ဗဳယာန်ကျေန်၊ အံက်တဝ်ဗာ ၁၃
ဍုၚ်ဗၟာ ညံၚ်ဂွံဒှ်အာဍုၚ်ကၠၚ်ဟဳ ဟၟဲကဵုရဲအဖဝ်ဂှ် ကၠဟ်ထောံလဝ်ဟွံထေက်ရောၚ် သ္ကိုပ်ဝန်ဇၞော်အိန္ဒိယ နာရာန်ဒရာမိုဝ်ဒဳ ဖ္တိုက်ဖ္အောဝ်လဝ် ပ္ဍဲကောံဓရီုအာဇြဳယာန် မကၠောန်ဗဒှ်လဝ် ပ္ဍဲဍုၚ်ဗဳယာန်ကျေန် ဍုၚ်လာအိုဝ်ရ။
သွက်ဂွံသောၚ်ကလး ပြသၞာဍုၚ်ဗၟာဂှ် တၚ်တုပ်စိုတ်အာဇြဳယာန် ၅ သာ် ဒဒှ်ရပၟိက်ဇၞော်ဂှ်ကီု၊ ဍုၚ်ဗၟာ ဂွံကလေၚ်ဂွံဒဳမဝ်ကရေဇြဳဂှ်လေဝ် ဒဒှ်ရပၟိက်ဇၞော်ဂှ် သ္ကိုပ်ဝန်ဇၞော် မိုဝ်ဒဳ ဟီုလဝ်ရောၚ် ဝန်အပ္ဍဲ ဌာနဝန်ဇၞော်ကာဍုၚ်သ္အာၚ်အိန္ဒိယ ဂျိုၚ်ဒိဗ် မာဇြောမ်ဒါ ဟီုလဝ် ပ္ဍဲပေါဲသောၚ်ကလးလိက်ပရိုၚ်ဌာနဝန်ဇၞော် မကၠောန်ဗဒှ်လဝ် ပ္ဍဲဂိတုအံက်တဝ်ဗာ ၁၁ ဂှ်ရ။
ပၞာန်အပ္ဍဲဍုၚ် မက္တဵုဒှ်ဒၟံၚ် ပ္ဍဲဍုၚ်ဗၟာလၟုဟ်တံ ညံၚ်ဂွံတုဲဒှ်အာ၊ ညံၚ်ဂွံကလေၚ်ရပ်စပ် သၞောတ်ဒဳမဝ်ကရေဇြဳဂှ် ဍုၚ်ဂမၠိုၚ် ပံၚ်တောဲဒးရီုဗၚ်ထေက်ဂှ်လေဝ် သ္ကိုပ်ဝန်ဇၞော် မိုဝ်ဒဳ ဟီုလဝ်ရ။
တၚ်တုပ်စိုတ်အာဇြဳယာန် ၅ သာ်ဂှ် ထ္မံက်အာရုပ်ရဴဏောၚ် က္ဍိုပ်သ္ကိုပ်ပၞာန် မေန်အံၚ်လှာၚ် တုပ်လဝ်စိုတ်ကီုလေဝ် ဂွံထ္မံက်ရုပ်ရဴဂှ် မုဟွံကၠောန်လဝ်ရ။
ကံၚ်ဇြဳပၞာန် ဒးဆေၚ်ဒၟံၚ်မုက်ကဵု ပရေၚ်ကျဗြံ အလုံဍုၚ်မွဲဂှ် ကၠောန်ဗဒှ်ပေါဲရုဲမာဲဏောၚ်ဂးတုဲ ကံက်ဒၟံၚ်စရၚ်လၟိဟ်မၞိဟ်ရ။
ကၠောန်ဗဒှ်ပေါဲရုဲမာဲဏောၚ် ကြဴနူလလောၚ်တြးတုဲဂှ် ကောံဓရီုအာဇြဳယာန် ကံၚ်ဇြဳပၞာန် ဟွံဂွံအခေါၚ်တိုန်ကၠာတေံဂှ် ဗလးကၠုၚ်လဝ် ဝန်အပ္ဍဲ ကာဍုၚ်သ္အာၚ် မွဲတၠရ။
ကြဴနူဒပ်ပၞာန်သီအဝဵုတုဲ အကာဲအရာဍုၚ်ဗၟာဝွံ ဒဵုကဵုအခိၚ်လၟုဟ် ကြံၚ်မ္ၚိုဟ်ဒၟံၚ်ဖိုဟ်တုဲ ဟိုတ်နူပရေၚ်ဗ္တိုက်ပကီုပရာပ်တံ က္တဵုဒှ်ဒၟံၚ် တၟာဂလိုၚ်ဂှ်ရ ပရေၚ်ဂီုကၠီုဒေသ အကာဲအရာသ္ဇက်ဒးဂွိၚ်တံဂှ်လေဝ် က္တဵုဒှ်ဒၟံၚ်ရောၚ် သ္ကိုပ်ဝန်ဇၞော် မိုဝ်ဒဳ ဟီုလဝ်ရ။
ပေါဲရုဲမာဲ ကံၚ်ဇြဳပၞာန် စဳဇန်လဝ်ဂှ်ဝွံ ပေါဲရုဲမာဲဗၠးၜးဗဗွဲဓဝ်မွဲ ဒှ်ဟွံမာန်ပုဟ်ဂှ် ဂကောံဇြဟတ်နွံပၟိက်ဒဳမဝ်ကရေဇြဳ ဍုၚ်ဗၟာတံကဵု ဍုၚ်ပလိုတ်တံ ဟီုလဝ်ရ။
ကံၚ်ဇြဳပၞာန်ဂှ်တှ်ေ ညံၚ်ပရေၚ်အုပ်ဓုပ်ညးတံ ဂွံလုပ်သၞောဝ်ဂှ် စဳဇန်လဝ် သွက်ဂွံကၠောန်ဗဒှ်ပေါဲရုဲမာဲရောၚ် ညးလ္ၚတ်ဂမၠိုၚ် ဟီုလဝ်ရ။
စပ်ကဵုပေါဲဗ္တိုက် မက္တဵုဒှ်ဒၟံၚ် ပ္ဍဲရခေၚ်ဂှ်တုဲ အိန္ဒိယ ဂွိၚ်ဒၟံၚ်တုဲ သွက်ဂွံဒက်ဒပ် ပ္ဍဲပယျဵုၜါဍုၚ်ဂှ် စဳဇန်ဒၟံၚ်ရ။
ဟိုတ်နူပေါဲဗ္တိုက်ဂမၠိုၚ်တုဲ ကိုန်စဳမာန်ပရေၚ်ပလံၚ်ဗစိုပ်အိန္ဒိယ နွံဒၟံၚ်ပ္ဍဲရခေၚ်တံဂှ်လေဝ် ဟွံချိုတ်ပၠိုတ် ဒှ်ဒၟံၚ်ရ။
နကဵုအလဵုအသဳနျူဒေလဳ ပ္ညဳပ္ညပ်ဒၟံၚ်ကဵု ကံၚ်ဇြဳပၞာန်မွဲဓဝ်ဟွံသေၚ်မွဲသာ် ကဵုအလဵုအသဳညဳသၟဟ်ဂကူ၊ ဂကောံရပ်လွဟ်ကောန်ဍုၚ်အရၚ်တံဂှ်လေဝ် ဒးပ္ညဳပ္ညပ်ထေက်ဂှ် အရာမဖ္တိုက်ဖ္အောဝ်ဒၟံၚ်တံ မံက်တိတ်ဒၟံၚ်ရ။
ကံၚ်ဇြဳပၞာန်ဝွံ နကဵုတၚ်လလောၚ်တြး ကၠောန်ဗဒှ်ပေါဲရုဲမာဲဂှ် စတုဲကလိဂွံဒၟံၚ် အရာမသ္ပစၟတ်သမ္တီ နူကဵုဍုၚ်သ္အာၚ်တံ ညိညဂှ်လေဝ် ဂွံဆဵုကေတ်ရ။
Ref: Times of India