ဒိုက်ဥူ၊ အံက်တဝ်ဗာ ၂၃
ရးဗဂေါ ပွိုၚ်ဍုၚ်ဒိုက်ဥူ ပ္ဍဲထံၚ်ဒိုက်ဥူဂှ် ဍာ်ရပ်ဍာ်သုၚ် ပိုတ်အိုတ်က္တဵုဒှ်ဒၟံၚ်တုဲ ဍာ်ဟုမ်လေဝ်ဟွံရုမ်ဂပ်တုဲ ကောန်ထံၚ်ပရေၚ်ဍုၚ်ကွာန် ဗြဴဗြဴဂမၠိုၚ် က္တဵုဒှ်ဒၟံၚ် ယဲစၞာံရောၚ် ဂွံတီကေတ် ဇရေၚ်ဂကောံကောန်ထံၚ်ပရေၚ်ဍုၚ်ကွာန်−ညးဗြဴ WOPP ရ။
ပ္ဍဲထံၚ်ဒိုက်ဥူဂှ် စနူဂိတုအံက်တဝ်ဗာ သတ္တာဟပထမတေံတုဲ ပ္ဍဲကဵုကၟာဍာ်နွံပိဂှ် ၜါဂှ်ဝွံ ဍာ်ဟွံမွဲရတုဲ ပ္ဍဲကဵုကၟာဍာ်ရပ်စပ်ဒၟံၚ်လၟုဟ်ဂှ်လေဝ် ဟွံသ္အးဇ္ၚးတုဲ ဒးရပ်စပ်ဒၟံၚ်ဍာ် အသာ်ဗကောဝ်တံဂှ်ရ။
ဟိုတ်ဂှ်ရ ဂွံအာတရဴဇၞော်တရဴဍောတ် လၟေၚ်တ္ၚဲရဂှ် ဒှ်ဒၟံၚ်ဒဒိုက်တုဲ နဖဵုအဆက်လက္ကရဴ ဍာ်ဟွံသ္အးဇ္ၚးဂှ် ကောန်ထံၚ်ပရေၚ်ဍုၚ်ကွာန်ဗြဴ ၁၀၀ ပြၚ်ဝွံ က္တဵုဒှ်ဒၟံၚ်ယဲစၞာံရောၚ် သ္ဂးရ။
ပ္ဍဲကဵုကောန်ထံၚ်ပရေၚ်ဍုၚ်ကွာန် က္တဵုဒှ်ဒၟံၚ်ယဲစၞာံတံဂမၠိုၚ် ဂဥုဲဇဗဟွံရုမ်ဂပ်သၟးဟွံက ပ္ဍဲကဵုထံၚ်ဂှ်တှ်ေ မုယဲဒှ်ဒှ် ကဵုဒၟံၚ်ဂဥုဲ ပါရာသဳတမဝ် အရံၚ်စုၚ် အာယုက်အိုတ်ဒၟံၚ်ဂှ် မွဲဂကူဓဝ်ရဂှ် မဇြူဇြူမေယောန် ညးမၞုံအခေါၚ်ဟီုဂး ဂကောံကောန်ထံၚ်ပရေၚ်ဍုၚ်ကွာန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲကာလလၟုဟ် ပ္ဍဲကဵုထံၚ်ဒိုက်ဥူဂှ်တှ်ေ စနူကဵုဍာ်ရပ်ဍာ်သုၚ် ဟွံရုမ်ဂပ်သၟးဟွံက ပရေၚ်စသုၚ်မံၚ်စံၚ်တံဂှ်လေဝ် ဟွံသ္အးဇ္ၚးတုဲ ပါဲနူကဵုယဲစၞာံဂှ် ယဲဆက်စပ်ကဵုပရေၚ်ထတ်ယုက်တၞဟ်ဟ်တံလေဝ် ဒးဒုၚ်စဒၟံၚ်သိုၚ် ပရေံပရေံဂှ် ညးဆက်ဟီုရ။
သ္အာၚ်နူဂှ်ပၠန် ပ္ဍဲကဵုဗ္ဒမ် မၞိဟ် ၅၀ ရလုပ်ဂွံဂှ် စွံလဝ်လၟိဟ်မၞိဟ် ၜိုတ် ၈၀ ပေၚ်ၚ်ဂှ်ရ ယဲစၞာံဏံဂှ်တှ်ေ ပရေံစှ်ေကၠုၚ်ဒၟံၚ် အရိုဟ်ဒဒှ်တ္ၚဲရ။
က္တဵုဒှ်ဒၟံၚ်ယဲစၞာံဏံကီုလေဝ် လ္ပာ်ဌာနက္ဍိုက်ပ်ထံၚ်စာတ်ဂှ်တှ်ေ ပရေၚ်မၚ်မွဲဂဥုဲ ရုမ်မ်ဂပ်ပ် ဟွံကဵုသၟးဟွံက ဂဥုဲဇဗ နူကဵုဂြောဝ်ဂတာညးတံ ပလံၚ်ဗစိုပ်နၚ်တံဂှ်လေဝ် ကၟာတ်လဒဵုသၞောတ်ဗ္ၜတ်လဝ်တံ ကၠောန်သ္ပဒၟံၚ်ရောၚ် သ္ဂးရ။
မၞိဟ်မွဲမွဲ ဂွံဂျိုၚ်လမျီု အရာမနွံပၟိက်အဓိက ဍာ်ဏံ ဟွံမွဲဂှ်တှ်ေ သွက်ကောန်ထံၚ်ပရေၚ်ဍုၚ်ကွာန်ဗြဴ ပ္ဍဲထံၚ်ဒိုက်ဥူတံဂှ် ဒးဒုၚ်ဖံက်ပ္ကဝ်ဒၟံၚ် အခေါၚ်အရာမၞိဟ် မံက်က်ထေၚ်ၚ်ရောၚ် WOPP သ္ဂးရ။
ကြဴနူဒပ်ပၞာန်သီအဝဵုတုဲ ကောန်ထံၚ်ပရေၚ်ဍုၚ်ကွာန် ဒးဒုၚ်ဂစိုတ်လဝ် ပ္ဍဲကဵုထံၚ်စာတ်တံ နွံဒၟံၚ်တုဲ ဟိုတ်နူပြသၞာဍာ်ရပ်ဍာ်သုၚ်တုဲ ကောန်ထံၚ်ပရေၚ်ဍုၚ်ကွာန် ဒးချိုတ်အာတံ နွံကၠုၚ်မ္ဂး ဒးကေတ်တာလျိုၚ် အဓိကဂှ်ဝွံ ဒှ်ဒပ်ကံၚ်ဇြဳပၞာန် ရပ်ဒက်လဝ်ဟွံမွဲကဵုသၞောဝ်တံရဏောၚ်ဂှ် WOPP လလောၚ်ပ္တိတ်လဝ်ရ။
အပ္ဍဲကာလဒပ်ပၞာန်သီအဝဵု ပွိုၚ်ပိသၞာံပြၚ်ဏံ အလုံဍုၚ်မွဲ စပ်ကဵုလၟေၚ်ဒဒှ် ကံၚ်ဇြဳပၞာန်သီအဝဵု ဟွံလုပ်သၞောဝ်ဂှ်တုဲ မၞိဟ်ဒးဒုၚ်ရပ်လဝ် အပံၚ်ဖအိုတ် နွံလဝ် ၂၇၅၆၃ တၠ နွံဂှ် ဂွံတီကေတ် အတိုၚ်တၚ်နၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ရ။
ပရိုၚ်−သြၚ်လောန်တိုၚ်(မ်)
ဗီု−Social Media