မတ်မလီု၊ အံက်တဝ်ဗာ ၁၃
အပ္ဍဲတွဵုရးဍုၚ်မန် ပ္ဍဲရာသဳဗြဲကျာတၟးဏံ ညံၚ်ဂွံပေၚ်က္ဍတ်ဒၟံၚ်ကဵု ညးအာတရဴ အပ္ဍဲဍုၚ်၊ မ္ၚးဍုၚ်တံဂှ် ကၠောန်အာဏောၚ် ဂလာန်သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်ပ္တိုန်လဝ် ဥူအံၚ်ကျဳတုၚ် ဟီုလဝ်ဂှ် ဟွံစှ်ေကဵုနတဲပုဟ်ဂှ် ညးထ္ၜးဂၠံၚ် ရဲအာတရဴတံ ဟီုရ။
သ္ကိုပ်ဝန်ဇၞော် ဥူအံၚ်ကျဳတုၚ်ဝွံ ခြာဟွံလအ်ဏံ ဒှ်တ္ၚဲကၟာတ်ရုၚ်တ္ၚဲဇမၠိၚ်တုဲ အပ္ဍဲတွဵုရးဂှ် ကၠောန်အာသ္ဘၚ်ကျာ်ညာန်န်ဏောၚ်တုဲ ညးအာတရဴအပ္ဍဲဍုၚ်၊ မ္ၚးဍုၚ်တံ လုပ်စိုပ်ကၠုၚ်ဏောၚ်ဂှ် ဟီုလဝ် ပ္ဍဲကောံဓရီု ကမ္မတဳကမၠောန်အာတရဴ စပ်ကဵုဒေသတွဵုရးဍုၚ်မန် မကၠောန်ဗဒှ်လဝ် ပ္ဍဲရုၚ်အလဵုအသဳတွဵုရးရ။
သ္အာၚ်နူဂှ်ပၠန် အပ္ဍဲတွဵုရးဍုၚ်မန် ညးအာတရဴအပ္ဍဲဍုၚ်၊ မ္ၚးဍုၚ်တံ ကၠုၚ်စိုပ်မ္ဂး ပရေၚ်သြန်ဂေတ်ဂြိပ် အပ္ဍဲဒေသ သာခိုဟ်ကၠုၚ်ဏောၚ်တုဲ ဘဝပရေၚ်ပိုန်ဒြပ်ပရေၚ်မၞိဟ်တံ ဖောအ်ဗြေဝ်တောတက်ကၠုၚ်ဏောၚ်ဂှ်ရ ညံၚ်ဂွံရေၚ်တၠုၚ်ပြုပြေၚ်ကဵု ဒၞါဲဇူဒီု၊ စၞစသုၚ် တိတ်နူဒေသတံ ဒးဒးရးရးဂှ် စၞောန်လဝ်ရ။
ညးထ္ၜးဂၠံၚ်အာတရဴမွဲတၠဂှ်တှ်ေ အာကၠုၚ်တရဴလၟုဟ်ဂှ် ဂၠံၚ်ဟွံၜိုဟ်သြိုဟ်ကီု၊ ပရေၚ်စၟဳတ် ကၟာတ်လဒဵုဂၠိုၚ်ကီု၊ ဂီုကၠီုဟွံမွဲကီု၊ သၞေဟ်ကၚ်ဂၠိုၚ်တုဲ အာတ်မိက်ကၠုၚ်သြန်တံ ဂၠိုၚ်ဂှ်ရ ညးအာတရဴတံ ၜိုတ်ထေၚ်လဝ် ဂွံလုပ်စိုပ်ကၠုၚ် ဟွံမွဲပုဟ်ဂှ် ဟီုရ။
“ညးအာတရဴ အပ္ဍဲဍုၚ်တံဂှ်တှ်ေ ဥပမာ (ဇော်) ၊ (နိုၚ်အောၚ်) တံတှ်ေ ဒးပလံၚ်လၟေၚ်တရဴအပ္ဍဲဍုၚ်မ္ဂး ဒးပလံၚ်ဒၟံၚ် သီုကဵုတၚ်အခက်အခုဲတံဏောၚ်။ ပ္ဍဲကဵုဂၠံၚ်တံဂှ်တှ်ေ ဟွံၜိုဟ်သြိုဟ်ပုဟ်။ နကဵုပရေၚ်စၟဳတ် ပရေၚ်ကၟာတ်လဒဵုတံ ဒှ်ဒၟံၚ်ဗီုပြၚ် ဟွံသၚ်္ကာတံရ။ ပ္ဍဲကဵုဂၠံၚ်ဂှ်လေဝ် သၞေဟ်ကၚ်နွံဟွံအောန်။ တုဲပၠန် ဂီုကၠီုဂှ်လေဝ် ဟွံချိုတ်ပၠိုတ်ပုဟ်။ လှုဲဒးကဵုပ္ဍဲကဵုဂၠံၚ်ဂှ် တၠကွဳစက်ဂှ် ဒးကဵုဟွံအောန်ပုဟ်။ ပ္ဍဲကဵုဂၠံၚ်ဂှ်တှ်ေ အဆံၚ်ဍေံ အဆံၚ်ဍေံ။ ပိုယ်တံတှ်ေ ဒှ်ကလောန်ဂှ် ဟွံထေၚ်ပုဟ်။ ညအ်ဂှ် လညာတ်ရဲနွံဒၟံၚ်သၟဝ်ဏံရ။ ဍေံတံ ဠတီမှတီဏောၚ်။ မၞိဟ်ဒးအာကၠုၚ်မံၚ်ဍာံဍာံ အဲသၟးဟွံသေၚ် ဂိုက်တၞဟ်ဟ်တံလေဝ် သၟာန်စမ်ဂွံမံၚ်ရ။ ဆ္ဂး ဗီုလဵုဟီုဟီုရ ကမ္ပဏဳတံရဂှ် ဒးဒေါအ်အာရလေဝ်” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲအရာအာကၠုၚ်တရဴတံဂှ် ဟိုတ်နူအမိၚ်ကံၚ်ဇြဳပၞာန် တိတ်ဗ္တံဟွံဂွံတံတုဲ တရဴလအ်လတံ နွံတုဲ မွဲဒၞါဲကဵုမွဲဒၞါဲ အာကၠုၚ်တရဴတိက်ဗ္တံမ္ဂးလေဝ် ဟိုတ်နူအခက်အခုဲ ဒးတေၚ်စရၚ်ကၟုဲတံဂှ်တုဲ ညးအာတရဴ ဂွံလုပ်စိုပ်ကၠုၚ် တီတီဂှ် ဒှ်ဟွံမာန်ပုဟ်ဂှ် ညးဆက်ဟီုရ။
ကိုဝ်အေမေန်ထောန် ညးဒုၚ်တာလျိုၚ် ဂကောံဒပ်စဵုဒၞါညးဍုၚ်ကွာန် ခရိုၚ်သဓီု (PDF) ဂှ် ကၠောန်အာညံၚ်ညးအာတရဴ အပ္ဍဲဍုၚ်၊ မ္ၚးဍုၚ်တံ ဂွံပေၚ်ထာတ်ဏောၚ်ဟီုဂှ် ဒှ်မက်ဂၠက်ကဵုကၠုၚ် ညးဍုၚ်ကွာန်တံသၟးရတုဲ ညံၚ်ဂွံစဳဂှ် ကၠောန်မာန်ဟွံသေၚ် ကၠောန်ဗဒှ်သ္ဘၚ်တုဲ အခိၚ်မၞိဟ်ကောံ ပစူမာၚ် ဖံက်ခတိုဟ်သာ်ဏံ ညံၚ်ဂွံညာတ်ကၠုၚ်ဒုဟ် လ္တူဂကောံပၠန်ဂတးတံဂှ် ကၠောန်ကၠုၚ်မာန်ဏောၚ် ဟီုရ။
“နကဵုညးတံ ညံၚ်ဂွံစဳ ကၠောန်အာဏောၚ်ဟီုဂှ် ဒှ်မက်ဂၠက်ကဵုလဝ် ညးဍုၚ်ကွာန်တံရဏောၚ်။ အခိၚ်လၟုဟ် ၜိုတ်ပိုယ်တီဂှ်တှ်ေ စဳဂှ်စဳမံၚ်ရဏောၚ်။ ဆ္ဂး ဒှ်ဒၟံၚ်ဝိုၚ်ဝေၚ်တံသၟး။ ဇၟာပ်ပ်ဒၞါဲ ဝိုၚ်ဝေၚ်တံစဳမံၚ်ဂှ် ဂွံဆဵုကေတ်ရ။ ဍာံဍာံဂှ် သွက်ညးဍုၚ်ကွာန်တံဂှ်လေဝ် မုမှကၠောန်ကဵုဟွံမာန်ဏီပုဟ်။ ရီုဗၚ်ကဵု အခက်အခုဲညးဍုၚ်ကွာန်တံဂှ် မုမှဟွံဂွံဆဵုကေတ်ဏီပုဟ်။ ဍာံဍာံဂှ်တှ်ေ ဍေံတံကၠောန်ပေါဲသ္ဘၚ်ဏောၚ်။ ကၠောန်တုဲတှ်ေ မၞိဟ်ကၠုၚ်ဂၠိုၚ်ဏောၚ်။ ဒှ်ကၠုၚ်သာ်ဏံမ္ဂး အခိၚ်ဏံ ဍေံတံဖံက်ခတိုဟ်မာၚ်တံ ကၠောန်ကၠုၚ်ဏောၚ်။ ဗီုဏံ ကၠောန်ကၠုၚ်လေပ်။ တုဲပၠန် ညံၚ်ကဵုဂကောံပၠန်ဂတးတံကၠောန်လဝ်ဂှ် ဖန်ဗဒှ်ဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် နကဵုညးဍုၚ်ကွာန်တံ ပ္ဍဲကဵုပေါဲသ္ဘၚ် ကံၚ်ဇြဳပၞာန် ကၠောန်ဗဒှ်အာတံဂှ် စွံသတိတုဲ အာကၠုၚ်အိုတ်ဂှ်ကီု ၜိုတ်သ္ပမာန် သွက်ဂွံဝေၚ်ပါဲ ပေါဲသ္ဘၚ်ကံၚ်ဇြဳပၞာန်တံဂှ်လေဝ် ညးဖ္တိုက်ဖ္အောဝ်လဝ်ရ။
မွဲလ္ပာ်ဂှ်ပၠန် သ္ကိုပ်ဝန်ဇၞော် ဥူအံၚ်ကျဳတုၚ် ကံၚ်ဇြဳပၞာန်ခါန်ကၞက်ပ္တိုန်လဝ်ဂှ်လေဝ် အခိၚ်ရာသဳဗြဲကျာတၟးစဏံ အခိၚ်ဝှ်ဏံ ပ္ဍဲကဵုပွိုၚ်ဍုၚ်ဇြပ်ဗု၊ ဍုၚ်ကျာ်ခမဳ သ္ဘၚ်ကျာ်ခမဳဂှ်ကဵု ပ္ဍဲပွိုၚ်ဍုၚ်ကျာ်ထဝ် ပ္ဍဲကဵုကျာ်ဣသိယဵု ပ္ဍဲကဵုသ္ဘၚ်ကျာ်တံဂှ် ညံၚ်ဂွံစဳ ကၠောန်အာဏောၚ် သ္ဂးလဝ်ရ။
ပ္ဍဲတွဵုရးဍုၚ်မန် ညံၚ်ဂွံပေၚ်က္ဍတ်ဒၟံၚ်ကဵု ညးအာတရဴအပ္ဍဲဍုၚ်၊ မ္ၚးဍုၚ်တံဂှ် ကၠောန်အာဏောၚ် ကံၚ်ဇြဳပၞာန် ဟီုဂးဒၟံၚ်ကီုလေဝ် ပ္ဍဲကဵုပွိုၚ်ဍုၚ်ကျာ်ထဝ်၊ ပွိုၚ်ဍုၚ်ၜဳကလေၚ်၊ ပွိုၚ်ဍုၚ်သဓီု၊ ပွိုၚ်ဍုၚ်ဇြပ်ဗု ကေုာံ ပ္ဍဲကဵုပွိုၚ်ဍုၚ်ရေဝ်တံဂှ် မွဲဏှမွဲဏှ ပရေၚ်ပန်ပှော်ၜါလ္ပာ်တံ က္တဵုဒှ်ဒၟံၚ်ဖိုဟ်ရ။
ပရိုၚ်−သြၚ်လောန်တိုၚ်(မ်)
ဗီု−CJ