တၞၚ်သဳ၊ အံက်တဝ်ဗာ ၂၄
သွက်ဂွံကလေၚ်အုပ်ဓလီုတိဍာ်ဂှ် ပ္ဍဲကဵုပွိုၚ်ဍုၚ် နွံပ္ဍဲရးတၞၚ်သဳတံဂှ် ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန် နဒဒှ်ပရေၚ်ပၞာန်ပလန်တဲဂှ်ဝွံ ရပ်စပ်ကၠုၚ် ဒရုၚ်ဗ္တိုက်အဇာဇၞော်တံ ဂၠိုၚ်ကၠုၚ်ဂှ် ဂကောံဇြဟတ်ပၠန်ဂတးတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံဇြဟတ်ပၠန်ဂတး မၞုံအပ္ဍဲတိဍာ်ဌာန်ဂအုပ်ပၞာန်ရး ပြၚ်ၜဳတံဂှ် သွက်ဂွံထ္ပက်ပၞာန်ဂှ် ဒပ်ကံၚ်ဇြဳပၞာန်ဝွံ စနူဂိတုသေပ်တေမ်ဗာတုဲကၠုၚ်တေံတုဲ စွံအဓိက ရပ်စပ်ကၠုၚ် ဒရုၚ်ဗ္တိုက်တံရ။
သွက်ဂွံဗ္တိုက်ကဵုဒရုၚ်တံဂှ်လေဝ် အပ္ဍဲရးတၞၚ်သဳဂှ် ဒက်ပ္တန်လဝ် တမ်ဒပ်ဒရုၚ်မွဲ ဗွဲတၞဟ်ခြာတုဲ ကဵုလဝ်ယၟု တမ်ဒပ်ဒရုၚ် စၟတ် ၆၀၃ တုဲ စွံလဝ် သၟဝ်ကောပ်ကာဲဌာန်ဂအုပ်ပၞာန်ရး နွံဇိုၚ်ပြၚ်ၜဳတံရ။
ဒရုၚ်ဗ္တိုက် ကၠာတေံ ရပ်စပ်ဒၟံၚ် နဒဒှ်ပရေၚ်ဗ္တိုက်ပၞာန်ကျာဂှ် ဂကောံဇြဟတ်ပၠန်ဂတးတံသၟးရ ရပ်စပ်ကၠုၚ်လဝ်တုဲ အခိၚ်လၟုဟ် လ္ပာ်ကံၚ်ဇြဳပၞာန် စကာဒရုၚ်တုဲ ထံၚ်ပရိုၚ်ကီု၊ ဖျေံမခတိုဟ် ဗ္တိုက်တံဂှ် ကၠောန်ကၠုၚ်ရ။
ဒပ်ကံၚ်ဇြဳပၞာန် ထ္ပက်ကရောၚ်ပၞာန်ဂှ်ဝွံ ရန်ကဵုတိဍာ်အုပ်ဓုပ်တုဲ ဒှ်သဘဴမိက်ဂွံကလေၚ်ကေတ် တိဍာ်ထိၚ်ဒက် ဂကောံဇြဟတ်ပၠန်ဂတးတံဂှ်ရောၚ် ကောန်သ္ဂံၚ်ဂျဵုကာ ညးဒုၚ်တာလျိုၚ်လလောၚ်ပရိုၚ် ဌာနပၞာန်ရးတၞၚ်သဳ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ လ္ပာ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်လၟုဟ်ဂှ်တှ်ေ လ္တူနူကဵုပရေၚ်အုပ်ဓလီုတိဍာ်တံဂှ် ဗီုပြၚ်မိက်ဂွံကလေၚ်ကေတ် တိဍာ်ပိုယ်တံ ထိၚ်ဒက်လဝ် ချဳဒရာၚ်ဒၟံၚ်တံဂှ် ဂွံဆဵုကေတ်ရ။ လ္ပာ်ပိုယ်ဏံ ဂွံညာတ်ကေတ်ဂှ်တှ်ေ ဍေံတံဒုၚ်သ္ဇိုၚ်ကဵုဍုၚ်၊ ကွာန်တံတုဲ ဗွဲတၟေၚ် ဍုၚ်တံဂှ်တုဲ အရာပ်ဇိုၚ်ဇဵုဍုၚ် နွံဗ္ဒါဲဍုၚ်တံကဵု ပွဳပွူဗ္ဒါဲဗ္ဒါဲတံဂှ် ဍေံတံ ညံၚ်ဂွံကလေၚ်ဂွံတိဍာ်အုပ်ဓလီု ဗီုပြၚ်ကၠောန်ဒၟံၚ်ဂှ် ဂွံဆဵုကေတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ပ္ဍဲကဵုဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ် ကောန်ပၞာန်ဗ္တိုက်ပၞာန်လေပ် ဗီုကၠာတေံ ဟွံမွဲရတုဲ သၟတ်ကော်လဝ် နကဵုသၞောဝ်လျိုၚ်ပၞာန်တံကဵု ညးအာယုက်ဇၞော်ဇၞော်တံ၊ သၟတ်ရပ်ဒက်လဝ်ဟွံဗဗွဲကဵုသၞောဝ်တုဲ ကော်ပၠောပ်လဝ်အပ္ဍဲပၞာန်တံ ပါလုပ်ဒၟံၚ် ဂၠိုၚ်အိုတ်ဂှ် ညးဆက်ဟီုရ။
ညးဒုၚ်တာလျိုၚ် လလောၚ်ပရိုၚ် ဂကောံဒပ်စဵုဒၞါညးဍုၚ်ကွာန် ပွိုၚ်ဍုၚ်လံၚ်လုၚ်ဂှ်လေဝ် ဒပ်ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန်ဂှ်ဝွံ ရပ်စပ်ကၠုၚ် ဒရုၚ်ဗ္တိုက်တံကဵု ဒရုၚ်ထံၚ်ပရိုၚ်တံ ဂၠိုၚ်အိုတ်ဂှ် ဟီုရ။
“အခိၚ်ကရောၚ်ပၞာန်ဍေံတံ လုပ်ကၠုၚ်ဂှ် သုၚ်စောဲကၠုၚ် ဒရုၚ်ဂၠိုၚ်ကၠုၚ်ဂှ် ဂွံဆဵုကေတ်ရ။ နူလ္ပာ်ဍေံတံ သုၚ်စောဲကၠုၚ် ဒရုၚ် စဵုကဵုပန်ဖ္ဍိုက်ဂှ် ဂွံဆဵုကေတ်ရ။ သီုထံၚ်ပရီုၚ် သီုထောံမခတိုဟ်တံဂှ် ကၠောန်ဒၟံၚ်ရ။ သုၚ်စောဲလဝ် ပ္ဍဲကရောၚ်ပၞာန်ဏံဂှ်တှ်ေ မာတဳရိုဝ်တာ။ ရပ်စပ်ဒၟံၚ်ညအ်သၟးရ။ ရပ်စပ်ဒၟံၚ် ဒရုၚ်ထံၚ်ပရိုၚ်၊ ဒရုၚ်ဗ္တိုက် ထောံမခတိုဟ် မာတဳရိုဝ်တာတံ မဒှ်ရ” သာ်ဝွံ သ္ဂးရ။
ဒပ်ကံၚ်ဇြဳပၞာန် ရပ်စပ်ကၠုၚ် သီုကဵုဒရုၚ်ဗ္တိုက်သာ်ဏံဂှ်တုဲ နကဵုဂကောံဇြဟတ်ပၠန်ဂတးတံ သာတုဲ ဒးစွံသတိ ပ္ဍဲပရေၚ်ပၞာန်တံတုဲ ဂွံကၠောန်ပရေၚ်ပြုပြေၚ်မာန်ဂှ် ဒးပ္တိတ်အာဇြဟတ်ဏောၚ် ညးဆက်ဟီုရ။
မွဲလ္ပာ်ဂှ်လေဝ် ဒပ်ကံၚ်ဇြဳပၞာန် ထ္ပက်ဒၟံၚ်ကရောၚ်ပၞာန်ဂှ်ဝွံ ပါဲနူကဵုဒရုၚ်ဗ္တိုက်ဇၞော်ဇၞော် မာတဳရိုဝ်တာ ဖ္ဍိုက်လျိုၚ်ဂၠိုၚ်ၚ်မာန်ဂှ်တုဲ ရပ်စပ်ကၠုၚ် သီုဒရုၚ်ထံၚ်ပရိုၚ်တံတုဲ သွက်ဂွံစဵုဒၞါ အန္တရာယ်ဒရုၚ် ဂကောံဇြဟတ်ပၠန်ဂတးတံဂှ် ဖ္ဍိုက်နၚ် သီုကဵုဂျာန်ပါ ပလီုဒရုၚ်တံဂှ်ရောၚ် ဂွံတီကေတ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ၜိုတ်က္ဍစိုပ် ကံက်ကပှ်ဂွံလဝ်ဂှ်မ္ဂး နူဂိတုသေပ်တေမ်ဗာ စဵုကဵုဂိတုအံက်တဝ်ဗာ သတ္တာဟတတိယဂှ် ဟိုတ်နူပရေၚ်ဗ္တိုက်ကဵုဒရုၚ် ကံၚ်ဇြဳပၞာန် ထ္ပက်ကၠုၚ်ကရောၚ်ပၞာန် ပ္ဍဲပွိုၚ်ဍုၚ်လံၚ်လုၚ်ကဵု ပွိုၚ်ဍုၚ်တၞၚ်သဳဂှ်တုဲ ကောန်အရာပ်ဟွံအောန်နူကဵု ပန်တၠ ချိုတ်တုဲ ၁၃ တၠ ဇီုကပိုက်ကလိဂွံလဝ်ဝပ်ရ။
ညးဒေသပွိုၚ်ဍုၚ်လံၚ်လုၚ်မွဲတၠဂှ်လေဝ် ကၠာတေံ ကံၚ်ဇြဳပၞာန်တံ ထ္ပက်ကရောၚ်ပၞာန်မ္ဂး ပန်ပှော်လွဟ်ဇၞော်ကြာန်န်တံတုဲ လၟုဟ်ပ္ဍဲကဵုပရေၚ်ပၞာန်တံဏံဂှ် ထံၚ်ပရိုၚ်ကဵုဒရုၚ်တုဲ ဗ္တိုက်ထောံမခတိုဟ်တံ ကၠောန်ကၠုၚ်ဂှ်ရ ညးဍုၚ်ကွာန်ကောန်အရာပ်တံ ဇီုကပိုက်ဒးဂှ် သာတုဲဒးဂွိၚ်ကၠုၚ်မံၚ်ရောၚ် သ္ဂးရ။
သ္အာၚ်နူဂှ်ပၠန် အခါပန်ပှော်ကဵုလွဟ်ဇၞော် ဂွံမိၚ်ကေတ်ရမျာၚ်တုဲ ပ္ဍဲကဵုဒၞါဲထေၚ်ကေတ်ဗၠးဘဲတံဂှ် ဒ္စးဒုၚ်ပါဲဒလေတ်မာန်တုဲ ဒရုၚ်ဂှ်တှ်ေ ထောံဖျေံမခတိုဟ် နူကဵုသၠုၚ်ၚ်ဂှ်တုဲ ဒ္စးဒုၚ်တီကေတ်ဟွံမာန်ဂှ်ရ နကဵုညးဍုၚ်ကွာန်တံ သာတုဲ ဒးစွံသတိဏောၚ်ဂှ် ညးဒေသတံ ဟီုအိုတ်ရ။
ပ္ဍဲရးတၞၚ်သဳဂှ်တှ်ေ အပ္ဍဲဂိတုသေပ်တေမ်ဗာတုဲကၠုၚ်တေံ ဒပ်ကံၚ်ဇြဳပၞာန် ထ္ပက်ကရောၚ်ပၞာန် လုပ်စိုပ်ကၠုၚ်သၟးဟွံက ဟိုတ်နူဗ္တိုက်ကဵုလွဟ်ဇၞော် ကေုာံ ထောံမခတိုဟ်ကဵုဒရုၚ်တံတုဲ ညးဒးဂြိပ်ဒဴထောံလသာသ္ၚိဌာန် နွံလဝ် ဗ္ဒါဲတြဴဠက်ဂှ် ဂွံတီကေတ် အတိုၚ်လိက်ဒုၚ်စဳရေၚ် ဂကောံသုတေသန အပ္ဍဲဒေသ FE5 Thanintharyi ရ။
ပရိုၚ်−သြၚ်လောန်တိုၚ်(မ်)
ဗီု−PCT