ဟာရေတ်ဗက်၊ အံက်တဝ်ဗာ ၂၂
သတ္တာဟတုဲကၠုၚ်တေံ ပ္ဍဲကဵုပေါဲထံက်ဂလာန်ညးဍုၚ်ကွာန် လ္ပာ်ဒဝ်နေဝ်ထြာပ်မွဲဂှ် စဵုကဵုတ္ၚဲကၠောန်ဗဒှ်ပေါဲရုဲမာဲတေံ မွဲတ္ၚဲ ကဵုအာဒဝ်ဠာ ၁ ပြကောဋိကိုဋ်ဏောၚ် ဂလာန်သေဌဳဇၞော် ဗဳလျာန်နာ အဳလောန်မက် ကဵုကတိပါၚ် ဟီုလဝ်ဂှ် ဌာနကောပ်ကာဲသၞောဝ်တံ သွက်ဂွံဂၠိုက်ဂၠါဲစၟဳတ်ကဵုဂှ် သ္ကိုပ်အုပ်ဓုပ်ဒဳမဝ်ကရေတ် တွဵုရးပါန်သေဝ်ဗေနဳယျာ ဂျတ်ယှက်ပဳရိုဝ် အာတ်မိက်လဝ် ပ္ဍဲဂိတုအံက်တဝ်ဗာ ၂၀ တေံရ။
ဂကောံရေၚ်တၠုၚ်ကေၚ်ကာပရေၚ်ဍုၚ်ကွာန် America PAC သဳအဳအိုဝ် Tesla အဳလောန်မက် ဒက်ပ္တန်လဝ် သွက်ဂွံထံက်ဂလာန် အလံၚ်ညးစၞး ဗော်ရဳပါပလေတ်ကာန် ဒဝ်နေဝ်ထြာပ် ပ္ဍဲဂိတုနဝ်ဝေမ်ဗာ ၅ ပ္ဍဲပေါဲရုဲမာဲသမ္မတတေံဂှ် အပ္ဍဲကဵုကောံဓရီုညးဍုၚ်ကွာန် မကၠောန်ဗဒှ်လဝ် ပ္ဍဲတွဵုရးပါန်သေဝ်ဗေနဳယျာ ဍုၚ်ဟာရေတ်ဗက်ဂှ် ညးမတိုန်စိုပ်ကၠုၚ်မွဲတၠဂှ် အဳလောန်မက် ကဵုလဝ်စၟတ်တဲချက်မွဲတၞး ၚုဟ်မးမၞုံ ဒဝ်ဠာ ၁ ပြကောဋိကိုဋ်ရ။
ပ္ဍဲကဵုတွဵုရးပါန်သေဝ်ဗေနဳယျာ သီုၜါဗော် ဂွံဇၞးကေတ်မာန် ကဆံၚ်တုပ်ဒၟံၚ်ဂှ် ညးကဵုမာဲ ပ္တိုန်လဝ်စရၚ်တံဂှ် အရိုဟ်တ္ၚဲ ကဵုအာမၞိဟ်မွဲ ဒဝ်ဠာ ၁ ပြကောဋိကိုဋ်ဏောၚ် ဂလာန်အဳလောန်မက်ဂှ်ဝွံ ဒှ်အရာသ္ဇက်ဒးဂွိၚ်တုဲ ဌာနကောပ်ကာဲသၞောဝ်တံ ထေက်ကဵုဒးဂၠိုက်ဂၠါဲစၟဳတ်ရောၚ် သ္ကိုပ်အုပ်ဓုပ် ယှက်ပဳရိုဝ် ဟီုရ။
ဂလာန်ဂတိပါၚ် အဳလောန်မက်ဝွံ သွက်ဂွံဓလီုသြဇာ လ္တူပေါဲရုဲမာဲသမ္မတ အကြာထြာပ်ကဵု ဒုသမ္မတ ကာမဴလာ ဟာရေတ် ဗော်ဒဳမဝ်ကရေတ်တံ မပြိုၚ်ပ္ကာန်အာတံဂှ်တုဲ သုၚ်စောဲဇြဟတ်သိုက်ဘိုက်ညးတုဲ ဒှ်ဥပမာ လက္ကရဴအိုတ်မွဲရ။
တွဵုရးပါန်သေဝ်ဗေနဳယျာဝွံ သွက်အလံၚ်ညးစၞးၜါတၠဏံ ဂွံဇၞးမာဲဂှ် ဒှ်ဒေသဆန္ဒမာဲ ပၟိက်ဇၞော်မွဲရ။
ဂကောံအဳလောန်မက်ဒက်ပ္တန်လဝ် America PAC ဝွံ ပ္ဍဲကဵုတွဵုရး အလံၚ်ညးစၞးၜါတၠ မ္ဒးပြိုၚ်ပ္ကာန်အာဂှ်ဝွံ ဂွံစန်ဒက် ညးကဵုမာဲတံ၊ ဂွံပ္တိုန်စရၚ်တံဂှ် ရီုဗၚ်ကဵုဒၟံၚ်ကီုလေဝ် တၚ်ရန်တၟံညးတံ ဂွံဍိုက်ပေၚ်ဂှ် အခက်အခုဲဂမၠိုၚ် နွံဒၟံၚ်ရ။
ပ္ဍဲဂိတုအံက်တဝ်ဗာ ၁၉ တေံ ညးဂွံဒုၚ်လဝ်တဲ စၟတ်တဲချက် အဳလောန်မက်ကဵုလဝ်ဂှ်ဝွံ ဒဒှ်ရဒှ်ပူဂဵု မၞုံယၟု ဂျောန်ဒရဳမာဂှ် သၞာဲဒဴအသေအဟာန်ဂှ်မွဲတၠ ဟီုလဝ်ရ။
ပ္ဍဲဂိတုအံက်တဝ်ဗာ ၂၀ တေံဂှ်လေဝ် အပ္ဍဲကဵုအသေအဟာန် မကၠောန်ဗဒှ်လဝ် ပ္ဍဲဍုၚ်ပေတ်ဗက်ဂှ် အလန်ဒုတိယ အဳလောန်မက် ကဵုလဝ်ညးဗြဴမွဲတၠ စၟတ်တဲချက် ၚုဟ်မးမၞုံ ၁ ပြကောဋိကိုဋ်ဒဝ်ဠာဂှ် ဂကောံ America PAC ချူပ္တိုန်လဝ် လ္တူမဳဒဳယျာပရေၚ်မၞိဟ်ရ။
ညးမကဵုမာဲထံက်ဂလာန် လ္တူပွအာတ်မိက် ဒဒှ်ရထံက်ဂလာန် ပ္ဍဲအရာပလေဝ်ပလေတ် သၞောဝ်သ္ဇိုၚ်ဒက်ပ္တန် အလန်ပထမကဵု အလန်ဒုတိယ မဒုၚ်ကဵုလျိုၚ် အခေါၚ်ရာန်လွဟ်ကဵု အခေါၚ်ဟီုဂး ဗွဲမဗၠးၜးဂှ် မွဲတ္ၚဲ မွဲတၠ ကဵုအာဒဝ်ဠာအမေရိကာန် ၁ ပြကောဋိကိုဋ်ဏောၚ် အဳလောန်မက် လလောၚ်တြးလဝ်ရ။
တၚ်နၚ်မ္ဒးကိတ်ညဳကဵု သွက်ဂွံဂွံ ဒဝ်ဠာ ၁ ပြကောဋိကိုဋ်ဂှ်တှ်ေ မၞိဟ်ကဵုမာဲထံက်ဂလာန် လ္တူပွအာတ်ပ္တိုန်တံဂှ်ဝွံ ဒးဒှ်မၞိဟ်မံၚ်စံၚ် ပ္ဍဲကဵုတွဵုရး အာရဳဇြိုဝ်နာ၊ ဂျဝ်ဂျဳယာ၊ မဳချဳဂါန်၊ နာဗာနာ၊ ဂဴရိုဝ်လိုၚ်နာသၟဝ်ကျာ၊ ပါန်သေဝ်ဗေနဳယျာ ကေုာံ တွဵုရးဝေန်ကေန်သေန် ပ္ဍဲကဵုဒေသအလံၚ်ညးစၞးၜါတၠဏံ မပြိုၚ်ပ္ကာန်အာညးသ္ကအ်ဂှ်တုဲ ဒှ်မၞိဟ်ဒးပ္တိုန်လဝ်စရၚ် သွက်ဂွံကဵုမာဲဂှ်ဏောၚ်ဂှ် ဖျေံစၟတ်လဝ်ရ။
ယဝ်ရကဵုမာဲထံက်ဂလာန် ကုပွအာတ်မိက်တံဏံဂှ်မ္ဂး မၞိဟ်ပ္တိုန်လဝ်စရၚ် ပ္ဍဲပါန်သေဝ်ဗေနဳယျာ စၟအ်အ်မၞိဟ်ဂှ် ကဵုအာ ဒဝ်ဠာ ၁၀၀ ဏောၚ်ဂှ် America PAC လလောၚ်တြးလဝ်ရ။
Ref: Reuters/AP