ဒူဗိုၚ်၊ အံက်တဝ်ဗာ ၁၂
အခိၚ်ပဋိပက္ခ အသိၚ်သ္ကာတ်ကၠုၚ်ဒၟံၚ်ဏံ ညံၚ်အေဿရေ ဟွံဂွံဗ္တိုက် ရုၚ်စက်ကၠေၚ်ဍေန်အဳရာန်ဂှ် သွက်ဂွံတာဒၞါကဵုဂှ် ကၟိန်ဍုၚ်ပ္ၚံက်ၜဳဂမၠိုၚ် ဒဒှ်ရစန်ဒက်ဟီုဂးဒၟံၚ် ဇရေၚ်အမေရိကာန်ဂှ် ထ္မံက်ထ္ၜးလဝ် ပ္ဍဲပရိုၚ်ဂမၠိုၚ်ရ။
ဂွံဝေၚ်ပါဲ နူကဵုအကာဲအရာကြေပ်ဒၟံၚ်အကြာ ပ္ဍဲကဵုပဋိပက္ခတံဂှ်တုဲ ဍုၚ်ပ္ၚံက်ၜဳဂမၠိုၚ် မပ္တံကဵုသဝ်ဒဳအာရေဗဳယျာ၊ ယူအေအဳ ကေုာံ ဍုၚ်ကာတာတံ နကဵုအေဿရေ ပ္ဍဲအရာဗ္တိုက်အဳရာန်ဂှ် ညံၚ်ဟွံဂွံရပ်စပ် တွဵုဒၞက်ကျာညးတံဂှ် တာဒၞါလဝ်တုဲ သွက်ဂွံတာဒၞါကဵုဂှ် စန်ဒက်လဝ် သီုအမေရိကာန်ရောၚ် တမ်ရိုဟ်ပရိုၚ် မစုက်လုက်ကဵု ဗွိုၚ်အမေရိကာန် ပိ သ္ဂးရ။
ပ္ဍဲသတ္တာဟတုဲကၠုၚ်တေံ သွက်ပရေၚ်ပန်ပှော်ဗ္တိုက် ကုကမ်လှောဝ်တံဂှ် ပလန်အာတဲ ကုအဳရာန်ဏောၚ် အေဿရေ ဟီုကြီုလဝ်တုဲ ယဝ်ရပလန်တဲဗ္တိုက်အာ ညးတံမ္ဂး နကဵုအေဿရေ ဒးဂဗအာကဵု ပရေၚ်ဇီုကပိုက်လီုလာ်ဇၞော်ဇၞော်ဏောၚ် အဳရာန် ဘပဠလဝ်ဂှ်ရ ပ္ဍဲကဵုပေါဲပၞာန်ဇၞော်ဇၞော်မွဲ အမေရိကာန်လေဝ် ဒးပါလုပ်ကၠုၚ်မာန်ဏောၚ် ပရေၚ်ဒှ်ဓဝိၚ်တံဏံလေဝ် မံက်တိတ်ဒၟံၚ်ရ။
အခိၚ်ပရေၚ်ဒှ်ဓဝိၚ် အေဿရေ ဗ္တိုက်ကၠုၚ် ရုၚ်စက်ကၠေၚ်ဍေန်အဳရာန်တံမာန် နွံဒၟံၚ်ဂှ် နကဵုမဿလေမ်သောန်နဳ မဒှ်သ္ၚိရေၚ်ကၟေၚ်ဆက် ပ္ၚံက်ၜဳတံ ရပ်စပ်သြဇာညးတံတုဲ သွက်ဂွံကဵုအလဵုအသဳအမေရိကာန် ပ္ညဳပ္ညပ် လ္ဂောံကဵုပရေၚ်ကလုတ်တံဂှ် အဳရာန် မဒှ်မဿလေမ်ယှဳဟိုက် အာရာပ်ဟွံသေၚ်ဂှ် ဖ္တိုက်ဖ္အောဝ်လဝ်ရ။
အပ္ဍဲကဵုပရေၚ်ဗ္တိုက်တံဂှ် ယဝ်ရသဝ်ဒဳအာရေဗဳယျာ ကဵုကၠုၚ်အရီုဗၚ် ကုအေဿရေ မမိက်ကဵုမွဲမွဲမ္ဂး ရုၚ်စက်ကၠေၚ်ဍေန်တံ ဂွံဗၠးဘဲဂှ် ညးတံ ဟွံဒုၚ်လျိုၚ်ပုဟ်ဂှ် အဳရာန် ကဵုလဝ်သတိရ။
အခိၚ်အေဿရေ ဗ္တိုက်ကၠုၚ် ရုၚ်စက်ကၠေၚ်ဍေန်အဳရာန်မာန်ဂှ် ဝန်ဇၞော်ကာဍုၚ်သ္အာၚ် အဳရာန် စိုပ်ဒၟံၚ် ဍုၚ်ကာတာရ။
နကဵုသဝ်ဒဳအာရေဗဳယျာ တွဵုဒၞက်ကျာညးတံဂှ် ယဝ်ရပံက်ကဵုအာ သွက်အေဿရေမ္ဂး ဒှ်သဘဴဝေၚ်အာပၞာန်ရဏောၚ်ဂှ် ဒဒှ်ရအဳရာန်စၟတ်ကေတ်အာဂှ် ကဵုလဝ်သတိရောၚ် ညးမစုက်လုက်ကဵု ရုၚ်သၞောဝ်ဓဝ်ဝၚ်နန် သဝ်ဒဳအာရေဗဳယျာမွဲတၠ ဟီုလဝ်ရ။
ဂွံဗ္တိုက်အဳရာန်ဂှ် အပ္ဍဲဒေသ ယဝ်ရရီုဗၚ်ကဵုအာ အေဿရေမ္ဂး မဟာမိတ်အဳရာန်ဂမၠိုၚ် ကလေၚ်ပၠန်အာတဲ ကုဍုၚ်တံဏံဏောၚ် နူကဵုတဳဟဳရာန် ဘပဠလဝ်ဂှ် တမ်ရိုဟ်ကလုတ်တမာန်မွဲ ဟီုလဝ်ရ။
ပရေၚ်ဒှ်ဓဝိၚ် စပ်ကဵုအကာဲအရာ အဳရာန်−အေဿရေသာ်ဏံကီု၊ ဟိုတ်နူလဗိုတ်ကျာဟာရဳကိန် ဇြဟတ်သ္ကာတ်မွဲ လုပ်စိုပ်ပိုက်ကၠုၚ် အပ္ဍဲဍုၚ်အမေရိကာန်တံဂှ်တုဲ ပ္ဍဲဂိတုအံက်တဝ်ဗာ ၉ တေံ ၚုဟ်ကၠေၚ်ဍေန်ဂၠးတိ တိုန်အာ ၄ တၟံကၠံဂှ် ဂွံတီကေတ်ရ။
Ref: Reuters