နျူယျံက်၊ အံက်တဝ်ဗာ ၁၇
ပ္ဍဲကဵုပဋိပက္ခ ဒေသသ္ကုတ်ဗၟံက်လဒေါဝ် အသိၚ်သ္ကာတ်ကၠုၚ်ဒၟံၚ်ဂှ် ဍုၚ်ယဳမေန် ဒးဒုၚ်ဓဇက်ပၠောပ်မာန်တုဲ ဒဵုကဵုထိၚ်ဒက်ဟွံမာန် ဒှ်ကၠုၚ်မာန်ရောၚ် ညးစၞးတၟေၚ် ကုလသမဂ္ဂ စပ်ကဵုဍုၚ်ယဳမေန် ပ္ဍဲကဵုဒေသအာရာပ် ဍုၚ်ဝါတ်အိုတ်ဂှ် ကဵုသတိ ဟီုလဝ် ပ္ဍဲဂိတုအံက်တဝ်ဗာ ၁၅ တေံရ။
သ္ဇက်ဒးအောန်စိုတ်မွဲဂှ်တှ်ေ ဍုၚ်ယဳမေန်ဝွံ ပ္ဍဲကဵုပရေၚ်အသိၚ်သ္ကာတ်ကၠုၚ်မံၚ်ဏံဂှ် ပါလုပ်ဒၟံၚ်မွဲဒကုတ်မွဲဒကဴကီုရောၚ် ညးစၞးတၟေၚ် ဟာန်ဂျဳရောန်ဗက် ဟီုလဝ် ဇရေၚ်ကံၚ်ဇြဳပရေၚ်ဂီုကၠီုတုဲ ဂကောံရပ်လွဟ်ယဳမေန် ဟူတဳဂှ်တှ်ေ ဟိုတ်နူဗ္တိုက်ဒၟံၚ်ဂၠံၚ်တရဴက္ၜၚ်ဍုၚ်နာနာတံ ဂၠိုၚ်ၚ်ကဵုဝါဂှ်ရ ပ္ဍဲၜဳဗ္ကေတ် ဘဲအန္တရာယ် စပ်ကဵုပရေၚ်ပွဳပွူသဘာဝမွဲ ဂွံက္တဵုဒှ်ကၠုၚ် ဒှ်ဂၠိုၚ်ဂှ် ကဵုသတိ ဟီုလဝ်ရ။
နကဵုဂကောံဟူတဳ အဳရာန်ထံက်ပၚ်ကဵုလဝ်ဂှ် သွက်ဂွံဒေါအ်ကဵု ပြဝဗ္တိုက်ဒၟံၚ်တရဴက္ၜၚ်ဍုၚ်နာနာတံဂှ် ညးစၞးတၟေၚ်ကုလ ဂျဳရောန်ဗက် ကေုာံ ဇၞော်သ္ကိုပ်ပရေၚ်ဗ္စာရဏာမၞိဟ် ဂျိုၚ်သဳ အာမ်သူယာတံ သီုၜါတၠ ဖ္တိုက်ဖ္အောဝ်လဝ်ရ။
ဂကောံဟာမာသ် နွံပ္ဍဲကဵုဂါဇြာ အဳရာန်ထံက်ပၚ်ကဵုလဝ်ဂှ်တှ်ေ ဟိုတ်နူလုပ်စိုပ်ဗ္တိုက်လဝ် အေဿရေတုဲ စနူပေါဲပၞာန်ဂါဇြာက္တဵုဒှ်တုဲဂှ် ဂကောံဟူသဳ နဒဒှ်ထံက်ဂလာန် ဟာမာသ်တုဲ ဗ္တိုက်ဒၟံၚ်က္ၜၚ်တတ်ကၠောံ ၜဳဗ္ကေတ်ဂှ်ရ။
နူဂိတုဂျောန်တုဲကၠုၚ်တေံရ သၞာဲဒဴကုလ၊ သၞာဲဒဴနူကဵုဂကောံအလဵုအသဳဟွံသေၚ်တံ ကေုာံ ကောန်ဂကောံမှာဇန်တံ နူကဵုဂကောံဟူတဳ မရပ်ဒက်လဝ်တံဂှ် သွက်ဂွံကလေၚ်ဗလးကဵုဂှ် သၞာဲဒဴဂမၠိုၚ် အာတ်မိက်လဝ်ရ။
ဂကောံဟူတဳဂှ်တှ်ေ စောဲစပ်လဝ် ညးကၠတ်ထံၚ်ပရိုၚ် အမေရိကာန်−အေဿရေတုဲ ရပ်ဒက်လဝ် သၟာကမၠောန်တံဏံ မဒှ်ရ။
အပ္ဍဲသၞာံ ၂၀၁၄ တေံ ဂကောံဟူတဳ ထိၚ်ဒက်လဝ် ဍုၚ်ဇၞော် သာနာကဵု သ္ကုတ်သၟဝ်ကျာ ဍုၚ်ယဳမေန်ဂှ်တုဲ အကြာအလဵုအသဳ နူကဵုဍုၚ်သ္အာၚ်တံသ္ပလဝ်စၟတ်သမ္တီ ဂကောံပံၚ်ကောံသၟဝ်သ္ကိုပ်သ္က ဇြဝ်ဒဳ ထံက်ဂလာန်ဂှ်ကဵု ဂကောံဟူတဳတံဂှ် ပၞာန်အပ္ဍဲဍုၚ် က္တဵုဒှ်ဒၟံၚ်ရ။
ကောန်ဍုၚ်ယဳမေန်ဂမၠိုၚ်ဝွံ နွံပၟိက်ဒၟံၚ်ကဵု ပရေၚ်ၜိုဟ်လလမ်ကီုလေဝ် ဟိုတ်နူအသိၚ်ပေါဲပၞာန် ဒေသသ္ကုတ်ဗၟံက်လဒေါဝ်တံ အသိၚ်သ္ကာတ်ကၠုၚ်ဂှ်တုဲ အရာမပ္တိတ်ဇြဟတ် ဂွံဖအိုတ်ကၠေံ ပဋိပက္ခတံ အကာဲအရာဂွံတောတက်ကၠုၚ် တၚ်စၟဳတံဏံဂှ်လေဝ် သ္ၚောဲဒၟံၚ်ဏီရောၚ် ညးစၞးတၟေၚ် ဂျဳရောန်ဗက် ဟီုလဝ်ကဵု ကောန်ဂကောံကံၚ်ဇြဳဂီုကၠီုရ။
ဂကောံဟူတဳဂှ်တှ်ေ ပ္ဍဲၜဳဗ္ကေတ်ဂှ် ဗ္တိုက်လဝ် က္ၜၚ်ဖ္ဍိုက်ဗၞိက် ၈၀ ဖ္ဍိုက် နကဵုဒရုၚ်၊ နကဵုကမ်လှောဝ်တံဂှ်တုဲ ဂကောံပံၚ်ကောံ သၟဝ်သ္ကိုပ်သ္ကအမေရိကာန်ဂှ်တှ်ေ ဗ္တိုက်ဒၟံၚ် ပွန်ဂကောံဟူတဳ ပ္ဍဲဍုၚ်ယဳမေန်တံရ။
ပ္ဍဲကဵုယဳမေန် ဗွဲတၟေၚ် ပ္ဍဲကဵုဒေသဂကောံဟူတဳ ထိၚ်ဒက်လဝ်ဂှ် ဇွောံမစၞစ ဟွံရုမ်ဂပ်ဒှ်ဒၟံၚ်တုဲ သြန်ဗွဝ် ကုလသမဂ္ဂ အာတ်မိက်လဝ်ဂှ်လေဝ် ကလိဂွံလဝ် ၄၁ တၟံကၠံညိကီုဂှ်ရ ယဝ်ရဟွံဂွံသြန်ဗွဝ်ရပုဟ်ဟီုမ္ဂး သၞာံဏံ အပ္ဍဲပွိုၚ်ပိဂိတု လက္ကရဴအိုတ်ဏံ ညးဍုၚ်ကွာန်ယဳမေန်တံ ဒးဂဗကဵု ဘဲကၞောဝ်ကၠောဝ်ဗျဵုမာန်ဏောၚ် သ္ဂးရ။
ပ္ဍဲကဵုပေါဲပၞာန် ဒေသသ္ကုတ်ဗၟံက်လဒေါဝ်ဂှ် ဍုၚ်တၞဟ်ဟ်တံလေဝ် ပါလုပ်ကၠုၚ်တုဲ ပေါဲပၞာန်သာဇၞော်ပၟဝ်ကၠုၚ်မ္ဂး ကိုပ်ကၠာအိုတ် ညးဗြဴ ကောန်ၚာ်သၟတ် ညးအာယုက်ဇၞော်ဇၞော်တံ ဒးဆောံလေၚ်လမျီုဏောၚ်တုဲ ပရေၚ်ပိုန်ဒြပ်ဂၠးကဝ် ဇီုကပိုက်ဒး တၟာဂလိုၚ်ဏောၚ်ဂှ်လေဝ် ညးတာလျိုၚ်ဂမၠိုၚ် ကဵုလဝ်သတိရ။
Ref: AP