။

MNDAA ကၟာတ်လဒဵုလဝ်ဂှ်ဝွံ တၚ်နၚ်မပ္တဝ်လဝ်က္ဍိုပ် ကုဍုၚ်ကြုက်ဂှ် ဟွံဂွံဆဵုကေတ်တုဲ ကြဴနူစၟတ်သမ္တီကောံဓရီု ဂကောံ “ဝ” ကဵု ညးစၞးတၟေၚ်ကြုက် တုက်ယှဳကျွေန်တံ ဆဵုဂဗလဝ်ညးသ္ကအ် မံက်အာတုဲဂှ် လလောၚ်တြးကၠုၚ် သာ်ဏံရ။

ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် သ္ပဟိုတ်ကဵု ပဋိပက္ခဍုၚ်ဗၟာတုဲ ကြုက်ဂှ်တှ်ေ ဂကောံဇြဟတ်ဍုၚ်ပလိုတ်တံ လုပ်ကၠုၚ်ဂှ် ဖေက်ကွေံကွေံတုဲ သွက်ဂွံမံၚ်သ္ၚောဲသ္ၚောဲဂှ် ကဵုလဝ်အမိၚ် ကု MNDAA ရောၚ် သ္ၚဳဂၠိပ်လဝ်ရ။

“ကြုက်ဂှ်တှ်ေ သ္ပဟိုတ်ကဵု ပဋိပက္ခပ္ဍဲဍုၚ်ဗၟာတုဲ ဂကောံဇြဟတ်ဍုၚ်သ္အာၚ် NATO, EU တံ အမေရိကာန်တံ လုပ်စိုပ်ကၠုၚ်ဂှ် ဖေက်ကွေံကွေံဏောၚ်။ အေ ဂှ်တှ်ေ ဂကောံဇြဟတ်ရပ်လွဟ် နွံဒၟံၚ်အပ္ဍဲဍုၚ် ဂကောံညးတံ ကဵုအမိၚ်ဂွံတံဂှ် ကဵုကၠုၚ်အမိၚ်သာ်ဏံတုဲ လ္ပဆဵုဂဗ လ္ပသဳကၠဳ လ္ပကဵုပရိုၚ်တံ မုတံ လ္ပဆက်ဆောံ မံၚ်သ္ၚောဲသ္ၚောဲဂးတုဲ ပ္တိတ်လဝ်အမိၚ်ရ” သာ်ဝွံ သ္ဂးရ။

ပ္ဍဲကဵု MNDAA တာဒၞါလဝ်တံဂှ် ဟွံဂွံအခေါၚ်မွဲသာ် လ္ပတိတ်တရဴ ဍုၚ်အမေရိကာန်၊ ဍုၚ်ပလိုတ်၊ သီုကဵုဍုၚ်အာဇြဳယာန်တံဂှ်တုဲ ပ္ဍဲကဵုကောံရီုဍုၚ်သ္အာၚ် မဆက်စပ်ကဵုပရေၚ်ဍုၚ်ဗၟာတံဂှ်လေဝ် ကၟာတ်လဒဵုလဝ် အခေါၚ်ပါလုပ်တံရ။

သ္အာၚ်နူဂှ်ပၠန် ဟွံဂွံအခေါၚ်မွဲသာ် ပွမဆဵုဂဗသၟာန်သှ် ကုအ္စာပရိုၚ် နူကဵုပရိုၚ်မဳဒဳယျာအမေရိကာန်ကဵု ဍုၚ်ပလိုတ်တံဂှ် တာဒၞါလဝ်တုဲ အပ္ဍဲသၞာံဏံ အေန်တာဗျူမဳဒဳယျာဍုၚ်သ္အာၚ်တံဂှ်လေဝ် ဒုၚ်အာတဲ ဟွံသေၚ်ပုဟ်ဂှ် သ္ဂးရ။

မွဲလ္ပာ်ဂှ်ပၠန် စပ်ကဵုအကာဲအရာဍုၚ်ဗၟာတုဲ ရပ်စပ်ယၟုပူဂဵု ကေုာံ ယၟုဂကောံဗော်သွးတံဂှ်တုဲ လလောၚ်ပ္တိတ် လစွံစိုတ်၊ တၚ်ဒတူလိုၚ်တံဂှ်လေဝ် MNDAA ကၟာတ်လဒဵုလဝ် ကောန်ဂကောံဒပ်ညးတံကဵု ညးမဆက်စပ်တံရ။

ယဝ်ရဖံက်ပ္ကဝ်တၚ်တာဒၞါတံဏံဂှ်မ္ဂး တန်တဴကဵု အကာဲအရာ၊ ဖဵုအဆက်လက္ကရဴတံဂှ်တုဲ ရေၚ်တၠုၚ်အာဏောၚ်ဂှ် MNDAA လလောၚ်ပ္တိတ်လဝ် တၚ်လလောၚ်တြးရ။

ညးလ္ၚတ်ပရေၚ် ကြုက်−ဗၟာမွဲတၠဂှ်လေဝ် MNDAA ဝွံ ပပ္တံနူကဵုစၞစ စဵုကဵုမကမ်လွဟ်လက်နက်တံဂှ် ဒးသ္ပပဓာန်ဒၟံၚ် ကြုက်တုဲ ကြုက်ဂှ်လေဝ် ညံၚ်ဒပ်ကၠအ်ဇကုဂွံခိုၚ် မၞိဟ်ဇကုဂှ် ကဵုသၞလဵုမှ မိက်ဂွံကဵုဆက်ဆောံအာ ဟွံသေၚ်ပုဟ်ဂှ် သ္ၚဳဂၠိပ်လဝ်ရ။

“ MNDAA ဝွံ နွံဒၟံၚ်ပယျဵုကြုက်တုဲ စနူကဵုစၞစသုၚ် စဵုကဵုမကမ်လွဟ်လက်နက်တံဂှ် ဒးသ္ပပဓာန်ဒၟံၚ်ရ။ နကဵုဍုၚ်ကြုက်ဇြဟတ်ဇၞော်မွဲ ဇိုၚ်ဒပ်ညးဂှ် ဇိုၚ်တဲဍုၚ်ဂၠါဲဒၟံၚ်သၞ ကုညးတံဂှ် စွံအာဟွံသေၚ်ပဟ်။ ညံၚ်ဒပ်ဂွံခိုၚ် မၞိဟ်ညးတံဂှ် ကဵုသၞလဵုမွဲမှ မိက်ဂွံကဵုဆက်ဆောံအာဟွံသေၚ်ပုဟ်။ ညံၚ်ရဴအမေရိကာန် စွံစိုတ်လ္တူကျူဗာ၊ ညံၚ်ရဴရုယှာ စွံစိုတ်လ္တူယူကရုၚ်ကီုရဏောၚ်။ TNLA ဂှ်တှ်ေ ဒတူလိုၚ်ကၠုၚ် လ္ပာ်ပၠန်ဂတးက္ညၚ်ပေၚ်ၚ်။ ၜိုန်ဂှ်လေဝ် ဂကောံမဟာမိတ်ကောဒေံပိဂကောံဏံ ပရေၚ်ဒက်မဟာမိတ်တံ ဟွံလီုအာမွဲသာ် ဒဵုကဵုလၟုဟ် နွံဒၟံၚ်ဖိုဟ်ရ” သာ်ဝွံ သ္ဂးရ။

ယဝ်ရကၠိုဟ်ကေတ် ပရိယာဲပရေၚ်ပၞာန် ပရေၚ်ဍုၚ်ကွာန်မ္ဂး ဣဏံဝွံ ဒှ်အပြံၚ်အလှာဲခိုဟ်ဟ်မွဲဏောၚ်တုဲ နကဵု NUG လေဝ် လုပ်စၞး ဒၞါဲကံၚ်ဇြဳပၞာန်တုဲ ဒဒှ်ရဒှ်မံၚ်ဒတုဲ သွက်ဂွံတောဲကၠောန်အာကဵု ဒပ်ပၠန်ဂတးကောန်ဍုၚ်အရၚ်တံဂှ် စိုပ်အခိၚ်ဒးထ္ၜးပျးရဏောၚ်ဂှ် ညးထံက်ထ္ၜးလဝ်ရ။

နကဵုကြုက် ကေတ်လဝ်အရေဝ် ကၟာတ်လဒဵုလဝ် ဒပ်ကဝ်က MNDAA နကဵုထပိုတ် ၅ ထပိုတ်တုဲ လုကဴဟွံဆုတ်ကလေၚ်ကဵု နူဍုၚ်လာယှိုဝ်မ္ဂး ရုပ်သီကဵုအာဟွံသေၚ်တုဲ ပရေၚ်ကေတ်အရေဝ် သာတုဲသ္ကာတ်မြဟ်တံဂှ်လေဝ် ကၠောန်ၜိုတ်အာဏောၚ်ဂှ် ကဵုလဝ်ဇြဟတ်ဂရိုဟ်ရ။

နကဵု MNDAA ဒးဆေၚ်ဒၟံၚ်မုက် ဇြဟတ်ဂရိုဟ်သာ်ဏံဂှ် ကဵုဗွိုၚ်ဍုၚ်သ္အာၚ် မဒစဵုဒစး ကုဍုၚ်ကြုက်၊ ဍုၚ်ဗၟာတံဂှ် ဒက်အာမိတ်ဟွံသေၚ်  Redline ပရေၚ်ဍုၚ်ကွာန်ညးတံဂှ် ပ္ဍဲဂိတုသေပ်တေမ်ဗာတုဲကၠုၚ်တေံ ကဵုလဝ်သမ္တီရ။

မွဲလ္ပာ်ဂှ်ပၠန် အပ္ဍဲပရေၚ်ပၞာန် ၁၀၂၇ တေံ နကဵု MNDAA ပံၚ်တောဲလုပ်လဝ်ပေါဲဗ္တိုက် ကုဒပ်စဵုဒၞါညးဍုၚ်ကွာန် PDF, NUG ကရောံမဟာမိတ်တံဂှ် ကဵုအလဵုအသဳညဳသၟဟ်ဂကူ NUG ဂှ် လ္ဂောံကဵုပရေၚ်ဍုၚ်ကွာန် ပရေၚ်ပၞာန်တံဂှ် ပံၚ်တာဲအာဟွံသေၚ်ရပုဟ်ဂှ် ဒးလလောၚ်တြးလဝ်ရ။

 ညးခါတ်အကာဲပရေၚ်ဍုၚ်ကွာန်တံဂှ်တှ်ေ ရံၚ်ကေတ်တၚ်လလောၚ်တြး MNDAA တံဂှ်မ္ဂး ဍုၚ်ကြုက် လုပ်စိုပ်ဖန်ဖက်ဒၟံၚ် လ္တူဂကောံဇြဟတ်ပၠန်ဂတးရပ်လွဟ် နွံအပ္ဍဲဍုၚ်ဗၟာတံ ကဵုဒၟံၚ်အမိၚ်ဂှ် ကၠးဖ္ဍးဒၟံၚ်ရောၚ် သ္ၚဳဂၠိပ်လဝ်ရ။

စပ်ကဵုပရေၚ်ဏံတုဲ ဒဒှ်ရဒှ်တဴပလာပ်ပထုဲ ပ္ဍဲပၠန်ဂတးက္ညၚ် မထပိုတ်ဒၟံၚ်ရိုဟ်ကၞက် သၞောတ်တၠအဝဵုပၞာန်တံဂှ်ကီုလေဝ် ပရေၚ်ဇီုကပိုက်ဒးဂိဇၞော်ဇၞော်တံ က္တဵုဒှ်ကၠုၚ်ဟွံမာန် အရာမတော်ခယျသာ်ဏံလေဝ် နွံဒၟံၚ်ရ။

ဍုၚ်ကြုက်ဂှ်တှ်ေ ဂကောံဇြဟတ်ဍုၚ်သ္အာၚ်တံ လုပ်စိုပ်ပလာပ်ပထုဲ အပ္ဍဲပရေၚ်ဍုၚ်ဗၟာဂှ် ဒစဵုဒစးရောၚ် လလောၚ်ပ္တိတ်ကဵုလဝ်သမ္တီ နူကဵုရုၚ်ကလုတ်ကြုက် ဖျေံသ္ဇိုၚ်ဍုၚ်လ္ဂုၚ်ဂှ်ကီုလေဝ် လက္ကရဴမတ်ဏံ ကဵုဒၟံၚ်ဇြဟတ်ဂရိုဟ် မဒှ်ရ။

ပရိုၚ်−သြၚ်လောန်တိုၚ်(မ်)

ဗီု−MNDAA