မတ်မလီု၊ အံက်တဝ်ဗာ ၁၇
ကံၚ်ဇြဳပၞာန် ကျဒၟံၚ်ဇၟာပ်ပေါဲဗ္တိုက် အလုံဍုၚ်မွဲဂှ်ဝွံ ပ္ဍဲကဵုတွဵုရးဍုၚ်မန် ညးတံထိၚ်ဒက်လဝ်ဂှ် ထပ်ကော်ဒၟံၚ် တန်ဗ္တောန်ကွတ်ပၞာန် လၟေၚ် ၆ ရောၚ် ဂွံတီကေတ် အတိုၚ်တၚ်လလောၚ်တြး ကံၚ်ဇြဳပၞာန်ရ။
ညးဒးဒုၚ်ကော်ပကောံ သွက်တန်ဗ္တောန်ကွတ်ပၞာန် လၟေၚ် ၆ ဂှ် ပ္ဍဲဂိတုအံက်တဝ်ဗာ ၁၆ တေံ သ္ကိုပ်ဝန်ဇၞော် တွဵုရးဍုၚ်မန် ကံၚ်ဇြဳပၞာန်ခါန်ကၞက်လဝ် ဥူအံၚ်ကျဳတုၚ်ဂှ် အာစိုပ်ဆဵုဂဗလဝ် ပ္ဍဲဘာပရေၚ်ပညာ စၟတ် ၆ ပ္ဍဲဌာန်ဂအုပ်ပၞာန်ရးအဂၞဲတုဲ ကဵုလဝ်သြန်ထံက်ပၚ်ရ။
လၟိဟ်ကောန်တန်ဗ္တောန် တိုန်စိုပ်အာ ပ္ဍဲတန်ဗ္တောန်ကွတ်ပၞာန် လၟေၚ် ၆ ဂှ် လ္ပာ်ကံၚ်ဇြဳပၞာန် လလောၚ်ပ္တိတ်လဝ် ဗွဲမလုပ်သၞောဝ်ဟွံမွဲကီုလေဝ် အတိုၚ်စၟတ်သမ္တီဗီုဓာတ်တံဂှ်မ္ဂး ညးဒးဒုၚ်ပကောံပကောန်ပၞာန် ၁၀၀ ပြၚ် နွံမာန်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ်တှ်ေ ကော်ကၠုၚ်ဒၟံၚ် တန်ဗ္တောန်ကွတ်ပၞာန်တံ အဆက်က်ဂှ်ဝွံ သွက်ဂွံစဵုဒၞါဖဵုဂုန် က္ဍိုပ်သ္ကိုပ်လ္ပာ်ကံၚ်ဇြဳပၞာန်တံ ကေုာံ သွက်ဂွံထ္ပက်အဇာ ပ္ဍဲကဵုဒၞါဲကောန်ပၞာန် ဒးပြဟ်လလုဲအာ ပ္ဍဲကဵုဗလးပၞာန်တံဂှ်ရောၚ် ဟီုရ။
“သွက်ဂွံစဵုဒၞါ ဖဵုဂုန် ရဲလ္ပာ်က္ဍိုပ်သ္ကိုပ် ကံၚ်ဇြဳပၞာန်တံ တုဲပၠန် ပ္ဍဲကဵုမုက်ပၞာန်ဗလးတိ ဒၞါဲကောန်ပၞာန်ဒးပြဟ်လလုဲဒၟံၚ် ကဵုဂအုံဗွဝ်ဂှ် သွက်ဂွံကလေၚ်ဗပေၚ်ဇြဟတ်တုဲ စၞောန်ပျးလဝ် နကဵုသၞောဝ်ဒးလုပ်ပၞာန်ဏံတုဲ ကော်ပၠောပ်ဒၟံၚ်ညးသၟတ်တံ ကံၚ်ဇြဳပၞာန်ဂှ်တှ်ေ ဓရိုဟ်ပလံၚ်ဒၟံၚ် ညးဍုၚ်ကွာန်တံ ပ္ဍဲကဵုအကာဲအရာ အာလေဝ်ဟွံဂွံ ဆုတ်ကလေၚ်လေဝ်ဟွံဂွံတံဂှ်ရောၚ် အဲညာတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ဟိုတ်နူကံၚ်ဇြဳပၞာန် ကော်ကၠုၚ်ဗွဲအနိၚ်အပိုၚ်တုဲ နကဵုညးဒးတိုန်စိုပ်တန်ဗ္တောန်ကွတ်ပၞာန်ဂမၠိုၚ် ဂွံအခေါၚ်အရာတှ်ေ သွက်ဂွံကၠုၚ်စိုပ် ပံၚ်တောဲကဵု ဂကောံပၠန်ဂတးတံဂှ် ညးဖ္တိုက်ဖ္အောဝ်လဝ်ရ။
အပ္ဍဲဒေသဂှ်တှ်ေ သွက်ဂွံယိုက်လျိုၚ်ပၞာန်ဂးတုဲ ကၠာတေံ ကဵုကောန်ကလောန်ဆုဲပြံၚ်တံ မၞိဟ်မွဲတၠ နူ ၃၀ ကိုဋ် စဵုကဵု ၅၀ ကိုဋ်တံဂှ်တုဲ လှာဲမၞိဟ်တုဲ ကဵုလုပ်လဝ်ပၞာန်တုဲ အခိၚ်လၟုဟ်ဂှ် ပ္ဍဲဗလးမုက်ပၞာန်တေံ ချိုတ်ဂၠိုၚ်ကၠုၚ်တုဲ မၞိဟ်ဗက်လိၚ်စတံ အောန်ကၠုၚ်ရ။
ရဲလိၚ်လုပ်ကဵုပၞာန်စၞးတံ အောန်ကၠုၚ်တုဲ သ္ကိုပ်အုပ်ဓုပ်ကွာန်၊ အရာပ် ကံၚ်ဇြဳပၞာန်ခါန်ကၞက်လဝ်တံဝွံ ကော်ကေတ်ညးသၟတ် မၞုံအပ္ဍဲအရာပ်တံဂှ်တုဲ ဂီုကၠီုဟွံမွဲ ဒှ်ကၠုၚ်ဂှ် သၟတ်ဒေသတံ ဟီုရ။
အတိုၚ်တၚ်နၚ်သြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး တန်ဗ္တောန်ကွတ်ပၞာန် နူလၟေၚ် (၁) စဵုကဵု လၟေၚ် (၆) ဂှ် ပ္ဍဲတွဵုရးဍုၚ်မန် မၞိဟ်ဒးဒုၚ်ကော်ပကောန်ပၞာန်တံ နွံကၠုၚ်လဝ် စဵုကဵု ၁၂၀၀ ပြၚ်ရ။
ညးဒးဒုၚ်ပကောံပကောန်ပၞာန်တံဂှ် ဖျေံကဵုဒၟံၚ်တန်ဗ္တောန် ပ္ဍဲကဵုဘာတန်ဗ္တောန်ဒပ်ပၞာန်ကဆံၚ်သၠုၚ် စၟတ် ၄ ဖျေံသ္ဇိုၚ်ကွာန်ဝါကလိ ပွိုၚ်ဍုၚ်ဇြပ်ဗုကဵု ပ္ဍဲကဵုဘာတန်ဗ္တောန် ပ္ကတ်ပ္ကေၚ်ကွတ်ပၞာန်သ္ဇိုၚ် စၟတ် ၉ ဖျေံသ္ဇိုၚ်ပွိုၚ်ဍုၚ်သဓီုတံရ။
ပရိုၚ်−သြၚ်လောန်တိုၚ်(မ်)
ဗီု−MOI