ကျာ်ပိ၊ အံက်တဝ်ဗာ ၁၈
တမ်ဒပ်လၟိဟ် (၅) ကေုာံ ပွိုၚ်ဍုၚ်ကျာ်ပိ အလုံမွဲဒေသ သ္ဂောံအာပံၚ်ကဵု ဂကောံ NMSP AD ဂှ် ကဆံၚ်လ္တူၜါလ္ပာ် ဂွံသဳကၠဳတုပ်လဝ်စိုတ် ဟွံမွဲပုဟ်ဂှ် ဗော်ဍုၚ်မန်တၟိ ဌာန်ဂအုပ်ဗဟဵု ဟီုရ။
ကောန်ဒပ် နူကဵုတမ်ဒပ်လၟိဟ် ၅ ကေုာံ ဗ္ဒိုပ်မဆက်စပ်သီုဖအိုတ် နူကဵုဒပ်ပၞာန်ဗၠးၜးကောန်ဂကူမန် ဗော်ဍုၚ်မန်တၟိဂှ် အာပံၚ်လဝ် ကုဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ရ။
စပ်ကဵုပရူဏံတုဲ လ္ပာ်ဌာန်ဂအုပ်ဗဟဵု ဗော်ဍုၚ်မန်တၟိဂှ် သ္ကိုပ်ဒပ်၊ ကောန်ဒပ် တံဒပ်လၟိဟ် (၅) သီုဖအိုတ် ညံၚ်ဂွံကလေၚ်စဴဗော်ဂှ် ပ္ဍဲဂိတုအံက်တဝ်ဗာ ၁၇ ဏံမှ ပ္တိတ်အမိၚ် ဖ္တိုက်ဖ္အောဝ်ကၠုၚ်ရ။
အတိုၚ်လိက်ပလံၚ်ဗစိုပ်လဝ် ဇရေၚ်ဗော်ဍုၚ်မန်တၟိ ဌာန်ဂအုပ်ဗဟဵု၊ ဌာန်ဂအုပ်ပၞာန်ဗဟဵု နကဵုစၟတ်တ္ၚဲ ဂိတုအံက်တဝ်ဗာ ၅ ဂှ်မ္ဂး သ္ကိုပ်ဒပ် ကောန်ဒပ် နူကဵုတမ်ဒပ်လၟိဟ် ၅ သီုဖအိုတ်တံ သဳကၠဳဖျေံသ္ဂုတ်သွာတ်တုဲ လုပ်ပံၚ်အာကဵု ဂကောံပါ်တိတ် NMSP AD တံဂှ်ဝွံ ဒဒှ်ဟွံဍာံစၟတ်ရောၚ် လ္ပာ်ဗဟဵု သ္ဂးရ။
ဟိုတ်ဂှ်ရ စပ်ကဵုပရေၚ် တမ်ဒပ်လၟိဟ် ၅ ဂှ်တုဲ သ္ဂောံအာပံၚ်ကဵုဂကောံပါ်တိတ် NMSP AD ဂှ် ညးတာလျိုၚ်လ္ပာ်ဗဟဵု လ္ပာ် AD ကဆံၚ်လ္တူၜါလ္ပာ် ဂွံသဳကၠဳတုပ်လဝ်စိုတ်ဟွံမွဲပုဟ်ဂှ် သောၚ်ကလးကၠုၚ်ရ။
ကောန်ဗော်၊ ရဲဗော်၊ ရဲဒပ် နူဘုံလ္တူ ဒဵုစိုပ်သၟဝ် ယြဴပူဂဵုလဵုမွဲဟွံဟီု အတိုၚ်ပၟိက်ဆန္ဒမၞုံ အာတ်အခေါၚ်ဒေါအ်ဇူ နုက်တိတ်နူဗော် ကလိဂွံအခေါၚ်တုဲ ဒၞါဲညးနွံပၟိက် ညးအာမာန်ရောၚ် ဗော်ဍုၚ်မန်တၟိ ဟီုရ။
မွဲလ္ပာ်ဂှ်ပၠန် နကဵုကောန်ဗော်၊ ရဲဗော်၊ သ္ကိုပ်ဒပ်၊ ကောန်ဒပ်ဂမၠိုၚ် ယဵုဒုၚ်ကေတ်အသံစၞောန်ဗဟဵုတုဲ မၚ်မွဲအာသစ္စအဓိဌာန် ၅ တၚ် ဗွဲမဗိုန်ဗတ်တုဲ သွက်ဂွံကလေၚ်စဴကၠုၚ်ဗော် သီုညးဖအိုတ်ဂှ် ဗော်ဍုၚ်မန်တၟိ ကမ္မတဳကေၚ်ကာဗဟဵု ဖ္တိုက်ဖ္အောဝ်ကဵုလဝ်သမ္တီရ။
ဗော်ဍုၚ်မန်တၟိဝွံ ဒှ်ဂကောံရပ်လွဟ်ကောန်ဍုၚ်အရၚ်ဝှ်ကြံၚ် ထ္ပက်လဝ်စၟတ်တဲ ပ္ဍဲလိက်ကသုက်ဒေါအ်ပန်ပှော် NCA မွဲတုဲ အပ္ဍဲပရေၚ်ပၞာန်သီအဝဵုဏံ ဆဵုဂဗသဳကၠဳဒၟံၚ် ကုကံၚ်ဇြဳပၞာန်ရ။
ပရိုၚ်−သြၚ်လောန်တိုၚ်(မ်)
ဗီု−NMSP AD