ကြဴနူဗ္ဒိုပ် (ခေါပုတ်) ဒးဒုၚ်သီတုဲဂှ် ကံၚ်ဇြဳပၞာန် ထောံမံၚ်ခတိုဟ် ဟွံပိုတ်သ္ကုတ်

ဘာပန်၊ နဝ်ဝေမ်ဗာ ၁

ကြဴနူဗ္ဒိုပ်(ခေါပုတ်) ကံၚ်ဇြဳပၞာန် ဖျေံသ္ဇိုၚ်ဘာပန် တွဵုရးကရေၚ် ဒးဗ္တိုက်သီတုဲဂှ် ကၠောန်သ္ပကၠုၚ် ပရေၚ်ဗ္တိုက်ပၞာန်ကျာ အပ္ဍဲကဵုကွာန်တံ ဆက်ဒၟံၚ်ဂှ် ဂွံတီကေတ် ဇရေၚ်ညးမၞုံအခေါၚ်ဟီုဂး ဒပ်မဟာ ၅ KNU ကဵု ဇာဇၞိက်သ္ပအထံက်အရီု ပရေၚ်ၜိုဟ်လလမ်ကရေၚ် KPSN တံရ။

ဗ္ဒိုပ်(ခေါပုတ်) မဒှ်ဗ္ဒိုပ်ဒပ်ကံၚ်ဇြဳပၞာန် အာယုက်ဂၠိၚ်ဇြဟတ်ဇၞော်မွဲဂှ် ဒးဒုၚ်ဗိုၚ်ဗ္တိုက်ဒၟံၚ် ပွိုၚ်တြဴဂိတုပြၚ်ဂှ် ပ္ဍဲဂိတုအံက်တဝ်ဗာ ၂၉ တေံ ဒပ်ပံၚ်ကောံပၠန်ဂတး ဒပ်မဟာ ၅ KNLA တံ ဗ္တိုက်သီဂွံလဝ်ရ။

အပ္ဍဲလုပ်စိုပ်ဗ္တိုက်သီ ဗ္ဒိုပ်(ခေါပုတ်) ဂှ် ကောန်ဒပ်ကံၚ်ဇြဳပၞာန်တံဝွံ ထောံလသာဗ္ဒိုပ်ဂြိပ်တိတ်အာဂှ်ရ လ္ပာ်ဒပ်ပံၚ်ကောံပၠန်ဂတးတံ သီဂွံလဝ် မကမ်လွဟ်လက်နက်ဗွဲမဂၠိုၚ်ဂၠေၚ်ရ။

ဒပ်ကံၚ်ဇြဳပၞာန် ဒးဒုၚ်သီလဝ်ဗ္ဒိုပ်ဂှ်ဝွံ ပ္ဍဲဂိတုအံက်တဝ်ဗာ ၃၀ ဂှ် ကၠုၚ်စိုပ်ထောံဏာလဝ်မခတိုဟ် နကဵုဂျက်ဖိုက်တာ ပ္ဍဲကဵုဂကောံကွာန်ထဳဂဝ်ထာ ခရိုၚ်ဘာပန် KNU ရ။

ဟိုတ်နူဒးဒုၚ်ထောံမခတိုဟ်ဗ္တိုက်လဝ်တုဲ သ္ၚိပန်မကဵု ဘာဗ္တောန်လိက်မွဲမ ဇီုကပိုက်လီုလာ်အာလဝ်တုဲ မၞိဟ်ဇီုကပိုက်ဒးဟွံမွဲပုဟ်ဂှ် ဇာဇၞိက်သ္ပအထံက်အရီုပရေၚ်ၜိုဟ်လလမ်ကရေၚ် KPSN လလောၚ်ပ္တိတ်လဝ်ပရိုၚ် ပ္ဍဲဂိတုအံက်တဝ်ဗာ ၃၁ တေံရ။

စပ်ကဵုလၟေၚ်ဒဒှ်ပရေၚ်ထောံမခတိုဟ်ဗ္တိုက်ဂှ်တုဲ ညးမၞုံအခေါၚ်ဟီုဂး ဒပ်မဟာ ၅ KNU သ္ကိုပ်ဗိုလ်ဇၞော် သဝ်ကလာဒိုဝ်ဂှ်လေဝ် စမြိုၚ်လ္ၚဵု ဇီုကပိုက်လီုလာ်အာကီုလေဝ် မၞိဟ်ဇီုကပိုက်ကလိဂွံဝပ် ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗ္ဒိုပ်ဒပ်(ခေါပုတ်) ဝွံ နွံခြာဒၟံၚ်ကဵု ဍုၚ်ဘာပန် ဗၞတ် ၁၀ မိုၚ်တုဲ နူဂိတုဖေဖဝ်ဝါရဳတုဲကၠုၚ်တေံရ ဒပ်မဟာ ၅ KNLA တံ သီဂွံလဝ် ဍုၚ်ဘာပန်တုဲ ဗျူဟာပၞာန် မၞုံသ္ကုတ်သၠုၚ်ကျာဍုၚ်ဂှ် ဒဵုကဵုအခိၚ်လၟုဟ် ဒပ်ပံၚ်ကောံပၠန်ဂတးတံ ဆက်ဗိုၚ်ကၟာတ်လဒဵု ထပိုတ်လဝ်ရ။

ဗ္ဒိုပ်(ခေါပုတ်) ဝွံ ဒှ်ဗ္ဒိုပ်ကောန်ဒပ်ကံၚ်ဇြဳပၞာန် ဂြိပ်တိတ်ကၠုၚ် နူဗ္ဒိုပ်ဒပ်ကံၚ်ဇြဳပၞာန် မၞုံပယျဵုသေံ−ဗၟာတံ ကောံမံၚ်မွဲတုဲ ဇြဟတ် ၁၂၀ ပြၚ် နွံဒၟံၚ်ဂှ် ဂွံတီကေတ် အတိုၚ်ဂလာန် ဂကောံဇြဟတ်ပၠန်ဂတးတံရ။

ပ္ဍဲခရိုၚ်ဘာပန် KNU ဂှ် အပ္ဍဲဂိတုဏံ ဟိုတ်နူကံၚ်ဇြဳပၞာန် ဗ္တိုက်ထောံမခတိုဟ်တုဲ ကောန်ၚာ်သၟတ်မွဲတၠ မပါလုပ် ကောန်အရာပ်ပိတၠ ချိုတ်တုဲ မွဲတၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ် အတိုၚ်တၚ်လလောၚ်တြး KPSN ရ။

ပရိုၚ်−သြၚ်လောန်တိုၚ်(မ်)

ဗီု−KPSN