ဂိတုဂဏံ က္ဍိုပ်သ္ကိုပ်ပၞာန် အာဍုၚ်ကြုက်ဏောၚ်

နေဗျဳဒဝ်၊ အံက်တဝ်ဗာ ၁၈

ဂိတုဂတဏံ က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ်ဝွံ ဒဒှ်ရအာစိုပ် ဍုၚ်ကြုက် မဟာမိတ်ညးဒဒှ်ေဒယှ်ဂှ်ဏောၚ်ဂှ် တမ်ရိုဟ်ပရိုၚ်ၜါတၠ မစုက်လုက်ကဵု ဒပ်ပၞာန် ဟီုကၠုၚ်လဝ်ကဵု ဌာန်ပရိုၚ်အေအေပ်ပဳ ပ္ဍဲဂိတုအံက်တဝ်ဗာ ၁၆ ရ။

ပ္ဍဲဂိတုနဝ်ဝေမ်ဗာဏံ ဒဒှ်ရက္ဍိုပ်သ္ကိုပ်ပၞာန် စဳဇန်လဝ် သွက်ဂွံအာဍုၚ်ကြုက်ဂှ်ကီု၊ လၟေၚ်တရဴဏံဂှ် နူစလၟေၚ်တရဴဝန်ဇၞော်ကာဍုၚ်သ္အာၚ်ကြုက် ဝါန်ယိ ကၠုၚ်စိုပ်ဍုၚ်ဗၟာတေံရ စဳဇန်လဝ်ဂှ် တမ်ရိုဟ်ပရိုၚ် မစုက်လုက်ကဵုဒပ်ပၞာန် မွဲဂှ် ဟီုရ။

က္ဍိုပ်သ္ကိုပ်ပၞာန်ဝွံ ဂိတုဂတဏံ ဒဒှ်ရအာဍုၚ်ကြုက်ဏောၚ်ဂှ် တမ်ရိုဟ်ပရိုၚ်မွဲပၠန်ဂှ် ဟီုလဝ်ရ။ ညးကဵုပရိုၚ်သီုၜါတၠဏံဂှ်တှ်ေ အာတ်မိက်လဝ် ညံၚ်ဟွံဂွံထ္မံက်ယၟု ပ္ဍဲမဳဒဳယျာတံရ။

စပ်ကဵုကိစ္စဏံတုဲ သွက်ဂွံကဵုတၚ်စၟတ်ဂှ် ဌာန်ပရိုၚ်အေအေပ်ပဳ ဆက်စၠောံလဝ် ရုၚ်ကလုတ်ကြုက်ဍုၚ်လ္ဂုၚ်ရောၚ် သ္ဂးရ။

သၞာံ ၂၀၂၁ ကြဴနူသီအဝဵုတုဲ အလုံဍုၚ်မွဲ ကံၚ်ဇြဳပၞာန် ဗ္တိုက်ဒၟံၚ်ကဵု ဒပ်ပၠန်ဂတးတံဂှ် အခိၚ်ဍုၚ်သ္အာၚ်တံ ကေတ်အရေဝ် ကၟာတ်လဒဵုဒၟံၚ်ဂှ် ကြုက်ဝွံ ဒှ်မဟာမိတ်ကံၚ်ဇြဳပၞာန် အဓိက၊ ဒှ်ဍုၚ်ထံက်ပၚ်ကဵုဒၟံၚ် လွဟ်လက်နက်ရ။

အလဵုအသဳကြုက်ဝွံ ကဵုဂကောံရပ်လွဟ်ကောန်ဍုၚ်အရၚ် သီဂွံလဝ် တိဍာ် ပ္ဍဲပယျဵုကြုက်−ဗၟာဂှ်လေဝ် ထိၚ်ဒဝ်လဝ် ပရေၚ်ဆက်ဆောံတံဂှ် ညးလ္ၚတ်ဂမၠိုၚ် ဟီုရ။

ပ္ဍဲကဵုဂကောံပၠန်ဂတးဂမၠိုၚ် လ္ၚဵုတံဂှ်တှ်ေ ပ္ဍဲရးသေံသၟဝ်ကျာတေံ ဟိုတ်နူသီလဝ် တိဍာ်နူကံၚ်ဇြဳပၞာန်တုဲ နူကဵုမွဲဒမြိပ်ဂၠံၚ်ဇၞော် ပရေၚ်သွံရာန်ဗၞိက်ပၟိက်ဇၞော် မဆက်စၠောံလဝ်ကဵု ဍုၚ်ကြုက်ဂှ် ဒှ်ဒၟံၚ်အရာပလာပ်ပထုဲ သွက်ကွဳစက်ယာန်ဂမၠိုၚ် ဂွံအာကၠုၚ်တံဂှ်ရ။

တွဵုရးသေံဝွံ ဆက်စပ်ဒၟံၚ်ကဵု ဍုၚ်ကြုက် တွဵုရးယူနာန်တုဲ ပါလုပ်ဒၟံၚ် ပ္ဍဲကဵုကိုန်စဳမာန်ဗေကျေန် ပွဳဗွိုၚ်မွဲ ဂၠံၚ်မွဲ ၚုဟ်မးမၞုံကဵုထရဳလဳယာန်ဂှ်ရ။

စပ်ကဵုကံၚ်ဇြဳပၞာန် တာလျိုၚ်ဟွံပြေ သွက်ဂွံဗ္တိုက်သ္အး ဂိုန်မၞိဟ်လီဠာန် လ္တူအောန်လာၚ် နွံပယျဵုဍုၚ်ဗၟာ စွံပွန်ကဵု ကောန်ဍုၚ်ကြုက်တံဂှ်တုဲ ပ္ဍဲသၞာံတုဲကၠုၚ်တေံ ပရေၚ်ဆက်ဆောံ ဗေကျေန်ကဵု နေဗျဳဒဝ် ကလေၚ်ၜိုဟ်ဂံက်အာ ဒှ်လဝ်ရ။

ပ္ဍဲကဵုဂိုန်မၞိဟ်လီဠာန်တံဏံဂှ် ခါန်ကၞက်ပ္တိုန်လဝ် ကောန်ဍုၚ်ကြုက်တံကဵု ကောန်ဍုၚ်သ္အာၚ် ဒးဒုၚ်ကူသွံစလဝ်တံ နဒဒှ်ညးယိုက်ဝန်တုဲ သွာၚ်ကမၠောန်ဏံဝွံ ၚုဟ်မးမၞုံ ကဵုဗဳလျာန် ဒဝ်ဠာဏောၚ်ဂှ် ညးလ္ၚတ်ဂမၠိုၚ် ဟီုရ။

ဗွဲကြဴဏံ ပၞာန်ထ္ပက် ဂကောံမဟာမိတ်ကောဒေံပိဂကောံ အလုံတွဵုရးသေံဂှ် ကြုက် ထ္ၜးလဝ်ကဵုဂၠံၚ်ရောၚ် ညးလ္ၚတ်ဂမၠိုၚ် ဟီုရ။

ကံၚ်ဇြဳပၞာန် ကၠောန်ဗဒှ်ပေါဲရုဲမာဲတုဲ အစဳဇန်ကၠောန်အာ ပရေၚ်ပြံၚ်လှာဲလွေဟ်ဒဳမဝ်ကရေဇြဳဂှ် ဒဒှ်ရထံက်ဂလာန်ဂှ် ပ္ဍဲဂိတုအဝ်ဂါတ်တေံ ဝန်ဇၞော်ကာဍုၚ်သ္အာၚ်ကြုက် ဟီုလဝ်ရ။

ဗော်ဒစဵုဒစးဗွဲမဂၠိုၚ် ဒးဒုၚ်ကၟာတ်လဒဵုလဝ်တုဲ အလုံဍုၚ်မွဲ အခိၚ်ပေါဲဗ္တိုက်ဒှ်ဒၟံၚ်ဂှ် ပေါဲရုဲမာဲဗၠးၜးဗဗွဲဓဝ်မွဲ ဒှ်ဟွံမာန်ပုဟ်ဂှ် ဂကောံဇြဟတ်ပၠန်ဂတးတံ ဟီုလဝ်ရ။

က္ဍိုပ်သ္ကိုပ်ပၞာန် မေန်အံၚ်လှာၚ်ဝွံ ကြဴနူသီအဝဵုတုဲ အာစိုပ်လဝ် ဍုၚ်ရုယှာ မဒှ်မဟာမိတ်မွဲပၠန် မထံက်ပၚ်ကဵုဒၟံၚ်လွဟ်လက်နက်ဂှ် ဂၠိုၚ်ၚ်ကဵုဝါကီုလေဝ် စိုပ်သၞာံ ၂၀၂၂ မှ ကလိဂွံလဝ်အခေါၚ်ဆဵုဂဗ ကုသမ္မတဗလာဒဳမာ ပူတေန်ရ။

Ref: AFP