နျူယျံက်၊ အံက်တဝ်ဗာ ၂၄
သွက်ဂွံရီုဗၚ် ရုယှာဗ္တိုက်ၜက်ၜေတ်ဒၟံၚ် ယူကရုၚ်ဂှ်တုဲ ကိုဝ်ရဳယျာသၟဝ်ကျာ ဗလးဏာလဝ် ကောန်ပၞာန်တံ ဟွံမွဲဂှ်ကီု၊ နူလ္ပာ်ကိုဝ်ရဳယျာသၠုၚ်ကျာတံ ဟီုမံၚ်ဟွံမွဲကဵုတမ်ရိုဟ်ရောၚ် ညးစၞးကိုဝ်ရဳယျာသၟဝ်ကျာ စပ်ကဵုကုလသမဂ္ဂ မွဲတၠ ဟီုလဝ် ပ္ဍဲဂိတုအံက်တဝ်ဗာ ၂၂ တေံရ။
ပ္ဍဲကဵုရုယှာ ဗွဲဒိုဟ်ဗၟံက်တေံ ကောန်ဒပ်တၟေၚ် ကိုဝ်ရဳယျာသၟဝ်ကျာ ၁၅၀၀ ပ္ကတ်ပ္ကေၚ်ဒၟံၚ်တုဲ ပျုၚ်ယာန် သွက်ဂွံရီုဗၚ်ကဵုမဟာမိတ်ညးတံ ဗလးလဝ် ကောန်ဒပ်ဗွဲမဂၠိုၚ်ဂၠေၚ်ရောၚ် အေဂျေန်သဳ ထံၚ်ပရိုၚ်ကိုဝ်ရဳယျာသၠုၚ်ကျာ ဟီုလဝ် ပ္ဍဲဂိတုအံက်တဝ်ဗာ ၁၈ တေံရ။
ဗလးဏာ ကောန်ပၞာန်ကိုဝ်ရဳယျာသၟဝ်ကျာတံ ပ္ဍဲယူကရုၚ်တုဲ သ္ဂောံကဵုလုပ်ပေါဲဗ္တိုက်ဂှ် ပလေဝ်ပလေတ်ဒၟံၚ်ဒတုဲရောၚ် အေဂျေန်ဇြဳ ထံၚ်ပရိုၚ် ကိုဝ်ရဳယျာသၠုၚ်ကျာ ဟီုလဝ်ရ။
ဆ္ဂး ပ္ဍဲကဵုကောံဓရီုကုလသမဂ္ဂ မကၠောန်ဗဒှ်လဝ် ပ္ဍဲဍုၚ်နျူယျံက်ဂှ် ညးစၞး ကိုဝ်ရဳယျာသၟဝ်ကျာ မွဲတၠဂှ် စပ်ကဵုဂလာန်ကိုဝ်ရဳယျာသၠုၚ်ကျာ ဟွံမွဲကဵုတမ်ရိုဟ်ဂှ်တုဲ ညးတံ ဟွံဒးကဵုတၚ်စၟတ်ပုဟ် ဂွံဒုၚ်စသိုၚ်သာ်ဏံဂှ် ဟီုလဝ်ရ။
ကြဴနူရုယှာ ဗ္တိုက်ၜက်ၜေတ် ယူကရုၚ်တုဲ အကြာရုယှာကဵု ကိုဝ်ရဳယျာသၟဝ်ကျာ သာဍုက်ကေဝ်ကၠုၚ်တုဲ အမေရိကာန်ဂှ်တှ်ေ ကိုဝ်ရဳယျာသၟဝ်ကျာဝွံ ပလံၚ်ကဵုဒၟံၚ်လွဟ်လက်နက် သွက်ဒပ်ပၞာန်ရုယှာတံရောၚ် ဟီုလဝ်ရ။
စပ်ကဵုဂလာန် ကောန်ဒပ်ကိုဝ်ရဳယျာသၟဝ်ကျာတံ စိုပ်ဒၟံၚ်ဂှ်တုဲ ရုယှာ ဟွံကဵုလဝ်တၚ်စၟတ်တုဲ ဌာန်ပရိုၚ်ကိုဝ်ရဳယျာသၟဝ်ကျာ ကၟိန်ဍုၚ်ပိုၚ်ဂှ်လေဝ် ထ္မံက်ထ္ၜးလဝ်ဂှ် ဟွံမွဲရ။
ဆ္ဂး သမ္မတယူကရုၚ် ဗလာဒဳမာ ဇြဳလာန်သကဳဂှ်တှ်ေ စပ်ကဵုကောန်ပၞာန်ကိုဝ်ရဳယျာသၟဝ်ကျာတံ စိုပ်ဒၟံၚ်ရုယှာ သွက်ဂွံပါလုပ်ဗ္တိုက် ပ္ဍဲပေါဲပၞာန်ယူကရုၚ်ဂှ်တုဲ မဟာမိတ်ဂမၠိုၚ် ဒးခၠေဝ်ပလန်ဏောၚ်ဂှ် ဟီုလဝ်ရ။
ကရောံကောန်ဒပ်ရုယှာဂမၠိုၚ် ကောန်ပၞာန်ကိုဝ်ရဳယျာသၟဝ်ကျာ ၁၂၀၀၀ ပြၚ် ဂွံလုပ်ပေါဲဗ္တိုက်ဂှ် ပလေဝ်ပလေတ်ဒၟံၚ်ရောၚ် ဒဒှ်ရညးတံတီလဝ်ဂှ် သမ္မတဇြဳလာန်သကဳ ဟီုလဝ်ရ။
ဣဏံဝွံ ဒှ်တၚ်ကော်ဆဴမွဲတုဲ သာ်လဵုဂွံခၠေဝ်ပလန်အာ ကုတၚ်ကော်ဆဴတံဏံရောဟီုဂှ် ညးတံ တီလဝ်တုဲ နကဵုဍုၚ်အဖဝ်မိတ်ဂမၠိုၚ် ညံၚ်ဟွံဂွံပါဲဒလေတ် နူကဵုတၚ်ကော်ဆဴဏံဂှ် ညးဖ္တိုက်ဖ္အောဝ် ဟီုလဝ်ရ။
နကဵုကိုဝ်ရဳယျာသၟဝ်ကျာ ယဝ်ရပါလုပ်ကၠုၚ်အကြာ ပ္ဍဲကဵုပေါဲပၞာန်ဥရဝ်ပ မွဲမွဲဂှ်မ္ဂး ပွမကဵုကၠုၚ်ဒၟံၚ်ဇြဟတ်ဂရိုဟ် လ္တူအလဵုအသဳပျုၚ်ယာန်တံဂှ်တှ်ေ ဟွံရုမ်ဂပ်ဏီပုဟ်ဟီုဂှ် ထ္မံက်ထ္ၜးဒၟံၚ်ရောၚ် သမ္မတ ဇြဳလာန်သကဳ သ္ဂးရ။
ဝန်ဇၞော်ကာစဵုဒၞါ ဗျိတိၚ် ဂျောန်ဟဳလေဝ်ဂှ်လေဝ် ပလံၚ်ဏာလဝ် ကောန်ဒပ်ကိုဝ်ရဳယျာသၟဝ်ကျာတံ ပ္ဍဲဍုၚ်ရုယှာ ဂၠိုၚ်ကဵုလ္ၚီ ဒှ်မာန်ဂှ် ဟီုလဝ်ရ။
ဂအုပ်ညးအုပ်ကာ ဂကောံနေတဝ် မက်ရူတဳဂှ်လေဝ် ပ္ဍဲကဵုပေါဲပၞာန် ရုယှာ−ယူကရုၚ်ဂှ် ကောန်ပၞာန်ကိုဝ်ရဳယျာသၟဝ်ကျာတံ ပါလုပ်တုဲ အသိၚ်ပေါဲပၞာန် သၠုၚ်တိုန်ကၠုၚ် တီတီမာန်ရောၚ် ဟီုလဝ်ရ။
စပ်ကဵုပြဝ ဗလးဏာလဝ် ကောန်ပၞာန်ကိုဝ်ရဳယျာသၟဝ်ကျာတံ ပ္ဍဲကဵုရုယှာဂှ်တုဲ သွက်ဂွံခၠေဝ်ပလန်ဂှ် သဳကၠဳချပ်ဂၞန်ဒၟံၚ်ကဵု မဟာမိတ်တံရောၚ် ကလုတ်တမာန်အမေရိကာန်မွဲတၠ ဟီုလဝ်ရ။
Ref: Reuters