နေဗျဳဒဝ်၊ အံက်တဝ်ဗာ ၂၇
ဟိုတ်နူပရေၚ်ပၞာန်သီအဝဵုတုဲ ၚုဟ်ထဝ်အပ္ဍဲဍုၚ် ဟွံညိၚ် မထၠာ်တိုန်ဒၟံၚ်ဂှ် သွက်ဂွံထိၚ်တုဲ ဒက်ပ္တန်လဝ် ကမ္မတဳသ္ဂောံခုတ်ၚုဟ်ထဝ်ဂှ် လ္ပာ်ကံၚ်ဇြဳပၞာန် လလောၚ်ပ္တိတ်ကၠုၚ်ရ။
ကမ္မတဳဏံ ဒက်ပ္တန်လဝ် ပ္ဍဲဂိတုအံက်တဝ်ဗာ ၂၄ ဏံဂှ်ဝွံ ရန်တၟံကဵု ၚုဟ်ထဝ်အပ္ဍဲဍုၚ် ဂွံညိၚ်ဝတ်ဂှ်ကီု၊ သွက်ဂွံခုတ်ပ္တန်ၚုဟ်ထဝ် လၟေၚ်ၚ်တ္ၚဲ ဗွဲမဗဗွဲကဵု သၞောဝ်တန်တဴဒၟံၚ်တံ၊ နဲသၞောဝ်ဥပဒေ၊ စေဝ်ပၞောန်တံမာန်ဂှ် သ္ဂးရ။
ပ္ဍဲကမ္မတဳဂှ်တှ်ေ ဒုဝန်ဇၞော်ကံၚ်ဇြဳပၞာန် နူဌာနဝန်ဇၞော်ထိၚ်ဒဝ်သယံဇာတ ကေုာံ ထိၚ်ဒဝ်ပွဳပွူသဘာဝဂှ် ဒှ်ဥက္ကဌတုဲ ဒုဥက္ကဌ တိုက်သြန်ဗဟဵုဍုၚ်ဗၟာဂှ်တှ်ေ ဒှ်ဒုဥက္ကဌဂှ် ပါလုပ်ရ။
ကမ္မတဳဏံဂှ် ဒက်ပ္တန်လဝ် နကဵုညးတာလျိုၚ် ၁၅ တၠ နူကဵုဌာနစုၚ် သၟဝ်တဲကံၚ်ဇြဳပၞာန်တံဂှ်ကီုလေဝ် ဂကောံတၠကမၠောန်ထဝ် ရးဒေသလ္ဂုၚ် မလလောၚ်ပ္တိတ်ဒၟံၚ် ၚုဟ်ထဝ် လၟေၚ်တ္ၚဲတံကီု ဂကောံဆက်စပ်ကဵုထဝ်တံကီု ပါလုပ်လဝ် ဟွံမွဲရ။
တၠပညာပရေၚ်ပိုန်ဒြပ်မွဲတၠဂှ်တှ်ေ ဂကောံထဝ်တံ ခုတ်ပ္တန်ကဵု ၚုဟ်ထဝ်ဂှ် ဟွံစိုပ်တရဴတုဲ မ္ဒးဒက်ပ္တန်လဝ်ကမ္မတဳသာ်ဏံတုဲ ယဝ်ရဟွံစိုပ်တရဴပုဟ်ဟီုမ္ဂး ဗွဝ်ဖျာဓလုက်တံကဵု ပွမဗက်စအဂတိတံ ဂၠိုၚ်ကၠုၚ်တုဲ သာလီုလာ်ကၠုၚ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂကောံထဝ်တံ ခုတ်ပ္တန်ကဵုၚုဟ်ဂှ် ဟွံစိုပ်တရဴတုဲ နူကဵုအလဵုအသဳ ဒက်ကမ္မတဳတုဲ ပ္တန်အာၚုဟ်ဏောၚ် ဗီုဏံရ။ ဗီုတိုက်သြန်ဗဟဵု ခုတ်ၚုဟ်သြန်ဍုၚ်သ္အာၚ်ကီု ထဝ်ဂှ်လေဝ် နူကဵုကမ္မတဳဏံ ခုတ်ပ္တန်အာကဵု ၚုဟ်စၞောန်ဏောၚ်။ ကၠာတေံဂှ်တှ်ေ ဟွံဒ္ဂေတ်ဗက်မ္ဂး ပပၞရပ်ထောံမွဲလစုတ်တုဲ ကလေၚ်ဗလး နကဵုလျိုၚ်တံကီုလေဝ် လၟုဟ်ဂှ်တှ်ေ နကဵုသၞောဝ်ဗၞိက်ပၟိက်ဇၞော်ဂှ် ဖျေံဒဏ်ထံၚ် ဒဏ်သြန်တံ ဂွံအာယျ။ အတိုၚ်ရန်တၟံလဝ် ယဝ်ရၚုဟ်ထဝ်ဒှ်ကၠုၚ်မ္ဂး ခိုဟ်ကွေံ။ ယဝ်ရဗွဝ်ဖျာဒလုက် ၚုဟ်ဂၠိုၚ်အာကီု၊ ပွမဗက်စအဂတိတံ ဂၠိုၚ်ကၠုၚ်မ္ဂး အရာမလီုလာ်တံ ဂၠိုၚ်အာဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဂှ်တှ်ေ နကဵုကမ္မတဳ ဒုၚ်သ္ဇိုၚ်ကဵုဗွဝ်ဖျာထဝ်အပ္ဍဲဍုၚ်၊ ၚုဟ်လှာဲသြန်ဍုၚ်သ္အာၚ်၊ ၚုဟ်ထဝ်ဂၠးတိတံဂှ်တုဲ တော်စၟဳတ်အာ နကဵုနှေန်လှာဲသြန် နူကဵုတိုက်သြန်ဗဟဵု မစၟတ်လဝ်ဂှ်တုဲ ၚုဟ်ထဝ်ဒှ်ထေက်တံဂှ် ကမ္မတဳ ပန်ဂအုံပိဂအုံ ဗွဲတွဵုမအောန် တိုန်စိုပ်တုဲ ဒးသ္ပဒတန် ခုတ်ပ္တန်အာၚုဟ် လၟေၚ်တ္ၚဲဏောၚ်ဂှ် သ္ဂးလဝ်ရ။
သ္အာၚ်နူဂှ်ပၠန် ယဝ်ရနွံပၟိက်မ္ဂး ပွမကေတ်ကသပ် နူကဵုဂအုပ်ဂကောံ တၠကမၠောန်ထဝ်ဍုၚ်ဗၟာ၊ ဂကောံတၠကမၠောန်ထဝ် ရးဒေသမာန္တလေဝ် ကေုာံ ရးလ္ဂုၚ်တံ၊ ဂကောံမဆက်စပ်ဂမၠိုၚ်၊ တၠကမၠောန်စိုန်သကီုတံဂှ်ကီု ပွမပံၚ်ဖျပ်ရေၚ်တၠုၚ်တံဂှ် ဒးကၠောန်အာဏောၚ် လလောၚ်ပ္တိတ်လဝ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ကမၠောန်သွံရာန်ထဝ်ဂှ် လ္ဂောံကဵုသၞောဝ် ဗၞိက်၊ ပရေၚ်ဒုၚ်ကာ ပၟိက်ဇၞော်တံဂှ်တုဲ စၟတ်ထောံလဝ် နဒဒှ်ပရေၚ်ဒုၚ်ကာပၟိက်ဇၞော်တံရောၚ် ထပ်လလောၚ်တြးကၠုၚ် နကဵုစၟတ်တ္ၚဲ ဂိတုအံက်တဝ်ဗာ ၂၅ တေံရ။
သွက်လၟေၚ်ကမၠောန် ပရေၚ်ဒုၚ်ကာစပ်ကဵုထဝ် မဒှ်ကၠုၚ်ပရေၚ်ဒုၚ်ကာပၟိက်ဇၞော်တံဂှ် ပ္ဍဲအရာပ္တိတ်အမိၚ်တာဒၞါ၊ အမိၚ်ကောပ်ကာဲ၊ အမိၚ်စဵုဒၞါ၊ အခေါၚ်လလောၚ်ပ္တိတ်စေဝ်ပၞောန်တံဂှ် ကဵုလဝ်အခေါၚ်ပအပ်လဝ် ကုဌာနဝန်ဇၞော် ပရေၚ်ထိၚ်ဒဝ်သယံဇာတ ကေုာံ ပရေၚ်ထိၚ်ဒဝ် သဘာဝရ။
ပရိုၚ်−သြၚ်လောန်တိုၚ်(မ်)
ဗီု−CJ