ကျာ်ထဝ်၊ အံက်တဝ်ဗာ ၂၅
ပေါဲဗ္တိုက်ဟွံမွဲမွဲသာ် ပ္ဍဲကဵုကွာန်ဗ္ဒါဲပွဳပွူ ဍုၚ်ဒုၚ်သယိတ် ပွိုၚ်ဍုၚ်ကျာ်ထဝ် တွဵုရးဍုၚ်မန်တံဂှ် ဒပ်ကံၚ်ဇြဳပၞာန် ပန်ပှော်ဒၟံၚ်ကဵုလွဟ်ဇၞော် သီုဗ္တံသီုတ္ၚဲရောၚ် ဂွံတီကေတ် ဇရေၚ်ညးဒေသတံကဵု ဂကောံဇြဟတ်ပၠန်ဂတးတံရ။
နူကဵုဒပ်အမၠံက် စၟတ် ၃၁၀ ဖျေံသ္ဇိုၚ်ဒုၚ်သယိတ်ဂှ် စနူဂိတုအံက်တဝ်ဗာ ၂၁ တုဲကၠုၚ်တေံတုဲ စဵုကဵုဂိတုအံက်တဝ်ဗာ ၂၄ ဂှ် လၟေၚ်ဒဒှ်တ္ၚဲ ကၠောန်သ္ပပန်ပှော်ဒၟံၚ် လွဟ်ဇၞော် လ္ပာ်ကွာန်အခိုၚ်၊ ကွာန်တုၚ်ခွ၊ ကွာန်ဇြဳပျံၚ် ၄ ၊ ကွာန်ကာမာချံၚ်၊ ကွာန်ဝေန်ကာန်၊ ကွာန်မုက္ခမအ်တံဂှ်ရ။
အပ္ဍဲပွိုၚ်ပန်တ္ၚဲဂှ် နူဒပ်ကံၚ်ဇြဳပၞာန် ပန်လဝ်လွဟ်ဇၞော် ၁၀၀ မပြၚ်တုဲ ပ္ဍဲဂိတုအံက်တဝ်ဗာ ၂၂ မွဲတ္ၚဲဓဝ်ဂှ် ပန်ပှော်လဝ်လွဟ်ဇၞော် ၅၀ မပြၚ်ရောၚ် ညးဒုၚ်တာလျိုၚ် PDF ခရိုၚ်သဓီု ကိုဝ်အေမေန်ထောန် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အပ္ဍဲပရေၚ်ပန်ပှော်လွဟ်ဇၞော်ဂှ် ဒတုံဗ္တိုဟ်ထ္ကးအာလဝ် ဗ္ဒါဲဂၠံၚ်ကွာန်တုၚ်ခွဂှ်တုဲ ညးဗြဴဒေသမွဲတၠ ဇီုကပိုက်ကလိဂွံလဝ်ဝပ်တုဲ ဆေၚ်ဖျာမွဲဆေၚ် ဇီုကပိုက်လီုလာ်အာလဝ်ဂှ် ဂွံတီကေတ်ရ။
ဟိုတ်နူဒပ်ကံၚ်ဇြဳပၞာန် ပန်ပှော်ဒၟံၚ်လွဟ်ဇၞော် လၟေၚ်ဒဒှ်တ္ၚဲတုဲ ညးဍုၚ်ကွာန်ဒေသလ္ၚဵု ဆုဲပြံၚ်အာမံၚ်တဴ လ္တူဍုၚ်ကျာ်ထဝ်ကဵု ဍုၚ်ဇြပ်ဗုတံ နွံဒၟံၚ်တုဲ ဗွဲမဂၠိုၚ်ဂှ်တှ်ေ အောပ်မာဒၟံၚ် အပ္ဍဲကတိုၚ်ပါဲဗုမ်တံရောၚ် သ္ဂးရ။
ပ္ဍဲကဵုပွိုၚ်ဍုၚ်ကျာ်ထဝ် ဒၞါဲဂကောံဇြဟတ်ပၠန်ဂတး ချဳဒရာၚ်ဇြဟတ်ခိုဟ်တံဂှ် အပ္ဍဲကာလသီအဝဵုဏံ ပါဲနူပေါဲဗ္တိုက်ၜါလ္ပာ်တုဲ ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော်တုဲ ညးဍုၚ်ကွာန်ဒေသ ဒးဇီုကပိုက်ချိုတ်အာတံကဵု ဒးထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်တံ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−KHRG